ఈ పుట ఆమోదించబడ్డది
రేకు: 0247-02 సామంతం సం: 03-267 శ్రీహరి పరివారము
పల్లవి:
దాసవర్గముల కెల్లా దరిదాపు మీరె కాన
వాసికి నెక్కించరాదా వసుధలో మమ్మును
చ. 1:
సేనాధిపతి నీవు చేరి విన్నవించరాదా
శ్రీనాథునికి నేము సేసే విన్నపము
ఆనుక భాష్యకారులు అట్టే మీరుఁ జేయరాదా
మానక విన్నపము మా మనవి చనవులు
చ. 2:
వేయినోళ్ల భోగి నీవు విన్నపము సేయరాదా
వేయేసి మా విన్నపాలు విష్ణునికిని
ఆయితమై గరుడఁడ అట్టే మీరుఁ జేయరాదా
యేయెడ విన్నపము మా కేమి వలసినాను
చ. 3:
దేవులమ్మ యిందిర మాదిక్కై విన్నవించరాదా
శ్రీవేంకటపతికి చిత్తమందను
ఆవేళ శేషాచలమ అట్టే మీరుఁ జేయరాదా
యీవేళ మా విన్నపము లీడేరె నిఁకను