ఈ పుట అచ్చుదిద్దబడ్డది
రేకు: 0384-04 మాళవిగౌళ సం: 04-490 హనుమ
పల్లవి:
అవధారు చిత్తగించు హనుమంతుఁడు వీఁడె
భువిలోన గలశాపుర హనుమంతుఁడు
చ. 1:
రామ నీ సేవకుఁ డిదె రణరంగ ధీరుఁడు
ఆముకొన్న సత్వగల హనుమంతుఁడు
దీమసాన లంక సాధించి వుంగరము దెచ్చె
కామిత ఫలదుఁడు యీ ఘన హనుమంతుఁడు
చ. 2:
జానకీరమణ సప్తజలధులు లంఘించి
ఆనుక సంజీవి దెచ్చె హనుమంతుఁడు
పూని చుక్కలెల్లా మొలపూసలుఁగాఁగఁబెరిగి
భాను కోటి కాంతితోఁ జొప్పడు హనుమంతుఁడు
చ. 3:
యినవంశ శ్రీ వేంకటేశ నీ కరుణతోడ
అనుపమ జయశాలి హనుమంతుఁడు
పనిపూని ఇటమీఁది బ్రహ్మపట్టమునకు నీ -
యనుమతిఁ గాచుకున్నా డదె హనుమంతుఁడు
