ఈ పుట అచ్చుదిద్దబడ్డది
గాయపడుటే....
గాయపడుటే ధర్మవమ్మా
గాయపరుచుట కూడదమ్మా
గాయమే... గాయమే మది నిలిచిపోవు
గేయమై అది మేలుకొలుపు ॥గాయ॥
గాయపడనిదే పుడమితల్లీ
సృష్టికీ పురుడోసెనా...
గాయపడనిదే ఆడజన్మ
బిడ్డలను కనిపెంచునా...
గాయమంటే త్యాగమమ్మా
గాయమే నిర్మాణమమ్మా
గాయపడరా ఎప్పుడైనా మూగజీవుల గోసకు
గాయపడరా ఇప్పుడే ఈ అడవి తల్లి రక్షకు
బిష్ణోయితల్లి లక్ష్యమై.. ॥గాయ॥
గాయపడనిదే గంగమాత
ఎత్తిపోతలు దునుకునా...
గాయపడనిదే రైతుగుండే
రత్నరాసులు నిండునా...
గాయమంటే గురువుమాట
గాయమే నీ వెలుగుబాట
గాయపడరా ఎప్పుడైనా మూగజీవుల గోసకు
గాయపడరా ఇప్పుడే ఈ అడవి తల్లి రక్షకు
బిష్ణోయితల్లి లక్ష్యమై.. ॥గాయ॥
అంబటి వెంకన్న పాటలు
380