తాళ్ళపాక పదసాహిత్యం/మూడవ సంపుటం/రేకు 287
రేకు: 0287-01 సాళంగనాట సం: 03-500 హనుమ
పల్లవి:
అదివో నీప్రతాపము హనుమంతా
యెదురులేదు నీకు నెక్కడా హనుమంతా
చ. 1:
యెత్తిననీ కుడిహస్త మిల నసురలు చూచి
హత్తిరి పాతాళము హనుమంతా
చిత్తగించి నీ యెడమ చేతి పిడికిటికి
తత్తరించి చిక్కిరదె దైత్యులు హనుమంతా
చ. 2:
నలియఁ దొక్కిన నీ వున్నతపుఁ బాదముకింద-
నలమటించే రరులు హనుమంతా
చలపట్టి నీవు జంగ చాఁచిన పాదహతిని
బలుదానవులు భంగపడిరి హనుమంతా
చ. 3:
వడి నీవు మీఁదికి వాలమల్లార్చిన
అడఁగిరి రాక్షసులు హనుమంతా
బడినే శ్రీవేంకటేశుపంపున నీవు గెల్వఁగ
బెడిదమై పొగడేరు పెద్ద హనుమంతా
రేకు: 0287-02 మాళవి సం: 03-501 వేంకటగానం
పల్లవి:
దిక్కులెల్లా సాధించి దేవదుందుభులు మ్రోయ-
నెక్కడ చూచినఁ దానే యేఁగీ సేవించరో
చ. 1:
అదివో శ్రీహరి తేరు అదె గరుడధ్వజము
కదలేటి ఘనతురంగము లవిగో
పొదలుఁ బూదండలవే పూచి వాఁగే ఘంటలవే
యెదుటఁ దిరువీధుల నేఁగీ సేవించరో
చ. 2:
వారె అచ్చరలేమలు వారె మునులు రుషులు
వారక కొలిచే దేవతలు వారే
వీరె యనంతగరుడవిష్వక్సేనాదులు
యీ రీతిఁ బ్రతాపాన నేఁగీ సేవించరో
చ. 3:
వీఁడె శ్రీవేంకటేశుఁడు వీఁ డలమేల్మంగపతి
వీఁడె శంఖచక్రాదుల వెలసినాఁడు
పోఁడిమి వరములిచ్చీఁ బొసఁగ దాసులకెల్లా
యేఁడేఁడు దప్పకుండాను యేఁగి సేవించరో
రేకు: 0287-03 బౌళి సం: 03-502 నృసింహ
పల్లవి:
ఆనందనిలయ ప్రహ్లాదవరదా
భానుశశినేత్ర జయ ప్రహ్లాదవరదా
చ. 1:
పరమపురుష నిత్య ప్రహ్లాదవరదా
హరి యచ్యుతానంత ప్రహ్లాదవరదా
పరిపూర్ణ గోవింద ప్రహ్లాదవరదా
భరిత కల్యాణగుణ ప్రహ్లాదవరదా
చ. 2:
భవరోగసంహరణ ప్రహ్లాదవరదా
అవిరళ కేశవ ప్రహ్లాదవరదా
పవమాననుతకీర్తి ప్రహ్లాదవరదా
భవపితామహవంద్య ప్రహ్లాదవరదా
చ. 3:
బలయుక్త నరసింహ ప్రహ్లాదవరదా
లలిత శ్రీవేంకటాద్రి ప్రహ్లాదవరదా
ఫలితకరుణారస ప్రహ్లాదవరదా
బలివంశకారణ ప్రహ్లాదవరదా
రేకు: 0287-04 రామక్రియ సం: 03-503 హనుమ
పల్లవి:
పంతగాఁడు మిక్కిలి బంటతనమునను
అంతటాఁ గలశాపుర హనుమంతరాయఁడు
చ. 1:
నీరధి చంగన దాఁటి నెట్టన లంకచొచ్చి
శ్రీరాము నుంగరము సీతకిచ్చి
మేరమీరి యక్షుఁ గొట్టి మేటి వనము వెఱికె
ఆరయఁ గలశాపుర హనుమంతరాయఁడు
చ. 2:
ఘాతతో లంక గాలిచి గక్కన లంకిణిఁ జంపి
యీతలికి మగుడఁ దా నేతెంచి
సీతాశిరోమణి శ్రీరామునకు నిచ్చె
ఆతఁడే కలశాపుర హనుమంతరాయఁడు
చ. 3:
అల రావణుని గెల్చి అయోధ్యాపురికి వచ్చి
బలురాముని సీతతోఁ బట్టముగట్టి
నిలిచె శ్రీవేంకటాద్రినిలయుని యెదుటను
అలరెఁ గలశాపుర హనుమంతరాయఁడు
రేకు: 0287-05 ముఖారి సం: 03-504 నృసింహ
పల్లవి:
అవధారు సకలలోకైకనాథ
సువర్ణరూపమైన సుగ్రీవ నారసింహా
చ. 1:
అరుదుగ మీరు సింహాసనముపై నుండఁగ
యిరుగడ సేవించేరు ఇంద్రాదులు
పరగ నెట్టనెదుట ప్రహ్లాదుఁ డున్నవాఁడు
సొరిదినే చిత్తగించు సుగ్రీవ నారసింహా
చ. 2:
చాపలపు హిరణ్యుని సమయించి వున్నమీకు
చేపట్టి మొక్కేరు వశిష్ఠాదులు
యే పొద్దు మీ తొడమీఁద నిందిర గాచుకున్నది
చూపులఁ గరుణ నించు సుగ్రీవ నారసింహా
చ. 3:
లలితముగ నీవు జగములు రక్షించఁగా
వలనుగఁ బొగడేరు వ్యాసాదులు
యెలమి శ్రీవేంకటేశ ఇందునందు నెలకొని
సులభమూర్తివైతివి సుగ్రీవ నారసింహా
రేకు: 0287-06 శ్రీరాగం సం: 03-505 రామ
పల్లవి:
శరణు శరణు రామచంద్ర నరేంద్రా
సరి మమ్ముఁ గావు రామచంద్ర నరేంద్రా
చ. 1:
ఘన దశరథునకుఁ గౌసల్యాదేవికిని
జననమందిన రామచంద్ర నరేంద్రా
కనలి తాటకిఁ జంపి కౌశికు జన్నము గాచి
చనవు లిచ్చిన రామచంద్ర నరేంద్రా
చ. 2:
అరిది సీతఁ బెండ్లాడి అభయ మందరి కిచ్చి
శరధిఁ గట్టిన రామచంద్ర నరేంద్రా
అరసి రావణుఁ జంపి అయోధ్యానగర మేలి
సరవి నేలిన రామచంద్ర నరేంద్రా
చ. 3:
పన్నుగ నలమేల్మంగపతి శ్రీవేంకటేశ్వరు-
సన్నిధి నిల్చిన రామచంద్ర నరేంద్రా
అన్నిటా లక్ష్మణభరతాంజనేయశత్రుఘ్నుల-
సన్నుతి కెక్కిన రామచంద్ర నరేంద్రా