ఈ పుట అచ్చుదిద్దబడ్డది
రేకు: 0386-01 రామక్రియ సం: 04-498 కృష్ణ
పల్లవి:
కంటిఁగంటి వీఁడివో కని కృతార్థుఁడనైతి
వింటి నిందరిచేతా నీ విట్ఠలేశు సుద్దులు
చ. 1:
యీతఁడా గోవర్ధనమెత్తిన పసిబాలుఁడు
కాతరీఁ డీతఁడా గోపికా వల్లభుఁడు
పూతన నీతఁడా పట్టి పొరిగొన్నయట్టివాఁడు
చేత గచ్చకాయలాడీ శ్రీ విట్ఠలేశుఁడు
చ. 2:
యీ దేవుఁడా కుచేలుని కిష్ట సంపదిచ్చినాఁడు
పోదిగొని యీ దేవుఁడా భూభార మడఁచినాఁడు
వేదమయుఁ డీ దేవుఁడా విశ్వరూపు చూపినాఁడు
సేదదేరీ మహిమల శ్రీ విట్ఠలేశుఁడు
చ. 3:
యీ మూరితా పాండురంగ మిరవై వుండినవాఁడు
కామించీ మూరితి శ్రీ వేంకటగిరి నున్నవాఁడు
దోమటి నీమూరితే యాధ్యులుపాట మెచ్చినాఁడు
క్షేమముతో వరాలిచ్చీ శ్రీ విట్ఠలేశుఁడు