బసవపురాణము/ద్వితీయాశ్వాసము
ద్వితీయాశ్వాసము
శ్రీ లింగమథనవిలోలకేలీవి - శాలసౌఖ్యానంద! సంగయామాత్య!
అక్కడ నంతఁ గళ్యాణంబునందు - నెక్కుడు శివభక్తికెల్లయై పరగు
బండారి బలదేవదండనాయకుఁడు - దండి బసవనికిఁ దనయ నిచ్చుటయుఁ
బ్రమథు లెంతయుమెచ్చి రాఁబంపఁబోవు - క్రమమునఁ బ్రమథలోకమున కేఁగుడును
బలదేవమంత్రి యాప్తుల బంధుజనులఁ - బిలువంగఁబంచి యా బిజ్జలుం డనియె
బసవేశ్వరునకు బిజ్జలుఁడు దండనాయకపద మిచ్చుట
“[1]ఇతనితోఁబుట్టువు సుతుఁ డెవ్వఁడేని - నితని నియోగంబు ప్రతిదాల్పఁగలఁడె?
అనవుడు "కలఁడు మహారాజ! యతని - తనయ ప్రాణేశుండు వినయోక్తిపరుఁడు
నీ రాజ్యమంతయు నిలువంగఁ [2]జాలు - దూరీకృతాఘుండు దోర్బలాధికుఁడు
విను మఖిలకళాప్రవీణుఁ డెట్లనిన - జనులెల్ల నెఱుఁగఁగ సంగమేశ్వరుని
చేఁ బ్రసన్నత వడసెను గాన నీకుఁ - దాఁ బ్రధానిగఁ దగు ధరణీశ” యనిన
నిజ్జగం బింతయు నేలినకంటె - బిజ్జలు డెంతయుఁ బ్రీతాత్ముఁ డగుచుఁ
దన వీటఁదగిన ప్రధానుల హితులఁ - దనయెక్కుభద్రేభమును నమాత్యులను
బసవనిఁ దోడ్తేరఁబంచుడు వారు - నెసకంబుతో సంగమేశ్వరం బేఁగి
యక్కడ బసవని నసమానుఁ గాంచి - చక్కఁ[3]జాఁగిలి మ్రొక్కి సరణి నిట్లనిరి
“నాకోపభోగాపునర్భవాదులను - నీ కొకలెక్కయే నిజమట్లకాక
శివభక్తిసారానుభవభవ్యసుఖికి - నవశంబ కాక రుచ్యములె యిన్నియును?
నైనను లోకహితార్థుండ వీవు - కాన మా ప్రార్థనఁ గైకొనవలయు
బిజ్జలక్షోణీశు ప్రియము సల్పినను - నిజ్జగతీతలం బేలఁడే(వే?) చెపుమ
మంత్రిపట్టమునకు, మండలంబునకుఁ, - దంత్రంబునకు, నిజాప్తమునకు, మూల
భండారమునకు భూపతిరాజ్యమునకు - నొండేమి నీవకా [4]కొడయ లున్నారె?
యతఁడు పట్టెఁడుకూటి కర్హుండ కాని - క్షితికెల్ల నీవచూ పతివి నిక్కంబు
విచ్చేయు” మని యిట్లు విన్నవించుడును - నచ్చోట భక్తహితార్థంబు దలఁచి
యందఱుఁగొల్వంగ "నట్లకా”కనుచుఁ - గందర్పహరుభక్తగణములనెల్లఁ
గొలిచి తత్కారుణ్యజలరాశిఁ దేలి - యలరుచుఁ జనుదేర నంత నిక్కడను
బసవేశ్వరుఁడు కళ్యాణకటకము చేరుట
“నదెవచ్చె నిదెవచ్చె” నని విని ముదిత - హృదయుఁడై బిజ్జలుఁ డెదురుకొ న్వేడ్క
నలవడఁ బదియురెండామడనేల - గలయఁగఁ గల్యాణకటక [5]మంతయును
శ్రీరమ్యముగ నలంకారింపఁ [6]బంచి - భూరమణుండు శృంగారంబు సేసి
మండలాధీశ సామంత ప్రధాన - దండాధినాథమాతంగతురంగ
పరివారసహి[7]తుఁడై పరమహర్షమున - నరుదెంచి పదహతి ధరణి గ్రక్కదల
వివిధవాద్యధ్వనుల్ దివి [8]దీటుకొనఁగ - నవనీతలేశుఁ డల్లంతటఁ గాంచె
బసవకుమారు సద్భక్తిశృంగారు - నసదృశాకారుఁ దత్త్వార్థవిచారు
నేకాం[9]గవీరు దేహేంద్రియదూరు - లోకనిస్తారు నలోకానుసారు
జంగమవ్యాపారు సజ్జనాధారు - లింగగంభీరు గతాంగవికారు
విమలశివాచారుఁ ద్రిమలధిక్కారు - నమితమహాచారు నచలితధీరు
విరహితసంసారు వీరావతారుఁ - బరిహృతాహంకారు భక్తివిహారు
శివభక్తిసారు విశిష్టప్రకారు - నవినాశసంస్కారు నతులితశూరు
విపులక్షమాగారు వినయప్రచారు - సుపథైకవిస్తారు శుద్ధశరీరుఁ
గుజనవిదారు సద్గుణమణిహారు - వృజినతరుకుఠారు విహితోపకారు
నతిదయాలంకారు నఘసముత్సారు - హితహృద్గతోంకారు నతసముద్దారు
శ్రుతిపరిచారు నిర్మోహాంధకారుఁ - గృతరిపుసంహారు ధృతనయాచారుఁ
[10]జారునిర్మలకీర్తి సత్యప్రపూర్తి - సారసద్గుణవర్తి శాశ్వతమూర్తిఁ
గని పాదచారియై చనుదెంచి చేరి - ఘనతరప్రియపూర్వకంబుగ నపుడు
సముచితసత్కారసంతుష్టుఁ జేసి - సమదాంధగంధగజంబు [11]లేళ్నూఱు
పండ్రెండువేలు శుంభత్తురంగములు - పండ్రెండులక్షలు బలవత్పదాతి
పాటి బండారులు పన్నిద్ద ఱందు - మేటితనంబు నర్మిలినిచ్చి తనదు
నఖిలరాజ్యమునకు నర్హుఁగాఁ జేసి - సుఖలీల బిజ్జలక్షోణీశ్వరుండు
దానును బసవనదండనాయకుఁడు - నా నియోగము గొల్వ నరుదెంచుచుండఁ
బుణ్యపణ్యాంగనల్ పురవీథులందుఁ - బుణ్యాత్ము బసవప్రభునిఁ జూచువేడ్కఁ
“జూడఁగ వచ్చెద సుదతిఁ నే” ననుచు - “వేడుక [12]చెఱుపక వేగ ర”మ్మనుచు
“గాలిదొసఁగుఁ గాక! క్రమ్మఱు” మనుచు - “నేలమ్మ! వచ్చిన నేమి నీ”కనుచు
“నేకతంబొకతెవ యేఁగుమీ” వనుచు - “నీ కాళ్ల నడచెదనే కాంత!" యనుచుఁ
“బతిగన్న సైఁచునే పడఁతి! ని”న్ననుచుఁ - “బతిగని యెట్లైనఁ [13]బదరని"మ్మనుచు
“బసవన్నఁ జూడకపడఁతి! పో”ననుచు - “ముసుఁగిడి వేగ రా మురియక” యనుచు
“దోఁకొని పోయిన దోసమే” యనుచు - “మూఁకలోనికిఁబోకు ముగ్ధవీ” వనుచు
“దిక్కులు చూడక చక్కర"మ్మనుచు - “నెక్కడి తరువమ్మ! యింతి! నీ”కనుచు
“మానిని! బసవన్న మహిమ యి”దనుచు - “మానుగా భక్తుల మఱిచూత”మనుచు
“నిట్టి సందడి [14]గలదే యెందు” ననుచుఁ - “దట్టాడకిటు వేగ తరుణి! ర”మ్మనుచుఁ
“గంటివే బసవయ్యఁ గమలాయతాక్షి!” - “గంటినే మోక్షంబుఁగంటిఁగా” కనుచుఁ
“జూచితే!పోదమాసుకుమారి!” యనుచుఁ-“జూచుచుండఁగఁబోవ సొగయునే” యనుచు
వచ్చువారును జూచువారును గట్ట - నిచ్చువారును జూచి యేఁగెడెవారుఁ
బొరిఁబొరిఁ దెచ్చి విభూతివీడ్యంబు - లరుదొంద బసవయ్య కర్పించువారు
నంగన ల్వివిధపుష్పాంజలు లిచ్చి - మంగళారతులెత్తి మహి మ్రొక్కువారు
“స్వస్తి దీర్ఘాయువు శంకర!” యనుచుఁ - బ్రస్తుతిదీవనల్ పచరించువారు
హృద్యంబుగా గీతగద్యపద్యములఁ - జోద్యతరంబుగా స్తుతియించువారు
వారివారిక కయివారముల్ సేయు వారును నలిరేఁగి తారాడువారుఁ
గలకలంబులకు డగ్గఱక హర్మ్యాగ్ర - తలములపై నుండి దర్శించువారు
నం దొకయెడ విముగ్దాంగన యచటి - సుందరులకు సన్న [15]సూపి యిట్లనియె
“పంబిన వివిధవాద్యంబులుఁ దమ్మ - టంబులు నిస్సహణంబులు సెలఁగ
నందంద “చాఁగు బళా”! యంచు నేఁగు - నందికోలలవారు ముందటిగములు
నెల్ల [16]వెల్లెల్లుల కెల్లయై పరగు - నల్లహయా[17]రూఢ మవ్వీరగణము
చక్కగా నీ వ్రేలిచక్కటినడుమఁ - బెక్కువిధంబులం దక్కజం బగుచు
వేడుకఁ గోలాట మాడెడువారుఁ - గూడలి త్రిపురాంతకుని [18]కొల్వువారు
గెడఁగూడి పసిఁడిగిర్గిటకేళికలను - గడు నొప్పు సొన్నలికపురంబువారుఁ
జేరువ నాడెడు పేరణివిధము - సౌరాష్ట్రనాయకుసంప్రదాయంబు
వేడుకఁ బ్రతిజోకలాడెడువారుఁ - గూడలి సంగయ్య [19]కొలువునర్తకులుఁ
బాడుచు నట విండ్లపై [20]గజ్జెపరువు - లాడెడువారు [21]రాయనికొల్వువారు
సంగతి నేఁగు తురంగ[22]సంఘముల - పింగల బిజ్జలు ముంగలనొప్పు
వర[23]గజారూఢులై యరుదెంచుచున్న - పరమమాహేశ్వరప్రకరంబునడుమ
శివభక్తజనులమీఁదివ దృష్టులుఁగాఁగ - సవినయసంభ్రమాసక్తి మ్రొక్కుచును
నలఘుసన్మణికలాపాంశులు ప్రజ్వ - రిలు మౌక్తికచ్ఛత్రములగమి [24]నీడ
నతమంత్రిజనశిరోనాయకరత్న - వితతిఁ గూడిన పదాన్వితనఖములను
నెలమిఁ దలిర్చు భద్రేభంబు నెక్కి - యలరారుచున్నట్టి యలమహామహునిఁ
[25]గారుణ్యమూర్తి విక్రమచక్రవర్తిఁ - జారునిర్మలకీర్తి సత్యప్రపూర్తి
గలియుగరుద్రు సత్కరుణాసముద్రు - విలసనభద్రు సద్వినయనిర్ణిద్రు
ధీరు సద్భక్తిశృంగారు నేకాంగ - వీరు నా బసవకుమారుఁ జూచితిరె”
అనవుడు నందఱుఁ గని యట్లుమ్రొక్క - వనితకు మఱియొక్క వనిత యిట్లనియె
“నలినాక్షి! యీతఁడే నందీశమూర్తి - పొలఁతి! యీతండె త్రిభువనపావనుఁడు
వనిత! యీతఁడె భాగ[26]వాడ మాదవ్వ - మను [27]నోమిపడసిన యనుఁగుఁబుత్త్రుండు
పడఁతి! యీతఁడె మనబలదేవమంత్రి - కడుఁ [28]గూర్చి యిచ్చిన కన్యకమగఁడు
సన్నుతాంగి! యితండె సంగయ్యదేవు - మొన్నఁబల్కించిన ముల్లోకనుతుఁడు
[29]మడఁది! యాతండె యిమ్మనుజేశుచేతఁ - గడునొప్పుమన్నన వడసినయతఁడు
కన్నులపండు వీ యన్నఁ జూచినను - బన్నుగా జిహ్వలపండువు వొగడ
నిట్టి ధన్యల మౌదుమే నేఁడు మనల - పుట్టువు సఫలతఁబొందె నెంతయును”
నని యిట్లు చెప్పుచునడుగుచు జనులు - వినుతింపఁగాఁ బురి [30]వెసఁ జొచ్చునెడను
జగతీతలేశుండు నగరోపకంఠ - మగడు నా బసవయ్య నర్థి దోడ్కొనుచుఁ
బరిమితభటమంత్రి పరివృతుం డగుచు - నరుదెంచి భవనాశ్ర[31]యాభ్యంతరమున
మున్నున్నమంత్రులు పన్నిద్ధ[32]ఱకును - [33]గన్నాకుగాఁ బెద్దగద్దియ నునిచి
వరవస్త్రభూషణోత్కరము లర్పించి - యరుదొంద బసవయ్య కాతఁ డిట్లనియె
“సకలసామ్రాజ్యపూజ్యస్థితికెల్లఁ - [34]బ్రకటింపఁగా నీవ పతివట్లుఁగాక
నా యర్థమునకుఁ బ్రాణమునకుఁ బతివి - వేయును నేల? నీవే [35]నేను బసవ!
నిన్ను నమ్మితి” నంచు నెయ్యమెలర్ప- మన్నన బిజ్జలక్ష్మాధీశుఁ డనిన
“సకలలోకైకరక్షకుఁడగు శివున - కొక నిన్ను [36]రక్షించుటకు నెంతవెద్ద
కావున మాలింగ దేవుభక్తులకు - [37]నేవేళ వెఱచుండు మింతెయె చాలు
నీ రాజ్య మేలించుటిది యెంతవెద్ద - నీరధి మేరగా నిన్ను నేలింతు”
నని యూఱడిల బసవనదండనాథుఁ - డనుకూలుఁడై పల్క నంత బిజ్జలుఁడు
మఱియుఁ గట్టఁగనిచ్చి మహనీయలీలఁ - గొఱలునెయ్యమున వీడ్కొలిపె; వీడ్కొలుప;
గా బసవఁడు భక్తగణములు దాను - నా బలదేవనాయకుని నగళ్లు
తనకు నిజాలయస్థానమై యుండఁ - దననియోగము గొల్వఁ దాఁ జనుదెంచి
లాలితలింగకేళీ[38]లసన్మతిని - లీలానుకూల [39]సచ్ఛీలసంపదల
ననుదినవర్ధమానైశ్వర్యుఁ డగుచు - జనపతిరాజ్యంబుఁ జక్కవెట్టుచును
దెసలెల్ల సత్కీర్తిఁ బసరించుచున్న - బసవనిపూనిక బాసయెట్లన్న
బసవేశ్వరుని బాస
శివరాత్రి నిత్యంబు చెల్లించు బాస - శివభక్తులెల్లను శివుఁడను బాస
భక్తుల యెగ్గులు పట్టని బాస - భక్తులకుల మెత్తిపలుకని బాస
మృడునైన నొకమఱి యడుగని బాస - యడిగిన యర్థంబు [40]గడపని బాస
చీమంతయైన వంచింపని బాస - యేమి వేఁడిన నడుగిడకిచ్చు బాస
తలఁపెట్టులట్టుల పలికెడు బాస - పలుకట్ల నడవడిఁ బాలించు బాస
పలికి బొంకనిబాస వొలివోని బాస - చలమెడపని బాస సలిపెడి బాస
తప్పఁ దొక్కనిబాస [41]దరలని బాస - యెప్పుడు భృత్యత్వ మెడపని బాస
కలనైన శివునకు గెలుపీని బాస - గెలుపు భక్తుల కిచ్చి కీడ్పడు బాస
పరసతిపై దృష్టి వఱపని బాస పరధనంబుల కాసపడకుండు బాస
పరనింద నెయ్యెడఁ బొరయని బాస - పరమర్మకర్మముల్ వలుకని బాస
పరసమయంబులఁ [42]బరిమార్చు బాస - పరవాదులను బట్టి భంజించు బాస
హరదూషణకుఁ జెవులానని బాస - హరగణానర్పితం బంటని బాస
హరగణపరతంత్రుఁడై యుండు బాస - హరభక్తు లెట్లన్న నట్లను బాస
జంగమంబును బ్రాణలింగ మన్బాస - వెంగలిమనుజుల వేఁడని బాస
భవికి మ్రొక్కనిబాస భవి కీనిబాస - భవబాధలకు నగపడకుండు బాస
విషయేంద్రియములకు వెన్నీని బాస - విషమషడ్వర్గంబు విరియించు బాస
వేదోక్తభక్తి సంపాదించు బాస - యాది శివాచార మలరించు బాస
శిరమట్టఁ [43]బాసిన శరణను బాస - శిరమున కట్టు [44]వాసిన మ్రొక్కు బాస
ముట్టినచో [45]వెన్క మెట్టనిబాస - యిట్టివన్నియుఁ దుదముట్టించు బాస
బసవనిచరితంబు బసవఁడే యెఱుఁగు - వసమె యెవ్వరికైన వాక్రువ్వఁదలఁప
[46]ధీరంబుకట్ట గంభీ[47]రంబుతిట్ట - సారార్థములప్రోక జ్ఞానాగ్ని కాఁక
ప్రతినలగుడ్డ విశ్రుతభక్తిగడ్డ - వ్రతములపంట వైరాగ్యంబువెంట
సత్యంబుకలను ప్రసాదంబుకొలను - కృత్యంబుతాఁప యకృత్యాబ్ధితేఁప
వేదాంతములపాటి విద్యలమేటి - నాదంబుక్రోలు సమ్మోదంబుకీలు
శాంతతనెలవు యీశ్వరుకట్టినలవు - దాంతతకలిమి నిత్యత్వంబు [48]బలిమి
వినయంబుతేట వివేకంబుకోట - యనురక్తి యిల్లు నుదాత్తత పెల్లు
తత్త్వంబుతీగ మహత్త్వంబుచేగ - సత్త్వంబు వెన్ను నాస్థానంబు చెన్ను
బసవేశ్వరుని దర్శింప శివభక్తు లరుదెంచుట
బసవఁడు కేవలభక్తుండె యనుచు - [49]వసిగొని లోకముల్ [50]వర్ణన సేయ
నొక్కొక్క నియమంబు నిక్కంబుగాఁగఁ - జక్కన దర్శింపఁ జనుదెంచువారు
చేకొన్నవ్రతములు చెల్లించు[51]వారు - ప్రాకటవ్రతబుద్ధిఁ బఱతెంచువారు
“ఖ్యాతుఁడో భక్తిసమేతుఁడో యరసి - చూతముగాక!” యంచును వచ్చువారు
“బసవనిచేఁ బూజ [52]వడయుద"మనుచు - నెసకంబు దళుకొత్త నేతెంచువారు
“నతనిఁజూచినఁ జాలు నభవునిభక్తి - యతిశయంబగు” నని యరుదెంచువారు
బసవతీర్థం బేఁగు [53]పరస యనంగఁ [54]బసిగొని యిలఁ గ్రిక్కిఱిసి వచ్చువారు
కరితురగాందో[55]ళవిరచితానేక - వరరథారూఢులై యరుదెంచువారు
[56]ప్రకటరుద్రాక్షసన్మకుటవర్ధనులు - సకలాంగభసితాది శాసనధరులు
విరచితవస్త్రోపవేష్టితమకుటు - లురుజటాజూటవిస్ఫురితశాసనులు
కక్షకరస్థలకంఠోత్తమాంగ - వక్షస్థ్సలా[57]దికవరలింగధరులు
నుతసంయమీశ్వరు లతులవ్రతస్థు - లతి[58]శీలు రితరపాకాదివర్జితులు
సంభావితులు భవిజనసమాదరణ - సంభాషణాదిసంసర్గవర్జితులు
పరశివధ్యానైకపరతంత్రమతులు - నిరవధిలింగైక్యనిష్ఠితేంద్రియులు
స్వచ్ఛలింగానుభవేచ్ఛాత్మసుఖులు - ప్రచ్ఛన్నలాంఛను ల్ప్రకటలాంఛనులు
నటకులు గాయకుల్ నవరసాత్మకులు - పటుకళావేదులు బహుశాస్త్రమతులు
వాదులు దార్కికుల్ వరకవుల్ దత్త్వ - వేదులు వేదార్థవాదులాదిగను
నెడనెడ నిబ్బంగిఁ గెడఁగూడి నడవఁ - బుడమి యొక్కట నొడ్డగెడవయ్యె ననఁగ
ఖండేందుధరుభక్తగణము లిబ్బంగిఁ - దండతండంబులు దారేఁగుదేర
విలసితమృగమదకలితమార్గముల - వెలుఁగుముక్తాఫలంబులమ్రుగ్గు లమర
ముకురపల్లవమణిముక్తాఫలాది - మకరతోరణముల నికరంబు లలర
ఖ్యాతిగా వృషభసమేతమై యొప్పు - కేతనానీకముల్ గ్రిక్కిఱియంగ
నాతతవ్యాసహస్తాకృతి నున్న - వాత[59]పూరణములు వడిఁ గ్రాలియాడ
నుడువీథిఁ గప్పి సమున్నతలీల - నడపందిరులు వెలి [60]గొడుగులుఁ దనరఁ
దతవితతాదివాద్యంబులు మ్రోయ - నతిశయంబుగ విన్కు లంతంత నమరఁ
బాయక “చాఁగుబళా!" యనుశబ్ద - మాయతి [61]నాకసమంది ఘూర్ణిల్లఁ
బ్రతిదినంబును భక్త బండారిబసవఁ - డతిభక్తిరతి మతి నంకురింపఁగను
శాశ్వతఘనలింగసంపద మెఱిసి - యీశ్వరభక్తుల [62]ని ట్లెదుర్కొనుచు
బసవేశ్వరుని శివాచారనిరతి
మంగళహర్షోదితాంగవిక్రియల - సంగతి నాత్మ నుప్పొంగి యుప్పొంగి
భయభక్తియుక్తిఁ [63]దద్భక్తాంఘ్రిచయము - పయిఁ జక్కఁజాఁగిలఁబడిమ్రొక్కి మ్రొక్కి
పటుతరసద్భక్తపాదాబ్జరేణు - పటలపర్యంకంబు పైఁ బొర్లి పొర్లి
హరభక్తనికరదయామృతవృష్టి - పరిగొని కురియఁ [64]దొప్పఁగఁ దోఁగి తోఁగి
యొడయలదివ్యపాదోదకవార్ధి - నడునీటఁ గడువేడ్కఁ బడి తేలి తేలి
వరభక్తసందోహపరితోషితార్థ - పరమసపర్యసంపద వ్రాలి వ్రాలి
మతిలింగజంగమోచితపరతత్త్వ - సతతశివార్చనారతి సోలి సోలి
శరణనిర్మలనిత్యసత్యప్రసాద - వరసేవనక్రీడ వడిఁ గ్రాలి క్రాలి
చారువచోవిలాసంబులఁ దనర - నో[65]రార వారి సన్నుతి సేసి చేసి
వారి మనోలత వడిఁజుట్టిచుట్టి - సారగాంధర్వరసముఁ గ్రోలి క్రోలి
దరహసితాస్య విస్ఫురణయుఁ దనర - హరగణాస్థానంబునం దాడి యాడి
[66]నిక్కంపు [67]భక్తికి నిక్కయై తన్నుఁ - దక్కి [68]యెంతయు భక్తిఁదాఁ జొక్కి చొక్కి
యనవరతము నీప్సితార్థుల కర్థిఁ - దనుమనోధనము [69]లప్పన సేసి చేసి
యందంద పరమతత్త్వానుభవార్థు - లందత్త్వసౌఖ్యజలధి ముంచి ముంచి
ప్రవిమలభక్తి సంపత్సుఖార్థులను - బ్రవిమలభక్తిసంపదఁ దేల్చి తేల్చి
యారంగఁ గామసుఖాపేక్షితులను - శ్రీ(స్త్రీ?)రత్నరాజిఁ బూజించి పూజించి
వరరత్నభూషణోత్కరధనార్థులను - వరవస్త్రభూషణావళిఁ దన్పి తన్పి
రాజవదుపచారపూజనార్థులను - రాజవదుపచారరతిఁ గొల్చి కొల్చి
యష్టాంగభక్తి క్రియాసుఖార్థులను - నష్టాంగభక్తిక్రియలఁ బూన్చి పూన్చి
శీలసంబంధుల శీలంబు లెఱిఁగి - శీలసంబంధ సుస్థితి నుంచి యుంచి
నియమవ్రతాధికనిష్ఠితాత్మకులఁ - బ్రియవస్తుసమితి నర్చించి యర్చించి
బసవఁ డీక్రమమున భక్తిసామ్రాజ్య - మెసకంబుతోఁ జేయునెడ లసత్ప్రీతి
“ముప్పూఁట నోగిరంబులుఁ బదార్థములుఁ - దప్పక కావళ్ల నెప్పుడుఁ బంప
వెండి వేశ్యలయిండ్ల నుండి భోగించు - మిండజంగములు పండ్రెండువే లనిన
నున్న జంగమసంఖ్య [70]మున్ను రూపించి - యెన్నంగ శక్యమే యీశునకైన”
ననుచు భక్తానీక మచ్చెరువంద - ననయంబు భూతిశాసనులాదిగాఁగ
నెల్లభక్తావళి కీప్సితార్థములు - సెల్లించుచును భక్తి సేయుచున్నెడను;
బసవని మేనల్లుఁడు చెన్నబసవని మహిమ
బరమేశుభక్తియ ప్రాణమై పరగు - తరుణి యా నాగాంబవరతనూభవుఁడు
ప్రస్తుతింపఁగ [71]నొప్పుబసవకారుణ్య - హస్తసంభూతప్రశస్తదేహుండు
నసదృశభక్తియోగాత్ముండు చెన్న - బసవండు గురుభక్తిపాత్రోత్తముండు
సర్వాంగలింగి సంసారనిస్సంగి - గర్వాపహారి వ్రాక్తనశివాచారి
సారగుణాన్వేషి సరససంభూషి - కారుణ్యరాశి లింగమనఃప్రవేశి
యగణితసుఖశీలి యతిదయాశాలి - నిగమార్ధసంవేది నిచితప్రమోది
విరహితోభయకర్మి వరలింగధర్మి - యరివర్గసంహారి యాత్మోపకారి
లింగాభిమాని యభంగురజ్ఞాని - సాంగత్యసువిధాని సతతావధాని
పరమానురాగి సద్భక్తిసంభోగి - విరసభవత్యాగి విమలాత్మయోగి
సత్యసల్లాపి ప్రసన్నస్వరూపి - నిత్యప్రతాపి వినిర్గతపాపి
యీశ్వరమూర్తి యతీంద్రియవర్తి - శాశ్వతకీర్తి ప్రసాదప్రపూర్తి
యనఁగ నిట్లొప్పారి యతులితమహిమ - ననుదినవర్ధమానాంగుఁడై [72]యుండ
“బసవని శ్రీపాదబిసరుహంబులకు - నసలార నిత్యంబు నర్చ లిచ్చుచును
మించినభక్తిమై మేనరోమాంచ - కంచుకం బధికసమంచితంబుగను
గద్గదకంఠుఁడై కనుఁగవ సుఖస - ముద్గతాశ్రువు లొల్క నుత్సుకలీల
సప్రాణలింగలింగప్రాణమథన - సుప్రసన్నానుభవప్రాప్తిఁ బొంది
నలిగొనమర్కటన్యాయంబునందు - ఫలమునఁ బొంది సోపానంబులు డిగి
వెసఁ బొందఁగలుగువాయసఫలన్యాయ - మసలారఁగాఁ జరితార్థతఁ [73]బొంది
గురుభక్తి[74]ఫలసారగుహ్యప్రసాద - వరసేవనాసుఖపరవశలీలఁ
గమనీయ మొంద లింగంబు ప్రాణంబు - రమణఁ బ్రసాదపూరంబు దేహంబు
దిరమగు శుద్ధభక్తియు మానసంబు - హరగణానుభవసౌఖ్యంబు ధనంబు
నిటు గూడ నన్నియు నేకమై కాదె - పటుతరంబుగఁ జెన్నబసవఁడై [75]పేర్చె
భవ్యలింగమున కేర్పడఁ బ్రాణమగుచు - నవ్యప్రసాదంబునకు రుచి యగుచు
జంగమభక్తి కాశ్రయపదం బగుచు - మంగళప్రాప్తికి మందిరం బగుచు
గుఱిగాక వాజ్మనోగోచరం బగుచు - వఱలెడు శివతత్త్వ[76]వల్లభు మహిమ
బిలిబిలి తలఁపులవలన వర్తిల్లి - మొలచిన తమతమ కొలఁది మాటలను
వినుతించుటెల్లను వెలితియ కాదె - పనుగొన నా చెన్నబసవన్న నెలవు
కావున బసవండె గణుతింప నెఱుఁగు - భావింప నా చెన్న బసవన్న మహిమ
బసవనిమహిమయు భాతిగాఁ జెన్న - బసవండె యెఱుఁగు బెంపెసఁగఁ గీర్తింప”
నంచు భక్తానీక మచ్చెరువంద - నంచితభక్తిసమగ్రత మెఱసి
చెన్నబసవన బసవేశ్వరుని స్తుతించుట
“శాశ్వత! సర్వజ్ఞ! శశ్వద్గుణాంక! - విశ్వేశ శ్రీ గురవే నమో” యనుచు
“సద్యఃప్రసన్నానవద్యవేదాంత - వేద్యాత్త! శ్రీ గురవే నమో” యనుచు
“దత్తకైవల్య! యుదాత్తసద్భక్తి - విత్తేశ! శ్రీ గురవే నమో” యనుచు
“నమిత పరంజ్యోతి రాకారదివ్య - విమలాంగ! శ్రీ గురవే నమో” యనుచు
“స్థిరతరసృష్టిస్థితిలయప్రపంచ - విరహిత! శ్రీగురవే నమో” యనుచు
“సకళ నిష్కళ చరాచరరూపవిగత - [77]వికృతాంగ! శ్రీ గురవేనమో” యనుచు
“నాద్యంతరహితనిత్యామలతేజ! - విద్యాత్మ! శ్రీగురవే నమో” యనుచు
“నధ్వషట్కాతీత! యతిపాతకౌఘ - విధ్వంస! శ్రీగురవే నమో” యనుచు
“మోక్షా[78]ర్థిరక్షణదక్షకటాక్ష - వీక్షణ! శ్రీగురవే నమో” యనుచు
“నజ్ఞానతిమిరసంహారార్థ[79]దత్త - విజ్ఞాన!శ్రీ గురవే నమో” యనుచు
“ధన్యాత్మశిష్యమస్తకకృపాహస్త - విన్యాస! శ్రీ గురవే నమో” యనుచు
“నఘహరణార్థశిష్యజనోపభుక్త - విఘనస! శ్రీగురవే నమో” యనుచు
“నశ్రాంతభక్త జనాత్మాంబుజాత - విశ్రాంత! శ్రీగురవే నమో” యనుచు
“ననఘ గురుప్రసాదామృతహృదయ - వినివాస ! శ్రీగురవే నమో” యనుచు
భ్రాజిల్ల నా చెన్నబసవఁ డబ్బసవ - రాజును దనగురుఁ బ్రస్తుతి సేయ
అల్లమప్రభుని రాక
నంత నల్లమప్రభువను సంయమీశుఁ - డంతకాంతకమూర్తి యతులితకీర్తి
నిర్మూలితోద్రిక్తదుర్మలుఁ డుభయ - కర్మనికృంతనకర్మకర్మఠుఁడు
వైరాగ్యసంసారవర్జితాత్మకుఁడు - దూరదృష్టాదృష్టచారుచర్యుండు
దానప్రతిగ్రహహీనవర్తనుఁడు - మానావమానసమానకీర్తనుఁడు
సమలోష్టకాంచన సమసుఖదుఃఖ - సమమిత్ర శాత్రవ సద్భావనుండు
సప్తధాతుమదాదిసర్వాంగగుణవి - లుప్తచిత్తుండు సంసుప్తిదూరుండు
కాలసంకల్పవికల్ప మహేంద్ర - జాలప్రపంచనిర్మూలనశాలి
పరమశివానందపరవశీభూతుఁ - డురుముక్తకేశయుతోత్తమాంగుండు
దివ్యానిమిషసుధాదృష్టి[80]గోచరుఁడు - భవ్యుండు గాంధర్వపండితోత్తముడు
ఆంతరయాగనిరంతరయోగ - వంతుఁ డనంతవేదాంతవేద్యుండు
నిశ్శరీరి శరీరి నిర్నామి నామి - నిశ్శబ్ది శబ్ది వినిర్భావి భావి
ద్వైతయోగక్రియాద్వైతయోగక్రి - యాతీతయోగక్రియాన్వీతుఁ డనఁగ
ముల్లోకములఁ దేటతెల్లయై భక్తి - కెల్లయై స్వేచ్ఛావిహీనకృత్యమున
లీలఁ గరస్థలలింగవిన్యస్త - లోలేక్షణానందకేళిఁ దన్మఱచి
యిది యేఱు వల్లంబు నిది సెట్టు గట్టు - నిది దెరు వడవి యన్నది దలంపుడిగి
యరుదేర నన్నియు నంతంతఁ దొలఁగి - తెరువిచ్చుటకు నరు లరుదని పొగడ
బసవని యసమవిభ్రాజితభక్తి - రసవార్ధి వెల్లివిరిసి నిట్టవొడువ
వచ్చెఁ దద్వీచిప్రవర్తితం బగుచు - వచ్చువహిత్రంబువడువు[81]ను బోలె;
నిచ్చ రత్నపరీక్ష యెఱిఁగి చేపట్టు - బచ్చునుబోలె నబ్బసవయ్య ప్రభువు
భావంబు సంగయదేవునియంద - భావనఁ బొరయుడు భక్తిమై మ్రొక్క
రుచిరరత్నప్రభానిచితమై యున్న - యచలితస్వర్ణసింహాసనం బెక్కి
ప్రభువున్న; నంగప్రభాపటలంబు - లభినుతిఁ బొందె దిశాంతరాళముల
నొడల జీవము గల్గియును లేనివాని - నడగల్గియును వర్తనము లేనివానిఁ
గన్నులు [82]వ్రేఁగులుగాఁ గలవాని - మున్ను లింగమ ప్రాణముగ నున్నవానిఁ
జేతనుండయ్యు నిశ్చేష్టలవాని - ఖ్యాతి లేకయు నుతిఁ గడచన్నవాని
బలుకుల మీఱినబాసలవానిఁ - దలఁపులదాఁటిన తత్త్వంబువాని
గుణహీనుఁ డయ్యును గుణమిచ్చువాని - బ్రణవాత్ముఁ డయ్యు నేర్పడియుండువానిఁ
గని శరణనుచు గద్గదకంఠుఁడగుచుఁ - గనుఁగవ హర్షాశ్రుకణములు దొరుగ
బసవఁ డల్లంతటఁ బ్రణమితుం డగుచుఁ - నసలార సముచితాభ్యర్చితుఁ జేసి
లింగతూర్యములు సెలంగ నుప్పొంగి - మంగళారతులెత్తె మహిఁ దత్క్షణంబ
అల్లమప్రభునికి విందువెట్టుట
పల్లెరం బిడి పంచభక్ష్యాన్నములును - నెల్లపదార్థముల్ దెల్లంబు గాఁగ
వడ్డించి యబ్బసవండర్థి దొడ్డ - దొడ్డకళ్లుగఁ జేసి తొడిఁ [83]దొడిఁబట్టి
హరునకుఁ దొల్లి యా సురియచౌడరసు - కరమర్థి [84]నందిచ్చు కరణియుఁబోలె
[85]నందిచ్చుచుండంగ నర్థిఁ జేసేత - నందికొంచును బ్రభు వారగింపంగ
బంబి లక్షయు నెను(c?) బదివేలు జంగ - మంబులకనుచు సమగ్రత దనర
నటమున్న చేసినయప్పదార్థంబు - లిటుగూడ సమయుడు [86]నెట్లొకో యనక
యేనకాకోగిరం బింక నీ కనుచుఁ - బూని యూఁకింపఁ బ్రభువు మెచ్చి యంతఁ
“గో”యని భక్తనికాయంబు వొగడ - "హో”యని సత్కృపాయుక్తి వొల్పార
“బాపురే! బసవ! సద్భక్తసంత్రాణ! - బాపురే! బసవ! సద్భక్తిధురీణ!
నల్లవో! బసవ! యనశ్వరకీర్తి! - నల్లవో! బసవన్న! నందీశమూర్తి!
అమృతంబునందు దివ్యంబగుచేగ - విమలమాణిక్యగర్భమున దీపంబు
చెఱకునఁ బండు పసిఁడిఁగమ్మఁదనము - గొఱయైన మలయజ కుజమునబూవు
చిత్తరువునకును జీవంబుఁ బసిఁడి - పుత్తళికిని బ్రాణమును నిక్కువముగఁ
బుట్టినయట్టు[87]గాఁ బుట్టితి కొడుక! - నెట్టణ భక్తికి నిలుకడ యగుచు
నాదుబసవ! దండనాయకబసవ! - యాదిబసవ! యసంఖ్యాతులబసవ!
భక్తులబసవ! యా ప్రమథులబసవ! - ముక్తీశుబసవ! నా ముద్దులబసవ!
సంగన బసవ! ప్రసాదంబు బసవ! - జంగమంబు బసవ! సత్యంబు బసవ!
పండితబసవ! సత్పాత్రంబు బసవ! - బండారిబసవ! సౌభాగ్యంబు బసవ!
తత్త్వంబు బసవ! మహత్త్వంబు బసవ! - సత్యంబు బసవ! నిత్యత్వంబు బసవ!
[88]వృషభంబు బసవ! సంవిజ్జ్యోతి బసవ! - విషకంఠు బసవ! వివేకంబు బసవ!
తజ్జ్ఞులబసవ! తత్త్వజ్ఞులబసవ! - ప్రాజ్ఞులబసవ! సర్వజ్ఞులబసవ!
సిద్ధులబసవ! ప్రసిద్ధులబసవ! - శుద్ధులబసవ! ప్రబుద్ధులబసవ!
బసవయ్య! బసవన్న! బసవకుమార - బసవ! బసవరాజ! బసవలింగంబ
వడిఁ బాఱుజలమున కొడలెల్లఁగాళ్లు - వడిఁ గాలుచిచ్చున కొడలెల్ల నోళ్లు
వడి వీచుగాడ్పున కొడలెల్లఁదలలు - వడిఁ జేయు [89]బసవన కొడలెల్ల భక్తి
'బసవా' యనఁగ విన్నఁ [90]బానలొండేల? - పసులకునైనను ప్రబలదే భక్తి?
“బసవా” యనఁగ విన్నఁ [91]బానలొండేల? - [92]పసిబా[93]లురకునైన నెసఁగదే భక్తి?
“బసవా” యనఁగ విన్నఁ బానలొండేల? - యసమాక్షునకునైన నలరదే భక్తి?
“బసవా” యనెడి భక్తిపరులఁ జూచినను - [94]నెసఁగుపక్షులకైన నింపదే భక్తి?
“బసవా” యనెడు భక్తిపరులచేరువను - మసలు జంతువులకు నెసఁగదే భక్తి?
“బసవా” యనినఁ జాలుఁ [95]బానలొండేల? - ననలార విషమైన నమృతంబు గాదె?
“బసవా” యనినఁ జాలుఁ [96]బానలొండేల - పసిగ మైఁగులిశంబు గుసుమంబు గాదె?
“బసవా” యనినఁ జాలుఁ [97]బానలొండేల? - వసుధ శత్రులు మిత్రవర్గంబు గాదె?
“బసవా” యనినఁ జాలుఁ [98]బానలొండేల? - వెసఁగాలు కార్చిచ్చు వెన్నెల గాదె?
లింగైక్యసౌఖ్యకేళీలోల [99]భక్తి - జంగమప్రాణాను[100]సంధానశక్తి
యుభయప్రసాదసంయోగోపభుక్తి - త్రిభువనంబుల నున్నదే యితరులకు”
నని పెక్కుభంగుల నగ్గింపుచుండ - [101]ననుషక్తి నా బసవనకుమారుండు
మిక్కిలిసద్భక్తి మిక్కుటంబుగను - మ్రొక్కుచు నందంద మోడ్పుఁగేలమర
“భక్తవత్సల! [102]పరాపర! పరమాత్మ! - ముక్తివల్లభ! [103]దివ్యమూర్తి! సర్వజ్ఞ!
ప్రభువ! జంగమలింగ! ప్రమథాగ్రగణ్య! - ప్రభువ! సంగయదేవ! పరమానురాగ!
కారుణ్య నిధి! సమగ్రత సూపి నీకు - నారగింపఁగ [104]బెట్టునంత భక్తుఁడనె?
పార్వతి ప్రమథులకు విందువెట్టు కథ
కైలాసమునఁ దొల్లి గఱకంఠుఁ గొలువ - శైలేంద్రకన్యక సనుదెంచునెడను
మారారి యట్ల ప్రమథవర్గమెల్ల - నారంగ సారూప్యధారులై యున్నఁ
బరమేశుఁడెవ్వఁడో ప్రమథు లందెవరొ? - యరుదెంచి యెఱుఁగలేకంబిక నిలువఁ
బార్వతీసందేహభావన యెఱిఁగి - పార్వతీశుఁడు దక్కఁబ్రమథు లక్షణమ
తమతమ తొంటిరూపములు వోవిడిచి - రమణ నొండొండురూపములు వొల్పార
గోమేషవానరకుక్కుటముఖులు - సామజశరభోష్ట్ర శార్దూలముఖులు
మహిషాశ్వసారంగమార్జాలముఖులు - నహికేసరివరాహవిహగాదిముఖులు
ద్విముఖచతుర్ముఖత్రిముఖికముఖులు - నముఖపంచముఖసహస్రాదిముఖులు
లంబోష్ఠలంబాక్షలంబనాసికులు - లంబోదరులు నతిలంబకర్ణులును
గజకర్ణు లజకర్ణు లజితకర్ణులును - విజయఘంటాకర్ణ వీరకర్ణులును
బాహూరుముఖులును బాహూరుతనులు - బాహూరుపాదులు బాహువక్త్రులును
బహుబాహుబహుపాదబహుతాలుజిహ్వ- బహువర్ణబహుకర్ణబహురూపధరులు
నై యున్న ప్రమథగణానేకకోట్ల - నాయంబ గని యద్భుతాక్రాంత యగుచు
నతులితనిజసహజాకృతి నున్న - పతికి మ్రొక్కుచును సంస్తుతిపూర్వకముగ
“విను ప్రమథాధీశ! వీరలందఱును- దన మనోధర్మంబు దారిట్లెఱింగి
కామరూపంబు [105]సక్కఁగఁ దాల్చి రొప్ప - నీమహా[106]గణములకెల్ల నీక్షణమ
పెట్టుదు విందు సంప్రీతిమై భక్తి - పుట్టెడు నంచు విభూతు లిప్పించి
యరిగి మహాకాశ మనియెడిబయలఁ - బరగఁ దత్త్వములను పందిరుల్ వెట్టి
యవికలాజాండంబు లనుభాండములను - వివిధపక్వాన్నాదివితతులు గూర్చి
భవ్యకల్పద్రుమఫలపల్లవములు - దివ్యామృతంబునఁ దివుటఁ దాలించి
క్షీరేక్షురసదధిఘృతవార్ధికోట్ల - క్షీరేక్షురసదధిఘృతములు నినిచి
యకలంకరసరసాయనములు గూర్చి - సకలదీర్ఘికల వాసన చేసి [107]కలపి
మఱియుఁ జింతామణిమందిరభిత్తిఁ - దఱిఁదఱిఁ బదపదార్థములు సిత్రించి
సురభిసహస్రసుస్థిరజన్మదేశ - వరదివ్యలోచన వలయువస్తువులు
వెండియు సమకూర్చుచుండంగఁ బ్రమథ - మండలి ప్రమథ[108]కుమారు నొక్కరుని
“యరయుమా యవసరం బయ్యెనొ కాదొ? - గిరిజాలయంబున కరిగి నీ” వనుడు
“నవుఁగాక” యని వచ్చి యంబికఁగాంచి - “యవసరంబే”[109]యని యడుగఁగఁ దడవ;
“ప్రమథుల నిట్టున్నభంగిఁ దోడ్తెమ్ము - ప్రమథకుమార! వేపరువు[110]న” ననుడు
“నొక్కింత [111]వెట్టిన నొగి నారగించి - గ్రక్కునఁ దోడ్తెత్తు గణములనెల్ల
నరుగంగఁ జాల నిట్లాఁకొని” యనుడు - సరసర లింగావసరముఁ జెల్లించి
సొంపార గిరిజ వడ్డింప వడ్డింపఁ - బొంపిరి నోగిరంబులు పదార్థములు
కులపర్వతంబులంతలు గళ్లు సేసి - నలినారగింపంగఁ గలపదార్థములు
నోగిరంబులు సమయుడు వెఱఁగంది - యాగౌరి యత్యద్భుతాక్రాంత యగుచు
“నెన్నంగఁ బ్రమధులకెల్లఁ గావించి - యున్న పదార్థంబు లోగిరంబులును
మానుగాఁ బ్రమథకుమారుఁడొక్కరుఁడ - తా నారగించెఁ జిత్రము సిత్ర! మింక
నేమి సేయుదు” [112]నంచు నీశ్వరుకడకు - హైమవతీదేవి యరుదెంచి మ్రొక్కి
తలవాంచియున్నెడ దరహాసదీప్తి - [113]వెలయంగఁ బ్రమథుల వినుతిసేయుచును
“గౌరి! యిం దొకసిట్టిగణ మిట్టివాఁడు - తోరం[114]బు గణములగౌరవం బెట్టు
లవు "నసంఖ్యాతాస్సహస్రాణి” యనుచు - భువి"సేవ మేతన్నిబోధ[115]త” యనుచుఁ
దొడఁగి వేదములు సంస్తుతిసేయఁబోయి - [116]నడుఁకుచు [117]వడవడ వడఁకెడినేఁడుఁ
గావున ప్రమథు లక్షయు లనపాయు - లావిర్భవన్మహిమాఢ్యు లద్విజులు
నవ్యయు లనుపము లమరు లక్షరులు - దివ్యులు భవ్యులు ద్రిభువనస్తుతులు
సుభగులు సుగుణులు సుమతులు శూరు - లభవు లప్రతిము లత్యానందయుతులు
వేదాంతవేద్యులు విశ్వైకనుతులు - నాదికారణు లణిమాదిసద్గుణులు
లింగాంశు లయ్యాదిలింగసంభవులు - లింగమూర్తులు మహాలింగైకతనులు
లింగాశ్రయులు వ్రాణలింగసంగతులు - లింగసదర్థులు లింగానుభవులు
లింగగంభీరులు లింగకారణులు - లింగవ్రతస్థులు లింగచేతనులు
లింగవినోదులు లింగసంచయులు - లింగావధానులు లింగాత్మసుఖులు
లింగాభిమానులు లింగశాసనులు - లింగసత్ ప్రాణులు లింగతత్పరులు
సర్వశుభోదయుల్ సర్వాధిపతులు - సర్వసంపూర్ణులు సర్వకారణులు
[118]వేయేమి? ప్రమథుల కాయంబు మాకుఁ - గాయంబు గాకొండుగాయంబు గలదె?
ఇందొక్క ప్రమథునియిచ్చ నజాండ - సందోహములు సెడు జనియించు నిలుచు
నదిగాక హరివిరించాది దేవతలఁ - గుదియింతురనుటెల్ల నిది యెంతవెద్ద
తప్పకిందొక్కఁడు ఱెప్పవెట్టుడును - నప్పుడ సర్వసంహార మౌ[119]ననినఁ
గావున వర్ణింపఁగా నగోచరము - భావించి చూడ మా ప్రమథులమహిమ”
యంచుఁ బ్రశంసింప నంబికాదేవి - సంచితమానసాశ్చర్యయై యుండె;
నట్టిపార్వతియు మున్నారగింపంగఁ - బెట్టఁజాలదు విందు విన్నపాపనికి
దేవ! దేవస్తుత్య! దివ్యలింగాంగ - భావనాతీత! సద్భావసన్నిహిత!
శంకర! [120]దురితభయంకర! శౌరి - పంకజ ప్రభవాదికింకరోల్లసిత!
శుభకర! చిన్మయ! జ్యోతిస్స్వరూప! - ప్రభువ! [121]పరాపర! భక్తవత్సలుఁడ
సర్వకల్యాణ! సంసారవిదూర! - సర్వజ్ఞ! జియ్య! సాక్షాత్సంగమేశ!
నెట్టణ నిష్ఠించి నీకారగింపఁ - బెట్ట నాశక్యమే? పృథుదయా[122]భావ!
అల్లమప్రభువు బసవనికి వరములిచ్చుట
యనుచుఁ బ్రశంసింప [123]నల్లమ మెచ్చి - వినుతదయామృతవనధి నోలార్చి
“సురభి చింతామణి సురభూరుహములు - వర(రు?)వులై యుండంగ వర మీగి యెంత
వెద్ద నా” కనుచు సంప్రీతి సిత్తమునఁ - దద్ద సంధిలఁ బ్రసాదము గృప సేసి
తలఁచిన [124]పదపదార్థములు సేకూడ - వలె నన్న వస్తువు లిలఁ [125]దాన పొందఁ
బలికినబాసయుఁ బాటియై తనర - నిలిచినమార్గంబు నిలుకడ గాఁగఁ
బట్టినపదడైనఁ బసిఁడియై వెలుఁగ - ముట్టినబయలైన మూర్తి సేకొనఁగఁ
దెఱలినశివునైన వెఱవక గెలువఁ - దఱిమినజంగమధట్టున కోర్వఁ
జాలు నక్షయలింగసంపద లిచ్చి - లీలఁ దత్త్యార్థసమ్మేళనం బొలయ
మోహమాయాదితమోరాశిఁ ద్రుంచి - దేహేంద్రియాదివిద్వేషం బడంచి
మున్ను దత్త్వస్థితిఁ దన్నుఁ దా నెఱిఁగి - తన్నును సత్క్రియోదాత్తతఁ గూర్చి
లీనమై ప్రాణంబు లింగమం దొలయఁ - గా నాథుఁ డాప్రాణలీనమై యుండఁ
గా నిరంతరపరమానందసుఖము - నూనిన శివభక్తియుక్తిమార్గమున
వడి “దివారాత్రౌచ వర్జయే” త్తనఁగఁ - బడుసదాంతర్యోగభాతి గైకొలిపి
ఘనబహిరంగశృంగారాంతరంగ - వినుతప్ర[126]మథనసంవిత్సుఖలీల
దివ్యానుభవవార్ధిఁ దేల్ప నబ్బసవఁ - డవ్యయశివతత్త్వ మనువు నెఱిఁగి
యుప్పు [127]ముల్లియ నీర నుంచినయట్లు - గప్పురంబున నగ్గిఁ గప్పినయట్లు
వడగళ్లవర్షంబు వారాశిఁ గురియు - వడుపునఁ దా లేక వర్తింపుచుండెఁ
బ్రభువుచరిత్రంబు భక్తిమై భక్త - సభలందుఁ జదివిన సంప్రీతి విన్న
సరససమంచితసచ్చిదానంద - సురుచిరలింగైక్యసుఖము [128]వట్రిల్లు
వంగకాయలు లింగములైన కథ
వెండియు నొకనాఁడు దండనాయకుఁ డ - ఖండితభక్తివికస్వరలీల
జంగమార్చన సేయుసమయంబునందు - దొంగలు బందివెట్టంగ నూహించి
లింగవంతులు గాని [129]లెంగుల కతని - యంగణాంతరమున కరుగరాదనుచు
వంగకాయలు గట్టుకొంగులఁ బొదివి - లింగసన్నిహితుల భంగి వట్రిల్లఁ
జనుదెంచి యా బసవనదండనాథుఁ - గని భయంపడి మ్రొక్కఁ గన్నుల నవ్వి
“లింగవంతులుగాని లెంగుల కీశ్వ - రాంగణంబున కెట్టు లరుదేరవచ్చు
నింక భక్తుల కాక యీశ్వరార్చనలు - కొంకక చేయుఁడు గూర్చుండుఁ” డనిన
నుల్లముల్ గలఁగ నొండొరులఁ జూచుచును - జల్లన గుండె [130]దిగుల్లన [131]నవయ
భావించి “మన [132]మెట్టు బందిఁ జిక్కితిమి - దేవర గలిగెనా చావు దప్పెడిని
మన కింక నెమ్మెయి [133]మగిడిపోఁ బోల” - దని కృతనిశ్చయులై కూరుచుండి
సరసర మును లింగసహితులపోలెఁ - గరములు [134]సాఁచుడుఁ గట్టుకొంగులను
భంగి నా బసవయ్య భావసంగతిని వంగకాయలు వ్రాణలింగంబు లయ్యె
బల్లేశుమల్లయ్య కథ
అట్టిద కాదె మున్వ్యవహార మేఁగి - నట్టిచో లింగాలయంబు లేకున్న
“సంతతలింగ[135]సంస్పర్శననియమ - మంతరించినఁ జచ్చునటె సెట్టి” యనుచు
గుంచితమతిఁ బూరిగుడి [136]వన్ని యచటఁ - గుంచంబుఁ గొండగోఁగులఁ బూజసేసి
“కఱకంఠుగుడి యిదెకంటి మే” మనుచుఁ - [137]బెఱికసెట్లాతనిఁ బిలిచి చూపుడును
నాయతభక్తి “శివాయ నమోన - మో” యని యందంద మ్రొక్కి ముమ్మారు
వలగొని యింటికి వచ్చి కుడ్చుడును - “నిల లింగ మనుచు నిహీ! మల్లభావ
గుంచంబునకు మ్రొక్కి కుడిచెఁ [138]బొట్టారఁ - గుంచంబుఁ గొనిరండు [139]గొలువఁగవలయు
నాఁకటి కక్కఱకైనదె వేల్పు - వేఁకువఁ గుంచంబు వెండియు వలయు”
ననుచు నా శివదేవు నపహసింపంగ - “వినఁ [140]గూడ”దని చేయి వీనులఁ జేర్చి
“చా! కుక్కలార! సాక్షాల్లింగమూర్తి - గాక కుంచమె? [141]యెఱుంగక మొఱం(ఱిం?)గెదురు
నమ్మరే రండు పినాకిఁ జూపెదను - గ్రమ్మన” నని యేఁగఁగాఁ దొంటియెడను
బ్రాకారమును ముఖభద్రమంటపము - శ్రీకరంబుగ స్వర్ణశిఖరంబు గుడియు
విరచితంబై యొప్పు వృషభేంద్రుఁడెదుర - నరయఁ గుంచము లింగ మయ్యె నతండు
నెల్లలోకముల[142]ను బల్లేశుదేవు - మల్లయ్యనా నొప్పె మఱి యట్లుఁగాక
కాటకోటని కథ
కాట[143]కోటఁడు నాఁగఁ గలఁ డొక్కగొల్లఁ- - డేట[144]పెంట్రుక దన కీశ్వరుం డనుచుఁ
బాలెల్లఁ బెంట్రుకపైఁ [145]బోయఁ దండ్రి - గేలి సేయుచువచ్చి కాలఁదన్నుడును
ఖ్యాతసద్భక్తిమైఁ గాటకోటండు - నాతని కలుగుచుఁ జేతిగొడ్డటను
[146]భూతలంబునఁ బడి పొరిఁబొరిడొల్ల - నేతరి వెనుకముందించుక లేక
తల దెగిపడ వ్రేసెఁ దా భవంబనెడు - పులితలఁ దెగవ్రేయుపొలుపు వట్రిల్ల
నిక్కడ నితఁడు దా నిట్లు వ్రేయుటయు - నక్కడఁ గైలాసహర్మ్యకవాట
జాలముల్ గూడ జర్జరితమై [147]పడియెఁ [148]గీలొకో! గొడ్డలి “గైలాసమునకుఁ
గడుఁజోద్య"మని నరుల్ [149]బుడిబుళ్లువోవ - నడరఁబెంట్రుక లింగ మయ్యె [150]నంతటను
బంబిన బావూరి బ్రహ్మయ్యభావ - నంబునఁ గాదె జొన్నలు లింగ మయ్యెఁ
గావున భక్తులభావంబు లింగ - దేవునకును జన్మదేశంబు [151]గాదె
బసవని భక్తిసౌభాగ్యప్రభాతి - యెసకంబు దలపోయ నిది యెంతవెద్ద?
చపలలు శివునిలాంఛనపరు లగుచు - నపవర్గకారణులై రదెట్లనిన:-
నేణాంకధరుభక్తి కెక్కు “ననాద - రేణ శాఠ్యేన” యన్ క్రియఁ దలపోయ
ననుచు భక్తానీక మచ్చెరువంద- నను[152]షక్తి మ్రుచ్చుల నబ్బసవయ్య
యచ్చులఁగాఁ జూచి యభిమతార్థంబు - లిచ్చి భక్తులఁ జేసె [153]నిజ్జగం బెఱుఁగ
జొన్నలు ముత్తెములైన కథ
మఱియును నొకజంగమం బేఁగుదెంచి - యఱిముఱి నభ్యంజనావసరమున
“[154]నిత్యనేమం బిది నేఁటి మ్రుగ్గునకు - ముత్యాలపొడి మాకు ముక్కుస వలయుఁ
గదలక మెదల కీక్షణమాత్రలోనఁ - బదివుట్ల ముత్యముల్ బసవ! యి”మ్మనిన
సరసర [155]లింగపసాయితశస్త్ర - కరతలుఁడై చూడఁ గనుదృష్టి నున్న
జొన్నల [156]ప్రో(C?)క విశుద్ధముక్తాఫ - లోన్నతరాశియై యున్న నవ్వుచును
“సన్నుత! పదివుట్ల సంఖ్య మీకేల? -యెన్ని మీ వలసిన వన్ని గైకొనుఁడు”
అనవుడు “నట్లకా”కనుచు ముత్యములు- గొనిపోయెఁ బెఱికలఁ [157]దనర నన్నియును.
మొఱటద వంకయ్య కథ
మొఱటద వంకయ్య మున్కొక్కనాఁడు - కఱ[158]కంఠభక్తుఁడొక్కరుఁ డర్ధరాత్రి
నరుదేరఁ బొడగని యడుగుల కెరఁగి- సరసోచితక్రియా[159]సంతుష్టుఁ జేయ;
“మాలింగమునకుఁ నేమమ్మొక్క మొదవు-పాలును మారేడుఁబత్తిరి వలయు,
నటుగాని యవసరం బలవడనేర; - [160]దిటసెల్లునో యని యేఁగుదెంచితిమి
ఎడసేయఁ [161]గా దింక నీక్షణంబునను- గడియింపకుండినఁ [162]గాదు గార్యంబు
హరభక్తు లూర లే రొరుల నే నడుగఁ- బొరుగూరి కీ[163]వేళఁ బోవంగరాదు
ఇంకనె” ట్లన నాత్మ నించుకేనియును- గొంకక వంకయ్య గొడ్డు నక్షణమ
కొనివచ్చి యొకవట్టికొఱట సంధించి- మనసిజహరభక్తమండలిఁ దలఁచి
“యీకొఱటన [164]పత్తిరీ గొడ్డునంద- ప్రాకటంబుగఁ బాలు వడయుదు” ననుచుఁ
గుండ వేగమ కడ్గికొనివచ్చి పిదుకఁ - గుండ నిండఁగఁ బాలు గురిసె నాగొడ్డు
కొఱటనె పత్రి యంకురితమై [165]పరిగె- వఱల నామొఱటద వంకయ్య గోసి
తెచ్చి యా భక్తున కిచ్చి నేమంబు - సెచ్చెరఁ జెల్లించెఁ జెప్పఁ జిత్రంబు
అనఁగ విందుము దొల్లి యాద్యోక్తులందుఁ- గనుఁగొంటి మిప్పు డీ కటకంబునందు
బసవని దృష్టిసంస్పర్శనంబునన - [166]యెసఁగు జొన్నలప్రో(c?)క యిందఱుఁ జూడఁ
బొనరుచు ముత్యాలప్రో(c?)కయై తనరె” - నని భక్తమండలి వినుతింపుచుండఁ
సంగమేశ్వరుఁడు బసవని మూఁడవకన్నడుగు కథ
జెచ్చెర మఱియు నీప్సితవస్తు[167]వితతి - నెచ్చుగా బసవఁ డిట్టిచ్చుటఁ జూచి
“వేడుకయ్యెడు నాకు వేఁడంగ” ననుచు - రూఢిగా జంగమరూపంబుఁ దాల్చి
చక్కన సంగమేశ్వరుఁడ యేతెంచి - గ్రక్కున మూఁడవక [168]న్నడ్గఁ దడవ
ఆయత లింగపసాయితహస్తుఁ - డై "యెఱుఁగనె నీదుమాయ నే” ననుచు
ముకురంబుఁ జూపుచు ముక్కన్ను నీకు - నకలంక! సహజంబ యదె చూడు” మనిన
నద్దంబులోన ఫాలాక్షంబుఁ గాంచి - యద్దేవదేవుండు దద్ద లజ్జించి
యప్పు డక్కడన నిరాకార మగుడుఁ - జప్పరింపుచుఁ జూచి “చా! పంద! పంద!
ఓడకు మోడకు మోరోరి! సంగ! - ఓడకు మోడకు మొకటి[169]యు నొల్ల
నెఱుఁగవే సత్యమాహేశ్వరులిండ్ల - నెఱయంక కానిని నిజగతి నన్ను
దాసయ్యవలె నిన్నుఁ దవనిధి వేఁడ - నా సిరియాలున ట్లాత్మజుఁ గోరఁ
గనకవృష్టి యడుగఁ గరికాలునట్ల - వనితకు నెడవుచ్చు మన నంబిభాతి
వెండియుఁ గుమ్మరగుండయ్య కిచ్చు - మిండప్రాయంబుఁ గామింపఁ గాదేవి
స్వర్గాపవర్గాదిసౌఖ్యంబులొల్ల [170]భర్గ! - [171]నీ ప్రమథుల భక్తులయిండ్ల
నలరుచు డించిన యా ప్రసాదంబె - కలదు భోగింపఁగాఁ గలకాలమెల్ల
సర్వభక్తాత్మ! మీ జలకంబువాఁడు - గుర్వుగా మా కాటకోటయ్యగారు
హర! మీ నగరిమాలకరి పుష్పదంతుఁ - డరిది పూజారి కన్నప్ప [172]దేవయ్య
యిండెగట్టెడిది మా [173]యిండెరేకవ్వ - ఖండదీపమువాఁడు [174]గా నమినంది
నెట్టణ దీవించి నీకు విభూతిఁ - బెట్టెడువాఁడు మా పిళ్లనైనారు
అను[175]షక్తిమై గంధ మర్పించువాఁడు - మనసిజసంహర! మాయణుమూర్తి
వరద! మీ ధూపంబువాఁడు మాచయ్య - వరకీర్తి! మీ గంటవాఁ డోహిళయ్య
ధర మంగళారతుల్ [176]దరిసించువాఁడు - వరద! సోమయగారు శరణవత్సలుఁడు
వంటకట్టెలు దెచ్చువాఁడు మారయ్య - పంటింపఁ గరికాలు పడిపెట్టువాఁడు
కఱకంఠ! యడబాల సిఱుతొండనంబి - [177]మఱి బానసమునది మా సంగళవ్వ
కరికాళచోడు(?)వళ్ళెర మిడువాఁడు - గరగ[178]కావటివాఁడు ఘనుఁడు హౌన్నయ్య
రమణీయమగు నోగిరంబుల [179]పరిసె - నమువాఁడు సెన్నయ్య విమలదేహుండు
ఆరగింపఁగఁ బెట్టునవసరంబులది - వీర[180]చోడవగారు విశ్వైకవినుత!
అడపంబువాఁడు రేచయమును(?) [181]బాలు - పడుప్రసాదులు బిబ్బబాచయ్యగారు
మృడుఁడ! మా నాట్యనమిత్తండి వైద్యుఁ - డడరంగఁ గల్లిదేవయ్య! వెండీఁడు
మలహర! సామవేదులు పురోహితులు - వెలయఁ బౌరాణికుం డిల మాయిభట్టు
కోరి మీ పరిహాసకులు గళియంబ - [182]గారు వాగీశనైనారు వాఠకుఁడు
శ్రీపతిపండితుల్ శివుఁడ! మీ [183]కవులు - నా పండితయ్యగా రనుఁగుఁబండితులు
నాదివీణెలవాఁడు మాదిరాజయ్య - నాదరసజ్ఞుఁడు నలి శంకరయ్య
కరణంబు గర్మసంహర! కేశిరాజు - ధర జగదేవుండు దండనాయకుఁడు
గణనాథుఁ డిందుశేఖర! మీ ప్రధాని - ప్రణుతించి [184]చూడ మా ప్రభువు మీ ప్రభువు
ఇఱువత్తుఁడు గజసాహిణి యశ్వసాహి - యొఱపుగాఁ జేరమ యోగియొడయఁడు
అనఘ! రామయ్య యేకాంతంబువాఁడు - నొనర బల్లహుఁడు గుంటన, సఖినంబి
శంకర! నీ బంటు శంకరదాసి - యంకంబువాడు [185]నేణాదినాథుండు
లెంక దా మంచయ్య లీల మీ నగరి - సుంకీఁడు [186]సుంకేశు బంకయ్యగారు
సురియఁబట్టెడువాఁడు సురియచౌడయ్య - పొరిఁగులచ్చిరియారు భువి హేళగీఁడు
హర! నీకు బెజ్జమహాదేవి దాది - ధర రుద్రపశుపతి దామంత్రవాది
సువిధాని! కక్కయ్య భువి జాలగాఁడు - శివరాత్రి [187]సంగయ్య [188]సెలిబోగ[189]తందె
దేవరదాసయ్య దేవ! [190]దాసీఁడు - భావింపఁ గిన్నరబ్రహ్మయ్య బచ్చు
మడివాలు మడివాలుమాచిదేవయ్య - కడమలనంబి సొప్పడ [191]దివ్వెలాఁడు
తెల్లంబు గోడలు దీర్చెడువాఁడు - [192]సల్లీల గోడలమల్లయ్యగారు
కుమ్మరి గుమ్మరగుండయ్యగారు - జొమ్మయ్య వేఁటకాఁ డిమ్మహిలోన
కమ్మ [193]రమ్ములవాఁడు ఘనుఁ డిల్లహాళ - బొమ్మయ్య గీలారి నెమ్మిఁ జండండు
[194]మాయావి బల్లేశుమల్లయ్య [195]గట్టె - బోయీఁడు బాచయ్య భూరికొటారి
పాలువిదుకువాఁడు లీల వంకయ్య - పాలుగావంగ నేర్పరి గొడగూచి
కావున నీదు సకలనియోగంబు - మావారలై యండ మన్మనోరమణ!
ఏమిటఁ గొఱఁత? నా కేమిటఁగడమ? - ఏమైన నడుగు నీ కిచ్చెద నింక
మానంబు వదలిన [196]మదిఁ దల్లడిలిన - మానుగాఁ బ్రమధులయాన నీ యాన
కాలకూటము గుత్తుకకు రాకమున్న - క్రాలుపురంబులు గాలకమున్న
గౌరివివాహంబు గాకటమున్న - యార నజాండంబు లలరకమున్న
తివిరి మూర్తులు నెన్మిదియు లేకమున్న - భువి హరిబ్రహ్మలు పుట్టకమున్న
యటమున్న యటమున్న [197]యటమున్నమున్న - యిట నీవు నా స్వామి [198]వేను నీ బంట
కఱకంఠ! [199]యిదియేమి [200]గళవళించెదవు - వఱల నా చేతఁ బోవచ్చునే” యనుచు
నసమాక్షుతోడ [201]మాఱంకమై గెలిచె - బసవఁ డుద్యద్భక్తి [202]భాతిమై నిట్లు
బసవఁడు గొల్లెతచల్లకడవఁ బడకుండఁ బట్టిన కథ
వెండియు నిర్మలాఖండిత[203]కీర్తి - దండనాథాగ్రగణ్యుండు [204]పుణ్యుండు
సజ్జనసుతుఁడు బసవఁ డొక్కనాఁడు - బిజ్జలుకొలువునఁ బ్రీతిఁ గూర్చుండి
“యోడకోడకు [205]మని యొక [206]కడవెత్తు - మాడికి బాహుయుగ్మముఁ జాఁపఁదడవ
“ఇసుమంత” [207]బూడిద నొసలఁ బూసినను - మసలక కొండంతమరు [208]లొందుననుట
తెల్లం” బనుచు రాజు మెల్లన నగుచుఁ - “జెల్లఁబో బసవయ్య! శివమరుల్ గొంటె
[209]బ్రమసితే తలకెక్కి భక్తిరసంబు - గుమతివై నిండినకొలువులోపలను
“నోహో” యనుచు “నోడకోడకు”మనుచు - “బాహుయుగ్మము సాఁచిపట్టుటే”మనినఁ
“స్వగుణసంకీర్తన దగదు సేయంగఁ - దగదని యున్నను నగుసభ” యనుచుఁ
“ద్రిపురారిగుడితూర్పుదెస నేఱునేలఁ - గపిలేశ్వరంబందుఁ దపసి యొక్కరుఁడు
ఆ లింగమునకు నిత్యము నాఱువుట్ల - [210]పాల మజ్జనమార్పఁ గాలువల్ గట్టి
వీథివీథుల వెల్లివిరియ నేనుఁగుల - పాద[211]ఘట్టనములఁ బంకంబు రేఁగ
నా వీథిఁ జల్ల దా నమ్ముచుఁ [212]గణఁకఁ - బోవుచోఁ గాలూనఁ బోయినఁ దొసఁగఁ
గడురొంపిఁ [213]గాలుజారుడుఁ జల్లకడవ - పడఁ[214]బోవ [215]గొల్లెత “బసవరో” యనిన
బట్టితి నచ్చటఁ బడకుండఁ గడవఁ - జట్టన చేతులు సాఁచి యే ననుచు
గొల్లెతరూపంబు గొల్లెతయిల్లు - గొల్లెత యున్న [216]యిక్కువయుఁ జెప్పుటయు
రప్పించి గొల్లెత రాజు దా నడుగఁ - దప్పక బసవయ్య సెప్పినయట్ల
చెప్పుచు [217]నొఱగినచేతి ఱొంపియును - నప్పుడు జాఱంగ నంటినకాలి
ఱొంపియుఁ జూపి యెఱుంగ[218]రె యితని - పెంపున కిది [219]సెప్పఁ బెద్దయే తొల్లి
తిరుచిట్టంబలుని కథ
ప్రవిమలభక్తి విభ్రాజిత[220]లీల - భువి [221]నఱువాద్దడి మువ్వురిలోన
శ్రీనిలయుఁడు దిరుచిట్టంబలుండు - నా నొక్కభక్తుఁ డనశ్వరకీర్తి
కరమర్థితో వర్షకాలంబునందు - హరపూజనార్థమై [222]యట్లొక్కనాఁడు
చని పుష్పములు గోసికొని వచ్చునెడను - వననిధితీరంబునను గాలు జాఱి
పడి వడిఁ బుష్పముల్ వడకుండ భక్తుఁ - డడరుచుఁ “జిట్టంబలాధీశ” యనుడుఁ
బరముఁడు భక్తునిఁ బడకుండఁ బట్టు - పరుసున ననుఁ బట్టె బసవలింగంబు
వడినట్టులును [223]గాక వసుధేశ వినుము - [224]పుడమిని సొన్నలి [225]పురవరంబునకును
బోయినచోటఁ దత్పురి సుఖగోష్ఠి - నాయతభక్త సభాభ్యంతరమున
సిద్ధరామునిఁ జూచి శివభక్తవితతి - “సిద్ధుండ! లోకప్రసిద్ధంబు గాఁగ
నభినవ శ్రీగిరి యనఁగ నిప్పురము - నభినవలీల సొంపార రచించి
యా పర్వతము మల్లికార్జునదేవు - నేపారఁ గొనివచ్చి యిచ్చట [226]నిలిపి
ధ్రువముగా లక్షయుఁ దొంబదివేలు - శివలింగములను జెచ్చెరఁ బ్రతిష్ఠించి
దానికిఁ దనఁగ మర్త్యములోనియన్న - పానముల్ ముట్టక భక్తిపెంపునను
సహజమకుటము నొసలికన్నుఁ దనర - మహితయోగానందమహనీయలీల
మేనినీడయు భువి మెట్టిన [227]-యజ్జ - గానఁగఁబడ దనఁగాఁ జరింపుచును
నమితసమాధియోగాంతంబునందుఁ - బ్రమథలోకమునకుఁ బన్నుగా నేఁగి
యక్కడఁ దత్త్వరహస్యసద్గోష్ఠి - మక్కువ నెక్కొన మసలి [228]యేతెంతుఁ
[229]బ్రఖ్యాతమిది [230]మాకుఁ బ్రమథలోకమున - నాఖ్యాతసత్కీర్తి [231]యగు బసవాఖ్యుఁ
బొడగంటిరే [232]భక్తభూరిసద్గోష్ఠి - గడు నొప్ప నిక్కడఁ గలుగు నక్కడను
నతఁ డుండు నా విందు మఖిలలోకముల - సతతసాన్నిధ్యానుషక్తిమై” ననిన
శివభక్తతతిఁ జూచి సిద్ధరామయ్య - “ప్రవిమలగతి నేఁడు ప్రమథలోకమున
నరసి వచ్చెద”నంచు నాక్షణంబునను - నరిగి కైలాసనగాగ్రహర్మ్యమున
సిద్ధరామయ్య కైలాసమున కరుగుట
నజ [233]కాలబుద్ధ క్షయాంత[234]రజ్యోతి - నిజ[235] బలప్రియ యామ్యనీల రుద్రేశ(శ్వ?)
యీ(రే? )శాన శర్వ సర్వేశ భర్గ ప్ర - కాశ సురాధీశ గౌరీశ ధన్య
వామదేవ భవోద్భవ ప్రచండ ధర - వామదేవో(హో?)గ్ర సంవాహ పినాకి
ధాతృ విధాతృ హుతాశన శివ మ - హాతేజ సూక్ష్మలయ క్రూరదంష్ట్ర
క్షేమేశ [236]వికరణార్చిష్మంత దమన - భీమాభిధానోగ్ర పింగాక్ష [237]కర్తృ
విషధరానంత నివృత్తి నిధీశ - వృషభగణాధ్యక్ష విభు వాయువేగ
హరరత్నకర బభ్రు హంతాగ్నిదుఃఖ - కర సుఖకర [238]సుదుంబర కాలరుద్ర
హరిహరబ్రహ్మసౌమ్య స్వామి మృత్యు - హర భయానకహలాహల పరం[239]ధామ
వజ్రదేహావ్యయ వట రుద్ర దీర్ఘ - వజ్రదంత వియోగ వట విరూపాక్ష
సహనేశ శంభు పంచశిఖ నియోక్తృ - గుహ రుద్ర [240]బాధక గోపతీశాన
పింగ ళాసాధ్య మాతంగ రోహిత[241]సు - రంగ కపాలధర స్థూలరుద్ర
శాశ్వతే శోర్ధ్వకేశ త్రిదశేశ - విశ్వేశ చండేశ విత్తేశ వృషధ
రాక్షయరుద్ర కాలాగ్నిరుద్ర త్రి - యక్షఫణీంద్ర విచక్షులాదిగను
రుద్రచిహ్నలు గ్రాల రుద్రాత్ములైన - రుద్రగణాధీశ్వరుల్ సేరికొలువ
శ్రీనంది నందినాథానంద వృషభ - సానంద గోముఖ హయ[242]ముఖాభంగ
దండపా ణీశాన చండీశ [243]రుద్ర - రుండాభరణ రుద్ర పుండరీకేశ
పర్వతాభరణ దర్ప సుభద్రశర్వ - సర్వజ్ఞ సర్వాత్మ సర్వసంహరణ
దారుక రేణుక ధవళాక్ష వీర - వీరక వీరభద్రారూఢ భద్ర
త్రిజటి ధూర్జటి లోకవిజయాట్టహాస - నిజబల విషబల నీల నిశ్శంక
నీలలోహిత నిత్య నిష్కళ శాంత - కాల మహాకాల కాల కాలోగ్ర
రూప నిరూప విరూపాక్ష విశ్వ - రూప పుష్కళ శాంతరూప వృషాంశ
యుగ్రాక్షభర్గాసితగ్రీవపింగ - ళోగ్రకాయాతీత(?) యుత్తుంగవిముఖ
కరిముఖ నరముఖ కపిముఖ ద్విముఖ - శరభముఖాముఖోష్ట్రముఖ శార్దూల
ముఖ చతుర్ముఖ పంచముఖ సుముఖాష్ట - ముఖ నవముఖ దశముఖ షణ్ముఖైక
ముఖ సహస్రముఖ దుర్ముఖ వికటాక్ష - మఖహర విషహర [244]మలహర మృత్యు
హర యమహర గజాసురహర సకల - సురహరాసురహర పురహర భృంగి
గజకర్ణశార్దూల కర్ణాశ్వకర్ణ - విజయఘంటాకర్ణ [245]వీరగోకర్ణు
లాదిగా బలసి సదైశ్వర్యలీల నాది - ప్రమథగణేంద్రావళి గొలువ
సనకసనందన సన్మునీశ్వరులు - ననుఁగులై [246]తమహృద[247]యాబ్జముల్ పూన్ప
నుపమన్యు వామదేవ పవిత్రపాణి - కపిల కణ్వాగస్త్య కౌశిక సుబల
శ్వేత దధీచి వసిష్ఠ [248]కణ్వాత్రి - గౌతమ కశ్యప సూతానిలాత్మ
మాండవ్య హరిత మార్కండేయ పులహ - శాండిల్య వత్స కుత్స పులస్తిశక్తి
బాదరాయణ భృగు బక దాల్భ్య రురు శి - లాద మౌద్గల్య వర్ణాద శాకల్య
[249]గర్గ శౌనక [250]చతుష్కర్ణమృకండు - భార్గవాంగిరస విభాండక శునక
మైత్రేయ బల్లకి మంకణ చ్యవన - మిత్రావరుణ నారదాత్రిసౌవర్ణ
పైలసుమంతుసుబ్రహ్మణ్య మంద - పాల సుమిత్ర రైభ్యక సత్య సుమహ
పర్వత జైమిని పౌలస్య గార్గ్య - దుర్వాసు లాదిగా సర్వ సన్మునులు
[251]వెలుఁగ నాశీర్వాద వేదనాదముల - నలరుచు నందంద యనుకీర్తిసేయ
సుర నర దనుజ ఖేచర సిద్ధ సాధ్య - గరుడ గంధర్వోరగ ప్రకరంబు
ద్వాదశాదిత్యు లేకాదశరుద్రు - లాది నవబ్రహ్మ లష్టవసువులు
సురపాగ్ని యమదైత్య వరుణగంధవహ - నరవాహ [252]హరదిశానాథయూధంబు
శ్రీవాగ్వధూనాథ జిష్ణులు నవిక - లావరణస్థులై యభయముల్ వేఁడఁ
దుంబురునారదాదులు సుగీతామృ - తంబున నెయ్యంబు దనర నోలార్ప
నంబికా[253]సహితుఁడై యాస్థానమంట - పంబునఁ బేరోలగంబున నున్న
శివదేవుఁ గనుఁగొని సిద్ధరామయ్య - యవిరళభక్తి సాష్టాంగుఁడై మ్రొక్కి
“విన్నపం బవధారు విశ్వలోకైక - సన్నుత!” మర్త్యంబు సద్భక్తజనులు
“ప్రమథలోకంబున బసవండు [254]గలఁడో- ప్రమథేశుకొలువునఁ బరికింపు” మనిరి
“బసవసంస్తుత్య! సద్భక్తైకదేహ! - యసలార నున్నరూపానతి” [255]మ్మనిన
శివుఁడు తన హృదయమున బసవనిఁ జూపుట
“నాలోక మీలోక మననేల బసవఁ - డేలోక[256]మునను లేఁ? డెల్లచో నుండుఁ
బ్రమథులయందు సద్భక్తులయందు - నమరంగ నా హృదయాబ్జకర్ణికను
సతతంబు గురులింగ[257]చరణములయందు - నతిముదమున నుండు నాదిబసవఁడు
అట్టొట కి[258]టుసూడుమా” యని శంభుఁ - డిట్టలంబుగఁ దన హృదయంబుఁ దెఱవ
సంగతంబగు కరస్థలము లింగంబు - జంగమావళికిని శరణనుకరము
ననిమిషుఁడై చూచు హరుమీఁది దృష్టి - గనుఁగ హర్షాశ్రుకణవితానంబు
దరహసితాస్యవిస్ఫురణయుఁ దనరఁ - బరమశివధ్యానపారవశ్యమునఁ
బద్మాసనస్థుఁడై పరమేశు హృదయ - పద్మంబునం దున్నబసవనిఁ జూచి
ప్రమథులు హర్షింప నమరులు మ్రొక్క - నుమబోటి యత్యద్భుతోపేత గాఁగ
నా మూర్తిఁ గని సిద్ధరామయ్య యుద్గ - తామితానందపూర్ణాత్ముఁడై [259]తనర
హరుఁడు పర్వతపుత్త్ర నరవిరికంటఁ - బొరిఁ బొరిఁ జూచుచుఁ బూర్ణేందువదన!
శివుఁడు పార్వతికి బసవని మహిమ తెలుపుట
చూచితే బసవనిసురుచిరమహిమ - యీ చెల్వునిల్కడ యేరికిఁ గలదె?
వెలయఁగ నయ్యాదివృషభేంద్రుఁ డనఁగ - నలి నేన రెండుమూర్తులు ధరించితిని
విను "తవపుత్త్రోభవిష్యామి” యనుచు - నెనయ శిలాదున కేన పుట్టితిని
అసలార భక్తహితార్ధమై యేన వసుధ జనించితి [260]బసవం డనంగ
నెసఁగ నిట్టిద[261]కాన యీశుండ నేన - బసవఁడన్ పేరి సద్భక్తుండ నేన
మున్నును మన బసవన్న సద్గుణ మ - హోన్నతి యెఱుఁగవే యొగి నట్లుఁగాక
లోకాధిపతి నేను లోలాయతాక్షి! - ప్రాకటంబుగ లోకపావనుఁ డితఁడు
కారణలోకసంహారుండ నేను - కారణలోకోపకారి యితండు
భక్తవత్సలుఁడ నేఁ బర్వతపుత్త్రి! - భక్తరత్నములకు బండారి యితఁడు
భక్తైకదేహుండ భావింప నేను - భక్తజనప్రాణి బసవఁ డీక్షింప
ముక్తికి రాజఁజూ ముద్దియ నేను - భక్తికి రాజుసూ [262]బసవఁ డీక్షింపఁ
[263]బసరింప నే లింగపట్టబద్ధుండ - బసవండు సద్భక్తిపట్టబద్ధుండ
అచరలింగంబ నే నచలేంద్రతనయ! - సచరాచరక్షోణిఁ జరలింగ మితఁడు
సనునాది నా పేరు [264]శంభుం డనంగఁ - బొనర ద్వితీయశంభుఁడు వీనిపేరు
స్థిరభక్తి మమ్ముఁ గొల్చినఁగాని లేదు - ధర వీనిఁ దలఁచినంతనె [265]ముక్తి గలదు.
అలరుచుఁ బ్రాణదేహార్థముల్ నాకు - నిల నిత్తు రఖిలభక్తులు నొక్క యెడను
నచ్చుగాఁ బ్రాణదేహార్ధముల్ బసవఁ - డిచ్చుచునుండుఁ [266]దా నెల్లభక్తులకు
నా యతమతి బసవా యనఁబరగు - నీ యక్షరత్రయం [267]బిట్లొక్కమాటు
సదువు నాతని ముఖసదనంబు నందె - కదలకుండుదుము మా గణములు నేము
పొదలు నెవ్వని యాత్మ [268]నుదితసద్భక్తి - యదియు బసవని మహత్త్వంబ కాదె
పరికింప నెవ్వఁడు వడయుఁ బ్రసాద - వర[269]ముక్తి యది బసవని కృప గాదె
మదిలోన నెవ్వఁడు మముఁ దలపోయు - నదియెల్ల బసవనియంశంబ కాదె
[270]పసరించు జంగమభక్తి యెవ్వండు - వసుధలో నది బసవనివృత్తి గాదె
భక్తిపట్టము దాల్ప బసవఁడు దక్క - శక్తిసమేతులు [271]జగతిపైఁ గలరె
యదిగాక యొక్క నాయందేల భక్త - హృదయస్థుఁడై [272]చూడ నిట్లున్నవాఁడు
అంచు వెండియుఁ బ్రస్తుతించుచు శంభుఁ - డంచితమతి బసవయ్య కిట్లనియె
“బసవ! మర్యమునందు భక్తులు గలరె? - [273]యెసకమై సంసార మిష్టమే నీకు?”
నని యానతిచ్చుడు నద్దేవు హృదయ - వనజస్థుఁడగు బసవం డిట్టులనియె
“మందునకైనను మర్త్యలోకమున - నిందుశేఖరుభక్తుఁ డెందును లేఁడు
భక్తుండ నేన చూ భక్తులిందఱును - భక్తాత్మ! మీ స్వరూపంబ కావునను
వెండియుఁ గలదొక్క విన్నపంబింకఁ - జండేశవరద! ప్రసన్నత వినుము
జంగమలింగప్రసాదోపభోగ - సంగతసుఖసుధాశరధి నోలాడు
[274]నిటువంటిభవము లెన్నేనియు లెస్స - యిట యపవర్గ మహిష్ఠతకంటెఁ
గావున శునకసూకరక్రిమికీట - కావహజన్మంబులైనఁ గానిమ్ము
సు[275]ప్రసిద్ధము జంగమప్రసాదంబ - యేప్రొద్దు భోగింప [276]నెట్లు గల్గినను
జాలుఁబో భవకోటిశతసంఖ్యలందు - [277]నోలినన్ బుట్టింపు మొకటియు నొల్ల”
ననవుడు గౌరీశుఁ డతిదయాదృష్టిఁ - గనుగొని సిద్ధరామునకుఁ జూపుడును
శివునకు మ్రొక్కుచు సిద్ధరామయ్య - భువికి నేతెంచి యద్భుతము నెక్కొనఁగ
భక్తసమూహికి బసవయ్యమహిమ - వ్యక్తిగాఁ జెప్పంగ నట్ల నేవింటి”
ననవుడు బిజ్జలుఁ “డట్టు లౌటకును - జనులకునెల్ల [278]దృష్టం బిప్పు డిదియ”
యనుచు నమూల్యవస్రాభరణములఁ - బొనరంగఁ [279]గాళవ్వబోయత కొసఁగి
“యవికలాజాండతత్త్వాత్మకుఁడైన - శివుఁడు గరస్థలాసీనుఁడై యుండ
సర్వగతుండైన శంభుభక్తునకు - సర్వగతత్వంబు సహజంబ కాదె
సర్వమయుండైన శర్వుభక్తునకు - సర్వమయత్వంబు సహజంబ కాదె
దూరేక్షణంబును దూరశ్రవణము - దూరవిజ్ఞానసిద్ధులు మొద ల్గాఁగ
నణిమాదిసిద్ధులు నభవుభక్తునకు - గణుతింప నెంత శ్లాఘ్యంబు దా” ననుచు
సకలమానవులు మస్తకతటన్యస్త - ముకుళితహస్తులై మ్రొక్కుచునుండ
“నల్లవో”యనుచు భూవల్లభుఁ డతులి - తోల్లాసచిత్తుఁడై యెల్లవస్తువులు
దట్టుఁడు బసవనదండనాయకున - కిట్టలంబుగఁ గట్టనిచ్చె సంప్రీతి
గురుభక్తిశృంగార! గుణగణాధార! వరదయాలంకార! సురుచిరాకార!
ఖ్యాతగంభీర! దుష్కర్మవిదూర ! - గీతమహోదార! ధూతసంసార!
అకుటిలచిత్త ! శివాచారవేత్త ! - ప్రకటతత్త్వాయత్త ! ప్రవిమలవృత్త !
అజ్ఞానజైత్ర! యుదాత్తచరిత్ర! - విజ్ఞానపాత్ర! సంవిత్సుఖామాత్ర!
రూఢవ్రతోత్తుంగ! రుచిరాంతరంగ! - గూఢప్రసాదాంగ! గొబ్బూరిసంగ!
ఇది యసంఖ్యాతమాహేశ్వరదివ్య - పదపద్మసౌరభభ్రమరాయమాణ
జంగమలింగప్రసాదోపభోగ - సంగతసుఖసుధాశరధినిమగ్న
సుకృతాత్మ పాలుకురికి సోమనాథ - సుకవిప్రణీతమై శోభిల్లి తనరి
చరలింగఘనకర[280]స్థలివిశ్వనాథ - వరకృపాంచితకవిత్వ స్ఫూర్తిఁ బేర్చి
చను బసవపురాణ మను కథయందు - ననుపమంబుగ ద్వితీయాశ్వాసమయ్యె.
* * *
- ↑ హితుఁడు
- ↑ గలఁడు
- ↑ జాఁగిలఁబడి మ్రొక్కి యిట్లనిరి
- ↑ కున్న వారెవ్వరు
- ↑ మెంతయును
- ↑ బంపి
- ↑ తమై
- ↑ దీటిమ్రోయు
- ↑ త
- ↑ ఈ ద్విపదము కొన్ని ప్రతులలోనే కలదు
- ↑ లేణ్ణూరు
- ↑ జరుపక
- ↑ బఱప
- ↑ గల్గునే యెన్నఁడ
- ↑ చూపుచుననియె
- ↑ పెల్లెలుగల
- ↑ రూఢుండప్పరగణము
- ↑ గొల్చువారుఁ; జూచువారు
- ↑ గొలుచు
- ↑ సజ్జపఱపు, గుజ్జుగురపు, గట్టివరపు
- ↑ రాయనిఁగొల్చువారు
- ↑ భట్ట
- ↑ రథా
- ↑ నడుమ
- ↑ ఈ క్రింది నాల్గు చరణములు పెక్కు ప్రతులలో లేవు
- ↑ మాదాంబ
- ↑ నోఁచి
- ↑ గూర్మిని
- ↑ మడఁతి
- ↑ జనఁ
- ↑ మా
- ↑ ఱందు
- ↑ గన్నారఁ
- ↑ బ్రకటంబుగా
- ↑ మన్పు
- ↑ రక్షింపనొండెంత వ్రేఁగు
- ↑ ఏవలనెఱచుచుం డింతియ చాలు
- ↑ కేళీలోలమతిని
- ↑ సుశీల
- ↑ లెడపని
- ↑ తరగని
- ↑ బొరిమాల్చు
- ↑ బాసియు
- ↑ వాసియు
- ↑ వెన్ను
- ↑ ధీరంపుఁగట్ట
- ↑ రంపుఁదిట్ట
- ↑ చెలిమి
- ↑ పసి
- ↑ ప్రస్తుతి
- ↑ మనుచుఁ-బ్రా
- ↑ వడయుదు
- ↑ పరుస
- ↑ వసి
- ↑ ళి
- ↑ ప్రకటితరుద్రాక్షమకుట
- ↑ నేక, ధిక
- ↑ శయులి
- ↑ తోరణములు
- ↑ గొడగులు
- ↑ నాకాశమద్రువ
- ↑ లందెదురుకొనంగ
- ↑ స
- ↑ (క) దొప్పనఁ
- ↑ నోరూరి
- ↑ నిక్కంబు
- ↑ బ్రీతికి
- ↑ యెక్కుడు
- ↑ లొప్పన
- ↑ మున్నిరూపించి
- ↑ దగు
- ↑ యంత
- ↑ బొదలి
- ↑ సాకార
- ↑ పేర్చి
- ↑ వాల్లభ్య
- ↑ వికలాంగ
- ↑ ర్థ
- ↑ తత్త్వ
- ↑ భాసనుఁడు
- ↑ వడువునుబోలె, ఇట్టి ప్రయోగములు నన్నిచోడని కుమారసంభవమునఁ గూడఁగలవు.
- ↑ వ్రేగులు, వేవేలుగాఁగను
- ↑ బడిపట్టి
- ↑ నందించు
- ↑ నందించు
- ↑ నెట్లకో
- ↑ మున్పుట్టితి
- ↑ “సౌందర్య(ము)బసవ? సాధ్యులబసవ! నందీశు బసవ! యానందంబు బసవ!” కొన్ని ప్రతులయందుఁగలదు
- ↑ బసవ! నీ
- ↑ బాస
- ↑ బాస
- ↑ పసు
- ↑ బాలులకు
- ↑ నెసఁగఁ బక్షుల
- ↑ బాస
- ↑ బాస
- ↑ బాస
- ↑ బాస
- ↑ యుక్తి
- ↑ సంధానుషక్తి
- ↑ ననురక్తితోడుత నా బసవండు
- ↑ పరాత్పర
- ↑ దయా
- ↑ బెట్ట నంతశక్తుఁడనె
- ↑ చక్కనఁ
- ↑ ప్రమథుల
- ↑ పట్టి
- ↑ కుమారుని నొకని
- ↑ బేమనీ
- ↑ నావుడును
- ↑ వెట్టెదే; నెట్టఁదా
- ↑ నని యీ
- ↑ వెలుఁగంగ
- ↑ పు
- ↑ ధితమ
- ↑ యడఁకుచు, నడఁకుచు
- ↑ గడగడ
- ↑ వేయేలఁ
- ↑ ననఁగఁ
- ↑ యఖిల సంస్తవ! వామదేవ!
- ↑ పరాత్పర
- ↑ మూర్తి
- ↑ నల్లన
- ↑ యర్థముల్ దద్దఁ జే
- ↑ దామె
- ↑ ప్రమోద
- ↑ ముడియ
- ↑ వర్థిల్లు
- ↑ వెంగలు లతని
- ↑ ధిగిల్లన
- ↑ నవియ, విరియ
- ↑ మీడ
- ↑ మగుడి
- ↑ సాఁపు; దోఁచు
- ↑ దర్శనసమయంబు, అం
- ↑ గట్టియెక్క, కు
- ↑ బెఱెక
- ↑ గడ్పార
- ↑ కొల్వంగలేదు
- ↑ గాదనుచుఁ జెయి
- ↑ కనుకని మొఱింగెదరు
- ↑ బల్లేశ్వరుదేవ
- ↑ కోటండనాఁగలఁ
- ↑ పెంట్రిక
- ↑ గీటఁ, జిందఁ
- ↑ ఈ ద్విపద కొన్నిప్రతులలో లేదు
- ↑ కూలె
- ↑ కీలకో
- ↑ బుడిబుళ్లిఁబోవ
- ↑ వెండియును
- ↑ గాన
- ↑ రక్తిమై మ్రుచ్చులను బసవయ్య
- ↑ నిలవట్లుగాక
- ↑ ఇక్కడ 'నిత్తెనేమ'మనియు 'ముత్తేలపొడి' యనియు దిద్దఁదగియున్నను, వ్రాతప్రతు లన్నింటను నిట్లేయుండుటచేతను, 'నిత్యనేమ' మని యీ కవి మఱికొన్నిచోట్లఁగూడఁ బ్రయోగించుటచేతను, నట్లు చేయలేదు.
- ↑ వశాయత
- ↑ ప్రోఁగు
- ↑ దనకైనయన్ని
- ↑ కంఠు
- ↑ సంపన్నుఁ సంపూర్ణుఁ
- ↑ ఇటు సె
- ↑ రా
- ↑ గాదు లేదనిన
- ↑ ప్రొద్దువో
- ↑ పత్రియీ
- ↑ తనరె, పర్వె(ర్వ)
- ↑ యెసఁగ
- ↑ సమితి
- ↑ కన్నడుగుటయు
- ↑ నేనొల్ల
- ↑ భర్గుని
- ↑ ని న్గొల్చిన
- ↑ దేవుండు
- ↑ యిండి
- ↑ కడమలనంబి
- ↑ రక్తిమై
- ↑ దనరించు
- ↑ మఱియు బానసముది
- ↑ కావడి
- ↑ పరికరము
- ↑ చోడప
- ↑ మనవాలు
- ↑ నారు
- ↑ కావ్యుఁడా
- ↑ చూడంగఁ బ్రభువు
- ↑ నేణాది
- ↑ బంకీశుసుంకయ్య
- ↑ బంకయ్య
- ↑ చవి
- ↑ తద్దె
- ↑ మాసీఁ(స్టీ?)డు
- ↑ దివ్వటీఁడు
- ↑ బల్లిదుల్
- ↑ తమ్ములవాఁడు
- ↑ మాయారి
- ↑ కొట్టు
- ↑ మహిఁ, మఱిఁ
- ↑ యంతకమున్న
- ↑ యేను
- ↑ యిట్లేల
- ↑ కలవరించెదవు
- ↑ మాఱాఁకమై
- ↑ బ్రాఁతి
- ↑ మూర్తి
- ↑ ధన్యుండు
- ↑ మంచునొ
- ↑ కడువెత్తు
- ↑ బూడిది, బూడిదె
- ↑ లెత్తె
- ↑ భ్రమసితే
- ↑ పాలు
- ↑ ఘట్టనచేత
- ↑ గడవఁబోవుచుఁగాటక బోయినిదొసఁగ (యనఁగ)?
- ↑ గాల్దెమల్పడఁ
- ↑ బడ
- ↑ వ్రాఁతప్రతులన్నింటను 'గొల్లెత' యను రూపమే కలదు
- ↑ యింకువయు
- ↑ నూఁగిన
- ↑ వే
- ↑ యొక్క
- ↑ మహిమ
- ↑ నఱువత్తాది? నఱువత్తాండి
- ↑ యందొక్క
- ↑ గాకవిన్ పుడమీశ!
- ↑ కడయను
- ↑ కపురంబుకును
- ↑ నునిచి
- ↑ యడుగు
- ↑ యేతెంచు
- ↑ ప్రఖ్యాతి యిది
- ↑ మీకు
- ↑ యట
- ↑ మీరు
- ↑ కలా
- ↑ క
- ↑ గుణ
- ↑ విత
- ↑ కృత్య
- ↑ సదంబర
- ↑ ధాత
- ↑ ఘాతుక
- ↑ కు
- ↑ ముఖనంద
- ↑ రౌద్ర
- ↑ శిఖి, స్మర
- ↑ విమల
- ↑ నిజ
- ↑ యంబులఁ బూ
- ↑ కణాద
- ↑ గార్గ్య
- ↑ జతుకర్ణి
- ↑ వెలయ
- ↑ భవనిశా
- ↑ సహితమై
- ↑ కలఁడు
- ↑ మ్మనుడు
- ↑ మందు లేఁడెట్లు తలంపఁ
- ↑ చరణంబులందు, జంగమంబందు
- ↑ కిదె
- ↑ యుండ
- ↑ బసవేశుఁ డనఁగ
- ↑ కాక
- ↑ బసవండు తలఁపఁ
- ↑ బ్రసరింప
- ↑ శంభుండనాఁగఁ శంభుండునాఁగఁ
- ↑ కల్గు భక్తి
- ↑ నెల్లెడ భక్తతతికి
- ↑ బెవ్వఁడేనియును
- ↑ నొదవు
- ↑ భక్తి
- ↑ ప్రసరించు
- ↑ జగములఁ
- ↑ కూడ
- ↑ ఎసఁగు నీ సంసార
- ↑ నటు... లెన్నైనను మేలు
- ↑ ప్రసిద్ధగ
- ↑ నిట్లు
- ↑ నోలిని.... మొకటినే
- ↑ దృష్టము గాదె యిదియు, ననుచు
- ↑ గాటకబోయిని
- ↑ స్థల