పుట:భక్తిరసశతకసంపుటము 3.pdf/210

శ్రీరస్తు

యాదగిరీంద్రశతకము

ఉ.⁠

శ్రీనరసింహ దోషగజసింహ రమేశ మహానుభావ యో భానుసహస్రతేజ భవబంధవిమోచన భక్తరక్షణా దీనదయాపరా సుగుణదీపిత తావకపాదపద్మముల్ ధ్యానము జేసి నిన్ను మది దల్చెద యాదగిరీంద్ర మ్రొక్కెదన్.

⁠ 1

చ.⁠

యతిగణప్రాసలక్షణరహస్య మెఱుంగను బద్యశైలియున్ మితముగ శబ్దసంతతులు మేలుగఁ గూర్పు రహస్య మింతయున్ మతిని గ్రహింపకే తమను మానసమందున సంతతంబు నీ క్షితి గడునమ్మియుంటిగద శ్రీహరి యా...

⁠ 2

ఉ.⁠

నీదుబలంబుఁ జూచుకొని నిక్కముగా రచియింపఁ బూనితిన్ మేదిని నాదుజిహ్వపయి మీకృపతోడ సుశబ్దసంగతుల్ మోదముతోడ గూర్చి యిఁక ముందు జను ల్గని మెచ్చునట్లుగాఁ బాదుగఁ జేయ నీదె సుమి భారము యా...

⁠ 3