రేకు: 0342-01 సాళంగం సం: 0342-01 సాళంగం సం: 04-244 శరణాగతి
| పల్లవి : |
హరివల్ల కడమలే దంతనంత నున్నవాఁడు
గరిమఁ గాననివారికల్ల యింతే సుండీ
|
|
| చ. 1: |
లోనఁ హరిఁ దలచితే లోపలందె పొడచూపు
పూని వెలిఁ దలచితే భూమినల్లాఁ బొడచూపు
తానే యిందరిలోన దైవమయి వున్నవాఁడు
కానకవుండినవారికల్ల యింతే సుండీ
|
|
| చ. 2: |
పట్టి విచారించుకొంటేఁ బ్రాణముతోఁ బొడచూపు
జట్టిఁదనదండనల్లా సంసారమై చూపు
పట్టపగలై వున్నాఁడు బాయట నెందు చూచిన
గట్టిగా గాననివారికల్ల యింతే సుండీ
|
|
| చ. 3: |
శరణముచొచ్చితేనె చేతిలోనే వున్నవాఁడు
పరమభాగవతులపలుకులో నున్నవాఁడు
యిరవుగ శ్రీవేంకటేశుఁడెదుటనే వున్నాఁ డతని -
కరుణ గాననివారికల్ల యింతే సుండీ
|
|
రేకు: 0342-02 ఆహిరి సం: 04-245 వైష్ణవ భక్తి
| పల్లవి : |
మాకు నేమీఁ బనిగాదు మరి యేమిగలిగినా
శ్రీకాంతు నడుగరో చిత్రగుప్తులాల
|
|
| చ. 1: |
ధరణీశుపనులకుఁ దగు బందె లేదట
హరిదాసులకుఁ బాపమంటునా మరి
సరిఁ జక్రపుడాగు లిచ్చటఁ జూచుకోరో మీరు
అరసి మీఁదటిమాట లాతని నడుగరో
|
|
| చ. 1: |
లావరిమన్ననపాత్రులకు వెట్టి లేదట
కావింప వైష్ణువులకుఁ గర్మమున్నదా
దేవునిలాంచన మిదె తిరుమణి చూచుకోరో
ఆవల నేమిగల్లాను ఆతని నడుగరో
|
|
| చ. 1: |
సతి రాణివాసమైతే జాతికులమెంచరట
హితశరణాగతులకేది జాతి
తతి శ్రీవేంకటపతిదాస్య మిది చూచుకోరో
యితవై మరేమిగల్లా నీతని నడుగరో
|
|
రేకు: 0342-03 లలిత సం: 04-246 శరణాగతి
| పల్లవి : |
ఎంచి చూచితే మాకు నిందే నిత్యసుఖము
కొంచి యనుమానమైతే కొనదాఁకా లేదు
|
|
| చ. 1: |
హరి నీగర్భములోన నంగమయి వున్నారము
యిరవై వేరేమోక్ష మెంచ నున్నదా
నిరతిఁ జూచినవెల్లా నీరూపులే మాకు
ధరలోన నింతకంటే ధ్యానమున్నదా
|
|
| చ. 2: |
అంతరాత్మవైన నిన్నే యాతుమకు నిచ్చితిని
యింతకంటె నే నడిగేది యిఁకనున్నదా
పొంతనే భూకాంత పుట్టిన నెలవు మాకు
యింతకంటే తల్లిదండ్రు లిఁకనున్నారా
|
|
| చ. 3: |
పొరి నెరుకే జ్ఞానము పొంచి మరపే సమాధి
సొరిది నేఁడింతకంటే సుఖమున్నదా
గరిమ శ్రీవేంకటేశ కల్పితమింతా నీదె
శరణంటే యింకా విచారమున్నదా
|
|
రేకు: 0342-04 శుద్ధవంతం సం: 04-247 వైరాగ్య చింత
| పల్లవి : |
దైవమా నీచేఁతలు తప్పదు మా రోఁతలు
యేవలఁ జూచిన బాయ దేమందమయ్యా
|
|
| చ. 1: |
కాయములో హేయమదె కమ్మఁబూఁత మీఁద నదె
రోయదు చిత్తమునకు రుచియే తోఁచీ
మాయలనే పొరలేది మాఁటలనే విసిగేది.
యేయెడఁ గనీ గాన మేమందమయ్యా
|
|
| చ. 2: |
పుట్టుగది యెంగిలి పూఁచిన దాచారము
గుట్టు చెడదందునాను గుణమే తోఁచీ
వట్టియాసఁ బొరలేది వంతఁ బడి తిరిగేది
యెట్టు వేగించఁగవచ్చు నేమందమయ్యా
|
|
| చ. 3: |
నిక్కిచూచితే నెరుక నిద్దిరించితే మరపు
మక్కళించినబదుకు మంచిదై తోఁచీ
మిక్కిలి శ్రీవేంకటేశ మీకు నేను శరణంటే
యెక్కువాయ నాపదవి యేమందమయ్యా
|
|
రేకు: 0342-05 శ్రీరాగం సం: 04-248 మాయ
| పల్లవి : |
అటమీఁదిపనులకు హరి నీవే కలవు
సటలైన నిజమైనా జరపేముగాక
|
|
| చ. 1: |
పరమాత్మ నీమాయఁ బాయగ నే నెంతవాఁడ
దొరయైతే రాజాజ్ఞ దోయవచ్చునా
తొరలిన యింద్రియాలఁ దోసిపోవ నెట్టువచ్చు
సిరుల నేలికపంపు సేయు టింతేకాక
|
|
| చ. 2: |
శ్రీపతి యీసంసారము సేయకుండ నెంతవాఁడ
మాపుదాఁకా రాచవెట్టి మానవచ్చునా
పాపపుణ్యము లొల్లక పరగ నాకెట్టు వచ్చు
తేపఁ దల్లి వుగ్గువెట్టఁ దినకుండవచ్చునా
|
|
| చ. 3: |
చ. 3: దేవ నీవిచ్చినమేను తెగి రోయ నెంతవాఁడ
కావించి రాచయీవికిఁ గడమున్నదా
శ్రీవేంకటేశ నీచిత్తములోవాఁడ నింతే
యేవిధిఁ బెట్టినా నేనియ్యకొంటగాక
|
|
రేకు: 0342-06 భైరవి సం: 04-249 కృష్ణ
| పల్లవి : |
అనుచు మునులు ఋషు లంతనింత నాడఁగాను
వినియు విననియట్టె వీడె యాడీఁగాని
|
|
| చ. 1: |
ముకుందుఁ డితఁడు మురహరుఁ డితఁడు
అకటా నందునికొడుకాయఁగాని
శకుంతగమనుఁ డితడు సర్వేశుఁ డితఁడు
వెకలి రేపల్లెవీధి విహరించీఁగాని
|
|
| చ. 2: |
వేదమూరితి ఇతఁడు విష్ణుదేవుఁ డితఁడు
కాదనలేక పసులఁ గాచీఁగాని
ఆదిమూల మితఁడు యమరవంద్యుఁ డితఁడు
గాదిలిచేఁతల రోలఁ గట్టువడెఁగాని
|
|
| చ. 3: |
పరమాత్ముఁ డితఁడే బాలుఁడై వున్నాఁడుగాని
హరి యీతఁడే వెన్నముచ్చాయఁగాని
పరగ శ్రీవేంకటాద్రిపతియును నీతఁడె
తిరమై గొల్లెతలచేఁ దిట్టువడీఁగాని
|
|
