కరకర పొద్దోలె...
కరకర పొద్దోలె కదిలె నల్లగొండరా
కన్న రుణం దీర్చుకునే బాట నడిసెరా
ఉరిమేటి ఉప్పెనయ్యి మెరిసేటి మెరుపయ్యి
ఉద్యోగులు విద్యార్థులు గర్జించి దునికినారు
అంధకారమలుముకున్న చీకట్లను పారదోల
అమరులాశయాల బాట ఆమరణ దీక్షబూనీ
ఉద్యమాల పురిటిగడ్డ నల్లగొండ జిల్లాలో
విప్లవాల బాట నడిసి వీరుడైన పోరుబిడ్డ ॥కర॥
తెలంగాణ రాష్ట్రముకై తెగబడి కొట్లాడుతుంటే
తెర్లుజేయ వలసాంధ్రులు నిర్భంధం పెంచెనని
ప్రజాస్వామ్య దేశములో నియంతలుగా ఏలుతుంటె
మంత్రులుగా మనమింకా కలిసి ఉండెదెట్లననీ
పదవులను పట్టుకుంటే ప్రజలు ఆగమైతరనీ
పట్టిన పట్టిడువకుంట పోరాట జెండబట్టి ॥కర॥
ఢిల్లీ సర్కారు యమా ఢిల్లకి జేస్తున్నదనీ
నల్లారి కిరణన్న నకరాలు బెరిగెననీ
సకలజనులు సమ్మెజేసి సతమతమైతున్న గానీ
సచ్చిన పామోలె ఒక్క మాటన్నా జెప్పరనీ
సోనియమ్మ తెలంగాణ ఇస్తదనీ ఎదురు సూస్తె
సోయిదప్పి సీమాంధ్రుల పంచేజేరి పాయెననీ ॥కర॥
199
అంబటి వెంకన్న పాటలు