ఇతడే పరబ్రహ్మ మిదియే రామకధ

ఇతడే పరబ్రహ్మ మిదియే రామకధ
శతకోటి విస్తరము సర్వ పుణ్యఫలము

ధరలో రాముఁడు పుట్టె ధరణిజఁ బెండ్లాడె
అరణ్యవాసులకెల్లా నభయమిచ్చె
సొరిది ముక్కుఁ జెవులు చుప్పనాతిని గోసె
ఖరదూషణులను ఖండించి వేసె

కినిసి వాలిఁ జంపి కిష్కింధ సుగ్రీవు కిచ్చె
వనధి బంధించి దాఁటె వానరులతో
కనలి రావణ కుంభకర్ణాదులను జంపి
వనితఁ జేకొని మళ్ళి వచ్చె నయోధ్యకును

సౌమిత్రియు భరతుండు శత్రుఘ్నుఁడు గొలువఁగ
భూమి యేలె కుశలవపుత్రులఁ గాంచె
శ్రీమంతుఁడై నిలిచె శ్రీవేంకటాద్రిమీఁద
కామించి విభీషణ లంకకు బట్టము గట్టె 4-519