పుట:తరికొండ నృసింహశతకము (తరికొండ వేంగమాంబ).pdf/36

ఉ.⁠

మేలు! కృపాంతరంగ! నిను మిక్కిలి నే నిటు పిల్చి పిల్చినన్ ఏల పరాకు చేసెదవె? యిప్పుడు నిన్నెడఁబాయఁజాలకన్, చాలగు నీ పదాబ్జములసారములెల్ల మిళిందభాతిగన్ క్రోలుచునుందునయ్య! తరిగొండ నృసింహ! దయాపయోనిధీ!

⁠ 23

భావం:

దయాసముద్రుడవయిన శ్రీతరిగొండ లక్ష్మీనృసింహదేవా! కరుణాహృదయా! మేలగునుగాక! ఇంతగా నేను పలుమార్లు నిన్ను పిలుస్తూవున్నప్పటికీ పరాకు చేస్తున్నావెందులకో? ఇప్పుడు నిన్ను ఎడబాయలేక, నీ పాదపద్మాలనుండి చాలుగా స్రవించే సారాన్ని (జాల్వారే భక్తిభావన-అనే మకరందాన్ని) తుమ్మెదలాగా పానం చేస్తూ వుంటున్నానయ్యా! చిత్తగించు!