పుట:తరికొండ నృసింహశతకము (తరికొండ వేంగమాంబ).pdf/61

ఉ.⁠

గీష్పతి, బ్రహ్మశేషనుతకీర్తివిశాల! దయాంతరంగ! యో పుష్పశరారిమిత్ర! విను పొందుగ దేహములోన మేటిగాఁ బుష్పము లేడు నుండు, తనముందర నందొక ముక్తిపుష్పమున్ గోష్పదభాతి నుండుఁ దరిగొండ నృసింహ! దయాపయోనిధీ!

⁠ 48

భావం:

దయాసముద్రుడవయి తరిగొండలో అవతరించియున్న శ్రీ లక్ష్మీనృసింహదేవా! బృహస్పతి, బ్రహ్మ, ఆదిశేషుడు- వీళ్లచే విశేషంగా కొనియాడబడిన విశాలమైన కీర్తిగలవాడా! పరమశివునకు మిత్రుడా! ఓ కరుణాంతరంగా! స్వామి! చిత్తగింపుమా! ఈ దేహంలో ప్రసిద్ధంగా ఏడు పుష్పాలు ఉన్నాయి. వాటికి ముందు - అనగా అన్నింటికి పైభాగాన ముక్తి అనే పుష్పం ఆవుగిట్టంత పరిమితి, ఆకృతి- గలిగి భాసిస్తూవుంటుంది.