ఈ పుట ఆమోదించబడ్డది
రేకు: 0245-05 పాడి సం: 03-258 కృష్ణ
పల్లవి:
శిష్టరక్షణమును దుష్టనిగ్రహమును
సృష్టించె నొక్కవేళనే శ్రీజయంతినాఁడు
చ. 1:
హరి కృష్ణావతారమందినయంతలోనే
పరమ మునులకెల్ల భయముడిగెను
తెరలి దైత్యులగుండె దిగులుచొచ్చె నత్తరి
సిరుల మించినయట్టి శ్రీజయంతినాఁడు
చ. 2:
గోవిందుఁడు వసుదేవుకొడుకైన యప్పుడే
గోవులు రంకెలువేసె గొల్లపల్లెను
నోవితోడఁ గంసునికి నూరునిండెఁ జూడఁగానె
చేవలు మీరినయట్టి శ్రీజయంతినాఁడు
చ. 3:
నారాయణుఁడు భువి నరుఁడు దాఁ గాఁగానే
మేరఁ బాండవు లెచ్చిరి మేనవావిని
కౌరవులపని దీరె కమ్మి శ్రీవేంకటేశుఁడు
చేరువనే మెరయఁగ శ్రీజయంతినాఁడు