సీ. కేశవ మాధవ కృష్ణ హృషీకేశ
వామ నాచ్యుత హరి వాసుదేవ
దామోద రానిరుద్ధ జనార్ధన నృసింహ
ప్రద్యుమ్న గోవింద పద్మనాభ
నారాయణోపేంద్రధీర మధుసూధన
శ్రీధ రాధోక్షజ శ్రీశ విష్ణు
సత్పుండరీకాక్ష సంకర్షణ త్రివి
క్రమ యనునామముల్ క్రమముతోడ
గీ. నేనరుండైనఁ బఠియింప నిహపరముల
సౌఖ్య మొసఁగుదువఁట యెంతసదయమతివి
సురుచిరాకార ఉన్నవపురవిహార
రాజగోపాల రాధామనోజఖేల.90
సీ. ధరలోన నేజాతినరుఁడైన శంఖచ
క్రాంకితుఁ డై భక్తి నలరెనేని
ఛిద్రోర్ధ్వపుండ్రంబుఁ జన్నుమీఱ ధరించి
దాసనామంబునఁ దనరెనేని
మదిని అష్టాక్షరీమంతజపం బొన
రించి వనమాల వహించునేని
సద్గురుకృపచేతఁ జరమార్థవిభవంబుఁ
దెలిసి పరతంత్రుఁ డై నిలిచెనేని
గీ. యతని కలుషము లెల్లను హతముచేసి
పరమపద మిత్తువఁట యెంతసరసమతివి
సురుచిరాకార ఉన్నవపురవిహార
రాజగోపాల రాధామనోజఖేల.91
పుట:2015.370800.Shatakasanputamu.pdf/369
ఈ పుట అచ్చుదిద్దబడ్డది