రేకు: 0284-01 శ్రీరాగం సం: 03-482 శరణాగతి
పల్లవి : |
కొలిచినవారి పాలి కొల్లలివివో
యిల నిట్టి దైవమవు యిఁక వేరేకలరా
|
|
చ. 1: |
యెట్టైన నభయహస్త మెత్తుక కాచుకున్నాఁడ-
వట్టె దాసులఁ గాచేనంటా నీవు
తొట్టిన పాపాలు పోఁదోలు నీ నామమంత్రాలు
జట్టిగా లోకాల వెదచల్లినాఁడవు
|
|
చ. 2: |
తలఁచినవారికెల్లా ధనధాన్యా లిత్తునంటా
వొలసి శ్రీసతి మోచుకున్నాఁడవు
యిలఁ బావనులఁగా నిందరిఁ జేసేనంటా
నెలమిఁ బాదతీర్థ మేరు చేసినాఁడవు
|
|
చ. 3: |
పుట్టించ జీవులను భువనము లోపల
గట్టిగ బ్రహ్మను నాభిఁ గన్నాఁడవు
అట్టుగఁ బాలుపడి చుట్టి రక్షకత్వానికే
యిట్టే శ్రీవేంకటాద్రి యెక్కినాఁడవు
|
|
రేకు: 0284-02 భైరవి సం: 03-483 మాయ
పల్లవి : |
కాను స్వతంత్రుఁడననఁ గాదని తలఁగ లేను
నేను నీ కింకరుఁడ నీ రచనలే
|
|
చ. 1: |
యెంతైనాఁ దీరదిదే యెందుచూచిన పనులు
అంతటాను నీమాయ అలయించగా
దొంతులగుఁ గర్మములు తోడనే తిరిగీని
సంతకూటపు బ్రతుకు సటలఁబెట్టీని
|
|
చ. 2: |
మాన వింద్రియము లివి మతిలోనఁ బెరరేఁచు
నానాగము(తు?)లఁ బ్రకృతి నటియించఁగా
పూని పురాకృతములు పోనీక తిరిగీని
సానఁ బట్టిన వయసు సటలఁబెట్టీని
|
|
చ. 3: |
తరువులనే పెట్టీని తతిలేని యాసలివి
నిరతంపు జన్మములు నిడుసాగఁగా
వరుస శ్రీవేంకటేశ్వర నీవు నన్నేలి
కరుణించఁగా భక్తి ఘనత మీరీని
|
|
రేకు: 0284-03 భూపాళం 03-484 ధనుర్మాసం
పల్లవి : |
ఏమి నిద్దిరించేవు యెందాఁకాను
కామించి బ్రహ్మాదులెల్లఁ గాచుకున్నా రిదివో
|
|
చ. 1: |
పులుఁగాలుఁ బచ్చళ్ళు బోనము పెట్టినదిదే
వెలయు ధనుర్మాస వేళయు నిదే
బలసి సంకీర్తనపరులు పాడేరిదే
జలజాక్షుఁడ లేచి జలక మాడవయ్యా
|
|
చ. 2: |
తోడనే గంధాక్షతలు ధూపదీపా లివిగో
కూడిన విప్రుల వేద ఘోషణ లివే
వాడుదేరఁ బూజించవలెఁ గమ్మఁబువ్వులివె
వీడెమిదె కొలువుకు విచ్చేయవయ్యా
|
|
చ. 3: |
చదివేరు వైష్ణవులు సారెఁ దిరువాము డిదె
కదిసి శ్రీసతి ముందే కాచుకున్నది.
అదనాయ శ్రీవేంకటాధిప మా చరపిదే
యెదుట నిన్నటిమాపే యియ్యకొంటివయ్యా
|
|
రేకు: 0284-04 శుద్ధవసంతం సం: 03-485 కృష్ణ
పల్లవి : |
చేరి యశోదకు శిశు వితఁడు
ధారుణి బ్రహ్మకు దండ్రియు నితఁడు
|
|
చ. 1: |
సొలసి చూచినను సూర్యచంద్రులను
లలి వెదచల్లెడు లక్ష్మణుఁడు
నిలిచిన నిలువున నిఖిలదేవతల
కలిగించు సురలగనివో యితఁడు
|
|
చ. 2: |
మాటలాడినను మరి యజాండములు
కోటులు వొడమేటి గుణ రాశి
నీటగు నూర్పుల నిఖిలవేదములు
చాటువ నూ రేటి సముద్ర మితఁడు
|
|
చ. 3: |
ముంగిటఁ బొలసిన మోహన మాత్మలఁ
బొంగించే ఘనపురుషుఁడు
సంగతి మా వంటి శరణాగతులకు
నంగము శ్రీవేంకటాధిపుఁ డితఁడు
|
|
రేకు: 0284-05 సాళంగం సం: 03-486 వైష్ణవ భక్తి
పల్లవి : |
జీవన్ముక్తులము శ్రీపతి దాసులము
భావించవో మమ్మును ప్రపంచపు మాయా
|
|
చ. 1: |
యివల దానధర్మము లేమిఁ జేయుట లేదు
తవిలిన పాతకాలు దైవమే వహించుకొనె
భువిలోన నా కిఁక బుట్టఁబని లేదు లేదు.
భవరోగవైద్యుఁడు శ్రీపతి గలఁడు గాన
|
|
చ. 2: |
యెలమి స్వర్గాది లోకాలేమీఁ గోరుట లేదు
కల వైకుంఠము హరి కాలమునాఁడే యిచ్చె
తొలుత నాకుఁ జావుల తోడి సడ్డ వద్దు వద్దు
బలువైన యచ్యుతుని బంట్లము గాన
|
|
చ. 3: |
పూపసుఖమూ నొల్లము పొంచి దుఃఖమూ నొల్లము
చేపట్టి బ్రహ్మానందము శ్రీవేంకటేశుఁ డిచ్చెను
దూపయు నాఁకటికిఁగా తోదోపు మా కిఁక వద్దు
కాఁపమృతమథనుఁడు గలఁ డిట్టే కాన
|
|
రేకు: 0284-06 పాడి సం: 03-487 శరణాగతి
పల్లవి : |
కాపులము నేము కర్తవు నీవు
దాపుదండై మము నిట్టే దయఁజూడవయ్యా
|
|
చ. 1: |
నెట్టన నైదుగురికి నేము డాగుపెట్టేము
చుట్టి చుట్టి వీడుఁ బట్టుచూపి వున్నది.
అట్టె కర్మములకు సరిగోరు వెట్టేము
నట్టుకొట్టి(ట్టే?) జీవులకు నరకములేలయ్యా
|
|
చ. 2: |
మించిన యాసలకిదే మేరలెల్లాఁ బెట్టేము
పొంచి మమతలలోఁ గాఁపుర మున్నారం(ము?)
పంచేంద్రియములకే పైరులు సేసితిమి
అంచెలఁ బ్రాణులకిఁక నానాజ్ఞలేలయ్యా
|
|
చ. 3: |
కూరిమి విషయముల కొట్నాలు దంచేము
చేరి నీవు చెప్పినట్టే సేసేము
యీరీతి శ్రీవేంకటేశ యిటు నీకే దాసులము
ఆరూఢిగా మన్నించితివంతే చాలు నౌనయ్యా
|
|