ఈ పుట అచ్చుదిద్దబడ్డది
రేకు: 0201-04 దేసాళం సం: 03-004 కృష్ణ
పల్లవి:
ఎక్కడ చూచిన వీరే యింటింటి ముంగిటను
పెక్కుచేఁతలు సేసేరు పిలువరే బాలుల
చ. 1:
పిన్నవాఁడు కృష్ణుడు పెద్దవాడు రాముఁడు
వన్నె నిద్దరమడలవలె నున్నారు
వెన్నలు దొంగిలుదుర వీఁడు వాఁడు నొక్కటే
పన్నుగడై వచ్చినారు పట్టరే యీ బాలుల
చ. 2:
నల్లనివాఁడు కృష్ణుడు తెల్లనివాఁడు రాముఁడు
అల్లదివో జోడుకోడెలై వున్నారు
వెల్లవిరై తిరిగేరు వేరు లే దిద్దరికిని
పెల్లుగ యశోదవద్దఁ బెట్టరె యీబాలుల
చ. 3:
రోలఁ జిక్కె నొకఁడు రోకలి వట్టె నొకఁడు
పోలిక సరిబేసికిఁ బొంచు వున్నారు
మేలిమి శ్రీవేంకటాద్రి మించిరి తానే తానై
ఆలించి నె(యె?)వ్వరి నేమి ననకురే బాలుల
