ఈ పుట ఆమోదించబడ్డది
రేకు: 0235-06 లలిత సం: 03-203 అధ్యాత్మ
పల్లవి:
తెగక పరమునకుఁ దెరువులేదు
పగయెల్లా విడువక భవమూఁ బోదు
చ. 1:
కన్నుల యెదుటనున్న కాంచనముపై మమత
వున్నంతదడవు మోక్ష మొనగూడదు
అన్నముతోడి రుచుల యలమట గలదాఁకా
పన్నిన సుజ్ఞానము పదిలము గాదు
చ. 2:
పక్కనున్న కాంతల భ్రమగల కాలము
మిక్కిలి శ్రీహరిభక్తి మెరయలేదు
వెక్కసపు సంసారవిధి నున్నంతదడవు
నిక్కి పరమధర్మము నిలుకడ గాదు
చ. 3:
చిత్తము లోపలి పలుచింతలు మానినదాఁకా
సత్తుగా వైరాగ్యము సమకూడదు
యిత్తల శ్రీవేంకటేశుఁ డేలిన దాసులకైతే
హత్తి వైకుంఠపదవి అప్పుడే కలదు