ఈ పుట అచ్చుదిద్దబడ్డది
రేకు: 0208-01 ముఖారి సం: 03-043 అధ్యాత్మ
పల్లవి:
పుట్టించేవాఁడవు నీవే పోరులు వెట్టేవు నీవే
యెట్టు నేరుచుకొంటివిది నీ వినోదమా
చ. 1:
కొందరు దేవతలును కొందరు రాక్షసులును
ఇందరి కంతర్యామి వెప్పుడు నీవు
అంది కోప మొకరిపై అట్టే ప్రసాద మొకరి
కిందులోనే పక్షపాతమిది నీకే తగును
చ. 2:
నరకమనుచుఁ గొంత నగి స్వర్గమని కొంత
నిరతి గురిసేసేవు నీకుక్షిలోనే
ధరఁ జీఁకటొకవంక తగ వెన్నెలొకవంక
నెరపేవు నీ మాయ నీకే తెలుసు
చ. 3:
దాసపరిపాలనము తగు దుష్టశిక్షణము
వాసిఁ గైకొంటివి నీకు వశమై రెండు
దోసము నీవల్ల లేదు తొలుతే శ్రీవేంకటేశ
సేసినవారి పుణ్యమే చిత్తానఁ బెట్టితివి