తాళ్ళపాక పదసాహిత్యం/నాలుగవ సంపుటం/రేకు 378

by తాళ్ళపాక అన్నమాచార్యులు

రేకు: 0378-01 ముఖారి సం: 04-453 దేవుడు-జీవుడు

పల్లవి:

పట్టినవ్రతము నీవే పరిపాలింతువుగాక
బట్టిబయలింతే నేను బలిమున్నదా

చ. 1:

దేవ నీవు మనసు సోదించఁగా నే ధీరుఁడనై
ఆవలఁ జలించకుండే యంతవాఁడనా
పూవు వంటి చిత్త మింతే పొల్లువంటికాయ మింతే
భావించ నిందులఁ బస వున్నదా

చ. 2:

అంతరాత్మవై నీవు యటు మరఁగులుసేయ-
నంతనె నినుఁ దెలిసే యంతవాఁడనా
గంతివంటిగుణ మింతే గాలివంటిప్రాణ మింతే
యింతరట్టుసేయ నిందు నెడమున్నదా

చ. 3:

మచ్చిక శ్రీ వేంకటేశ మాట నీవై యుండఁగాను
అచ్చపు నిన్ను నుతించే యంతవాఁడనా
గచ్చువంటియిహ మింతే గనివంటి పర మింతే
ముచ్చట కిందుకుఁ దుద మొద లున్నదా

రేకు: 0378-02 పాడి సం: 04-454 దశావతారములు

పల్లవి:

నరసింహ రామకృష్ణ నమో శ్రీ వేంకటేశ
సరుగ నాశత్రుల సంహరించవే

చ. 1:

బావ తిట్లకు శిశుపాలునిఁ జంపిన-
యేవ కోపకాఁడవు నేఁ డెందు వోతివి
నీవాఁడనని నన్ను నిందించి శత్రువును
చావఁగొట్టి వానినిట్టే సంహరించవే

చ. 2:

దాసుని భంగించేటి తరిఁ గస్యఁపుఁ జంపిన
యీసు కోపకాఁడ విపు డెందువోతివి
మేసుల నీలాంఛనాలు మించి నన్ను దూషించే
సాసించి శత్రువును సంహరింపవే

చ. 3:

కల్లలాడి గూబయిల్లు గైకొన్న గద్దఁజంపిన
యెల్లగాఁగఁ గోపకాఁడ వెందువోతివి
యిల్లిదె శ్రీ వేంకటేశ యీ నీ మీఁదిపాటలు
జల్లన దూషించు శత్రువు సంహరింపవే

రేకు: 0378-03 వరాళి సం: 04-455 అంత్యప్రాస

పల్లవి:

ఎరిఁగీ నెరఁగదు యేమి సేతు మతి
హరిదాస్యం బదియే సుఖము

చ. 1:

వెతలఁబొరలే ఘన విభవముకంటే
అతి పేదరిక మది సుఖము
గతి నెరవుల సింగారము కంటెను
సత మగు తన నిచ్చలమే సుఖము

చ. 2:

పలుబాములఁబడు పగలిటికంటే
తెలిసి నిద్రించు రాతిరి సుఖము
అలమట గడించు నమృతముకంటే
కలపాటి తనకు గంజే సుఖము

చ. 3:

పరపీడలొసఁగు భవమునకంటే
ధరఁ బొడమని చందము సుఖము
గరిమల శ్రీ వేంకటపతి నీకే
శరణని యెడి నాజన్మమే సుఖము

రేకు: 0378-04 బౌళి సం: 04-456 అంత్యప్రాస

పల్లవి:

పుట్టఁగా బుట్టిన నాభోగపుటాస
పట్టి యేమిగట్టుకొంటి బదుకవో యాసా

చ. 1:

వూరు దిప్పినట్టి యాస వుగముదిప్పిన యాస
చేరవచ్చి దైన్యమందించిన యాస
భారపెట్టి దేహమెల్లా బడిలించిన యాస
పారి మమ్మేఁచితి వింత బదుకవో యాసా

చ. 2:

నాలుక రుచుల యాస నాతులకాఁకల యాస
కాలకాసుకైన బొంకు గరుపే యాస
వోలిఁ బుణ్య తపమెల్ల వొరులకమ్మించు నాస
పాలుమాలించితి వింక బదుకవో యాసా

చ. 3:

కిందుపరచేటి యాస గేలిసేయించేటి యాస
పొందియట్టే సంతసానఁ బొదిపే యాస
కందువ శ్రీ వేంకటేశుఁ గని శరణంటి నేను
పందతనమొల్ల నింక బదుకవో యాసా

రేకు: 0378-05 సామంతం౦ సం: 04-457 భగవద్గీత కీర్తనలు

పల్లవి:

ఆ రూపమునకే హరి నేను మొక్కెదను
చేరి విభిషణుని శరణాగతుఁడని చేకొని సరిఁ గాచితివి

చ. 1:

ఫాలలోచనుఁడు బ్రహ్మయు నింద్రుఁడు
సోలి నగ్నియును సూర్యచంద్రులును
నీలో నుండఁగ నెరిఁ గనెఁ గిరీటి
మూల భూతి వగు మూర్తివి గాన

చ. 2:

అనంత శిరసుల ననంత పదముల-
ననంత నయనము లనంత కరముల
ఘన నీ రూపము గనుఁగొనెఁ గిరీటి
అనంత మూరితి వన్నిటఁ గాన

చ. 3:

జగము లిన్నియును సకల మున్నీంద్రులు -
నగు శ్రీ వేంకటనాథుఁడ నిన్నే
పొగడఁగఁ గిరీటి పొడగనె నీ రూపు
అగణిత మహిముఁడ వన్నిటఁగాన

రేకు: 0378-06 రామక్రియ సం: 04-458 హనుమ

పల్లవి:

ఆంజనేయ యనిలజ హనుమంత నీ -
రంజకపుఁ జేఁతలు సురల కెంచ వసమా

చ. 1:

తేరిమీఁద నీ రూపు దెచ్చిపెట్టి యర్జునుఁడు
కౌరవుల గెలిచె నంగర భూమిని
సారెకు భీముఁడు పురుషామృగముఁ దెచ్చుచోట
నీరోమములు గావా నిఖిల కారణము

చ. 2:

నీమూలమునఁగాదె నెలవై సుగ్రీవుఁడు
రామునిఁ గొలిచి కపిరాజాయను
రాముఁడు నీవంకనే పో రమణి సీతాదేవిఁ
బ్రేమముతో మగుడను బెండ్డాడెను

చ. 3:

బలుదైత్యులను దుంచ బంటతనము మించ
కలకాలమును నెంచఁగలిగితిగా
అల శ్రీ వేంకటపతి యండనే మంగాఁబుధి -
నిలయపు హనుమంత నెగడితిగా