రేకు: 0309-01 ముఖారి సం: 04-049 శరణాగతి
| పల్లవి : |
ఆదిమూలమే మాకు నంగరక్ష
శ్రీదేవుఁడే మాకు జీవరక్ష
|
|
| చ. 1: |
భూమిదేవిపతి యైన పురుషోత్తముఁడె మాకు
భూమిపై నేడ నుండినా భూమిరక్ష
ఆమని జలధిశాయి అయిన దేవుఁడే మాకు
సామీప్యమందున్న జలరక్ష
|
|
| చ. 2: |
మ్రోయుచు నగ్నిలో యజ్ఞమూర్తియైన దేవుఁడే
ఆయములు దాఁకకుండా నగ్నిరక్ష
వాయుసుతు నేలినట్టి వనజనాభుఁడే మాకు
వాయువందుఁ గందకుండా వాయురక్ష
|
|
| చ. 3: |
పాదమాకసమునకుఁ బారఁజాఁచే విష్ణువే
గాదిలియై మాకు నాకాశరక్ష
సాదించి శ్రీవేంకటాద్రి సర్వేశ్వరుఁడే మాకు
సాదరము మీరినట్టి సర్వరక్షా
|
|
రేకు: 0309-02 దేశాక్షి సం: 04-050 శరణాగతి
| పల్లవి : |
ఎంచి సేయుపను లిఁక లేవు
కొంచక యాతనిఁ గొలుచుటే కలది
|
|
| చ. 1: |
తప్పదు కర్మము తా నెందున్నా
చెప్పఁగ దీనికిఁ జింతేలా
అప్పడు తొల్లే అనుమతించె నివి
తప్పక యాతనిఁ దలఁచుటే కలది
|
|
| చ. 2: |
ఆయము నన్నము నందొక లంకే
వేయుట దీనికి వెతలేలా
కాయములో హరి గలఁడంతరాత్మ
యీయెడఁ దను నుతియించుటే కలది
|
|
| చ. 3: |
వెలిని లోన శ్రీవేంకటేశుఁడే
తెలియని మతి నందియమేలా
యిలలో మనముల నేలె నాతఁడే
సలిగె మనకతని శరణమే కలది
|
|
రేకు: 0309-03 దేవగాంధారి సం: 04-051 దశావతారములు
| పల్లవి : |
అన్నివిధములుఁ దానై యాతుమలో మరి వీఁడే
పన్నిన యీ పరమాత్మభావనే మా బ్రదుకు
|
|
| చ. 1: |
గోపాలకృష్ణునిచూపే కోరిన పనులపాఁడి
గోపికావల్లభుకృపే కూర్మివనిత
శ్రీపతిదయే మాకుఁజేరే ధనధాన్యములు
చేపట్టిన బ్రహ్మతండ్రి చిత్తమే మాపుత్రులు
|
|
| చ. 2: |
జలధిశాయికరుణే సర్వరత్నములసొమ్ము
అల పీతాంబరువాత్సల్యమే వస్త్రములు
మలయు గరుడధ్వజుమన్ననే వాహనములు
యిల నచ్యుతనామమే యిదే మాకాయుష్యము
|
|
| చ. 3: |
అమృతమథను మహిమదె మా గాదెల కొల్చు
విమతదైత్యారి యావేశమే భయహరము
అమర శ్రీవేంకటేశు నడుగులే మాకు నిండ్లు
తమితో నాతనిదేవే తల్లియుఁ దండ్రియును
|
|
రేకు: 0309-04 సామంతం సం: 04-052 దశావతారములు
| పల్లవి : |
తిమ్మిరెడ్డి మాకునిచ్చె దిష్టమైనపొలము
బొమ్మిరెడ్డి కప్పగించి పోదిసేసెఁ బొలము
|
|
| చ. 1: |
నిండినట్టి మడుగుల నీరువంక పొలము
కొండలు మోఁచినపెద్ద గొబ్బరపుఁబొలము
అండనే పొలము రాజులుండేటి పొలము
చెండివేసి మాకులెల్లా సెలగినపొలము
|
|
| చ. 2: |
అసపడి వరదానమడిగిన పొలము
బాసలతోఁ గడు నెత్రుపట్టమైనపొలము
రాసికెక్కేమునులకు రచ్చైన పొలము
వేసరక నాఁగేట వేగిలైన పొలము
|
|
| చ. 3: |
మంచి గురుతైన రావిమానిచేని పొలము
వంచిన గుఱ్ఱముఁ దోలే వయ్యాళి పొలము
యెంచఁగ శ్రీవేంకటేశు నిరవైన పొలము
పంచుకొని లోకులెల్లా బ్రదికేటి పొలము
|
|
రేకు: 0309-05 గుండక్రియ సం: 04-053 వైరాగ్య చింత
| పల్లవి : |
నే నేమి సేయుదును నిన్నుఁ బో వివేకము
శ్రీనాథుమహిమలు చిమ్మి రేఁచఁగాను
|
|
| చ. 1: |
జీవుఁడేమి సేయును; చిత్తము వసముగాక
యీవల నావలఁ బరువెత్తఁ గాను
చేవల నా చిత్తమేమి సేయు; నందులోన నున్న-
శ్రీవల్లభునిమాయ చిమ్మిరేఁచఁగాను
|
|
| చ. 2: |
దేహ మేమిసేయును; దేహము లోపల నున్న-
దాహపుటాసలు వెళ్లి దవ్వఁగాను
యీహల నాయాసలును యేమిసేయు; నన్నిటికి
శ్రీహరి యానాజ్ఞ లిటు చిమ్మిరేఁచఁగాను
|
|
| చ. 3: |
పుట్టు గేమిసేయును; పురాకృతము వెంటఁ
గట్టిన బంధములై కలఁచఁగాను
గుట్టుతో శ్రీవేంకటేశుఁ గొలువఁగా నన్నతఁడు
మట్టుమీరఁ బదవిచ్చి మన్నించఁగాను
|
|
రేకు: 0309-06 లలిత సం: 04-054 దశావతారములు
| పల్లవి : |
సిరిమగఁడే మొగసిరి రక్ష
మరుగురుఁడే మా మర్మపు రక్ష
|
|
| చ. 1: |
పులుగు నెక్కినవాఁడే పులుగుదోషపు రక్ష
బలు బాలుఁడైనవాఁడే బాలగ్రహ రక్ష
మొలచి పిన్నై మిన్నుముట్టఁబెరిగినవాఁడే
తొలఁగఁ దోసేటి ముట్టుదోషపు రక్ష
|
|
| చ. 2: |
బూతకిఁ జంపినవాఁడే బూతకి వాకట్టు రక్ష
పాతాళానఁ గూర్మమైనపతి గుంతదోష రక్ష
ఘాతఁగరుణాకరుఁడై కరుణా దృష్టివాఁడే
మా తరతరము ద్రిష్టిమంత్రపు రక్ష
|
|
| చ. 3: |
పాముపైఁ బండేటివాఁడే పాములవాకట్టు రక్ష
సేమపు సర్వజీవాత్మ జీవ రక్ష
నేమపు శ్రీవేంకటాద్రి నిలయుఁడై యున్నవాఁడే
యేమిటాను మా పురుఁటియింటి రక్ష
|
|
