పుట:ఉషాపరిణయము (పసపులేటి రంగాజమ్మ).pdf/135

తృతీయాశ్వాసము

95

గీ.⁠

వాలుఁ బలకయు ధరియించి వఱలువానిఁ బాదసంచారమున నుర్విఁ బ్రబలువాని నఖిలభువనైకవీరు నయ్యదుకుమారుఁ గాంచి కోపించి బొమముడి కదుర నపుడు.

⁠ 77

క.⁠

వివిధాయుధరహితుండును గవచవిహీనుండు [1]వీనిఁ గంటిరె మీరల్ జవమలరఁ బట్టి తెండని యవిరళగతి దనుజభటుల నాజ్ఞాపించెన్.

⁠ 78

సీ.⁠

ప్రళయకాలమునాటి పటుమేఘబృందంబు         లాదిత్యుఁ గప్పిన యందమలర ఖరదూషణాదిరాక్షసనాథయూథంబు         లారాముపై వచ్చు హరువుదోఁప రహికెక్కు చైద్యజరాసంధముఖ్యులు         శ్రీకృష్ణుఁ బొదివిన చెలువు మెఱయ గోగ్రహణంబునఁ గురుబలం బెల్లను         గాండీవిఁ గప్పిన క్రమముమీర

⁠

గీ.⁠

నపుడు దైతేయు లాగ్రహవ్యగ్రు లగుచు బహువిధాయుధహస్తులై ప్రబలి మిగులఁ గారుచిచ్చును మిడుతలు గవిసినట్లు శూరుఁడౌ ననిరుద్ధునిఁ జుట్టుకొనిరి.

⁠ 79

మ.⁠

అనిరుద్ధుండును రోషభీషణతరాహంకారహుంకారుఁడై దనుజానీకముఁ దేరిచూచి నగుచున్ దర్పంబుమీరన్ గడున్ దునియల్ గాఁ బడవ్రేయ నద్దనుజులన్ దుర్వారఖడ్గంబుచే ననికిన్ జాలక పారి రందఱును హాహాకారముల్ మీరఁగన్.

⁠ 80

1. వీఁడు