ఈ పుట అచ్చుదిద్దబడ్డది
రేకు: 0287-3 రామక్రియ సం: 09-219
పల్లవి:
ఏల నీవు చిన్నఁబొయ్యే వేఁటి కానలు వెట్టేవు
జాలిఁ బెట్టి బొమ్మలను జంకించేనా
చ. 1:
అలిగి నీతో మాటలాడ కెంతవుండినాను
చలములు గడు నేము సాదించేమా
నిలిచి నేఁ గడు నిన్ను నేరము లె న్నెంచినాను
బలుములు చూపి యిట్టె భ్రమయించేమా
చ. 2:
యెనయక కోపాన నే యింటిలోనె వుండినాను
వెనక నీ చేఁతలు నేవెళ్ల వేసేనా
మనసునఁ గాఁతాళించి మంకులు నే నెరపిన
పెనఁగి పిలిచి నీతో బీరము లాడేనా
చ. 3:
పదరి నీతో నెంత పంతము నే నాడినాను
అదన నిన్నుఁ గూడక అలయించేనా
యెదుట శ్రీవెంకటేశ యిటు నన్నుఁ గలసితి
వుదుటున నే నీతో నోప ననేనా