తాళ్ళపాక పదసాహిత్యం/మూడవ సంపుటం/రేకు 209
రేకు: 0209-01 దేసాక్షి సం: 03-049 భక్తి
పల్లవి:
నీవే నేరవుగాని నిన్నుఁ బండించేము నేము
దైవమా నీకంటే నీదాసులే నేర్పరులు
చ. 1:
వట్టి భక్తి నీ మీఁద వళుకువేసి నిన్నుఁ
బట్టి తెచ్చి మతిలోనఁ బెట్టుకొంటిని
పట్టెడు దులసి నీపాదములపై బెట్టి
జట్టిగొనిరి మోక్షము జాణలు నీదాసులు
చ. 2:
నీవు నిర్మించినవే నీకే సమర్పణసేసి
సోవల నీకృపయెల్లఁ జూరగొంటిమి
భావించొకమొక్కు మొక్కిభారము నీపై వేసిరి
పావనపు నీదాసులే పంతపు చతురులు
చ. 3:
చెరువుల నీళ్లుదెచ్చి చేరఁ(రె?)డు నీపైఁ జల్లి
వరము వడసితిమి వలసినట్టు
యిరవై శ్రీవేంకటేశ యిటువంటి విద్యలనే
దరిచేరి మించిరి నీదాసులే పో ఘనులు
రేకు: 0209-02 దేసాళం సం: 03-050 అధ్యాత్మ
పల్లవి:
ఎన్నఁడు దీరీ నీ తెందేపలు
పన్నిన జీవుల బంధములు
చ. 1:
భారపుఁ జిత్తము ప్రవాహరూపము
వూరెటి మదములు వూటెత్తె
తీర వింద్రయపు దేహభ్రాంతులు
కోరేటి కోర్కులఁ గొండలు వెరిగె
చ. 2:
ఉడికేటి పాపము లుగ్రనరకములు
తొడికేటి కర్మము తోడంటు
విడువవు భవములు వెంటవెంటనే
చిడుముడిఁ జిత్తము చీఁకటి వడెను
చ. 3:
రపణపు భవములు రాట్నపుగుండ్రలు
చపలపు బుద్ధులు జలనిధులు
ఇపుడిదె శ్రీవేంకటేశుఁడ నీవే
కపటము వాయఁగఁ గరుణించితివి
రేకు: 0209-03 ముఖారి సం: 03-051 శరణాగతి
పల్లవి:
నీవెంత నేనెంత నీకు నాకు నెంతదవ్వు
దైవమా సిగ్గువడక తగిలేనేఁ గాకా
చ. 1:
చెంది నీకు బ్రహ్మాదులు సేవలు సేయఁగాను
యిందు మా సేవలు నీకు నేడకువచ్చు
పొంది వసిష్ఠాదు లట్టే పూజలు సేయఁగాను
సందడి మాపూజలు సరకా నీకు
చ. 2:
సనకాదియోగులు సారె నిన్నుఁ దలఁచఁగా
యెనసి మాతలఁపు నీ కేడకెక్కును
నునుపుగా శేషాదులు నుతులు నిన్నుఁ జేయఁగా
పనివడి మా నుతులు బాఁతేయనా నీకు
చ. 3:
కిట్టి నారదాదులు నీకింకరులై వుండఁగాను
యిట్టె నీదాసుఁడ ననుటెంత కెంత
వొట్టి శ్రీవేంకటేశ మాకొకవుపాయము గద్దు
పట్టి నీదాసుల బంటుబంట నయ్యేనిఁకను
రేకు: 0209-04 లలిత సం: 03-052 అద్వైతము
పల్లవి:
అయ్యో వికల్పవాదులంతటా సిగ్గువడరు
యియ్యెడ నెట్టుగలిగె నీ యసురమతము
చ. 1:
నీ ముద్రలూ నొల్లరు నీదాసోహము నొల్లరు
కామించి నీ మీఁది భక్తి కడు నొల్లరు
నామమంత్రము నొల్ల రనామయుండ వనెందురు
తాము వైష్ణవుల మంటాఁ దర్కింతురు
చ. 2:
పైతృకవేళ నీపస్రాదమూ నొల్లరు
ఘాతల నూర్ద్వపుండ్రము గాదందురు
జాతర దైవాల నిన్ను సరిగాఁ బూజింతురు
ఆతల వైష్ణవులు దామనుకొందురు
చ. 3:
శ్రీవైష్ణవులఁ గంటేఁ జేతులెత్తి మొక్కరు
భావింతురు పగవారిఁబలెఁ గన్నట్టు
ఆవల వైకుంఠమూ ననిత్యమందురు
కావించి వైష్ణవులము కామా నేమందురు
చ. 4:
వరుస రావణాదుల వలె నెజ్ఞాలు సేతురు
సరుస నట్టే వేదమూఁ జదువుదురు
నిరతి శ్రీవేంకటేశ నీ మహిమ లెరఁగక
అరిది వైష్ణవులమే యని యాడుకొందురు
రేకు: 0209-05 గుండక్రియ సం: 03-053 అద్వైతము
పల్లవి:
నీయంతవారు గారు నిండుసామర్థ్యము లేదు
యీ యహంకారపు ముక్తి యీడేరీనా తమకు
చ. 1:
నీ సేవలే సేసి నీ కృప రక్షించఁగాను
ఆసలఁ బొందే ముక్తి అది చాలక
నీ సరివారలై నీవే తామనుకొని
యీసులఁ బొందే ముక్తి యీడేరీనా తమకు
చ. 2:
పొంచిన రాక్షసులెల్ల పూర్వదేవతలమంటా
యెంచుక పట్టిన మదమీ గర్వము
అంచెలఁ గర్మమే సేసే రాయాదేవతలఁ గూర్చి
ఇంచుకంతలోనే ముక్తి యీడేరీనా తమకు
చ. 3:
హరిలాంఛనపు భక్తి కందుకు నొడఁబడరు
సరిరోగికిఁ బథ్యము చవిగానట్టు
గరిమ శ్రీవేంకటేశుఁ గని మననివారికి
యెరవులనే ముక్తి యీడేరీనా తమకు
రేకు: 0209-06 బౌళి సం: 03-054 ఉపమానములు
పల్లవి:
వట్టిమోపు మోయనేల వడిఁ ములుగఁగనేల
పట్టిన నేమముతోడ బ్రదుకఁగ వలదా
చ. 1:
తల్లిదండ్రి గలవారు తమ లేములెఱఁగక
చెల్లపిళ్లలై యాటలఁ జెందినయట్టు
వుల్లములో హరి నమ్మి వుండిన ప్రపన్నులెల్ల
పల్లదాన నిర్భరులై బ్రతుకఁగ వలదా
చ. 2:
మగఁడు గల సతులు మంచి ముత్తైదువలై
యెగువ నితరమార్గా లెరఁగనట్టు
నగుతా లక్ష్మీపతి నమ్మిన ప్రపన్నులెల్ల
పగటుఁ గర్మము మాని బ్రదుకఁగ వలదా
చ. 3:
యేలికె నమ్మినబం టేరికిఁ బ్రియము చెప్ప-
కోలిఁ బతివాకిలి గాచుండినయట్టు
తాలిమి శ్రీవేంకటేశు దాసులైన ప్రపన్నులు
పాలించినాతని నమ్మి బ్రతుకఁగ వలదా