పుట:తరికొండ నృసింహశతకము (తరికొండ వేంగమాంబ).pdf/91

చ.⁠

సరఁగున నాత్మలోపలను సద్గురుఁ గాంచినవాఁడు క్రమ్మఱన్ అరుగఁడు దుర్గుణంబులకు, నందుకు సాదృశ మేనుఁ జెప్పెదన్ మఱి కదళీఫలంబుఁ దగమక్కువతోడ భుజించు కీరముల్ కొఱుకునె ముష్టికాయఁ? దరిగొండ నృసింహ! దయాపయోనిధీ!

⁠ 78

భావం:

దయాసముద్రుడవయిన శ్రీతరిగొండ లక్ష్మీనరసింహదేవా! సద్గురుడవు, జగద్గురుడవు అయిన నిన్ను ఏ మనుష్యుడు తన ఆత్మలో సందర్శిస్తాడో, అటువంటి సుకృతి మళ్లీ చెడుగుణాలవైపు వెళ్లడు. (చెడు గుణాలను చేపట్టడని భావం). ఇందుకు ఒక దృష్టాంతాన్ని తమకు మనవి చేస్తున్నాను; దయతో చిత్తగించు! పరిపక్వమైన అరటిపండ్లను ఆరగించిన రామచిలుకలు ఎక్కడైనా, ఎప్పుడైనా విషముష్టికాయలను (తినవలెననే కాంక్షతో) కొఱుకుతాయా? (కొఱకనే కొఱకవనేది నిశ్చయం).