రేకు: 0253-01 గుండక్రియ సం: 03-302 హనుమ
పల్లవి : |
ఘనుఁడాతఁడా యితఁడు కలశాపురము కాడ
హనుమంతుఁ డితఁడా అంజనాతనయుఁడు
|
|
చ. 1: |
పెడచేత లోచేత బెరసి కొందరిఁ గొట్టె
అడరి దానవుల హనుమంతుఁడు
బెడిదంపుఁ బెనుదోఁక బిరబిరఁ దిప్పి మొత్తె
అడఁగ మాల్యవంతు హనుమంతుఁడు
|
|
చ. 2: |
దాకాల మోఁకాలఁ దాటించెఁ గొందరి
ఆకాశవీధినుండి హనుమంతుఁడు
పైకొని భుజములఁ బడఁదాఁకెఁ గొందరి
ఆకడ జలధిలోని హనుమంతుఁడు
|
|
చ. 3: |
అరుపుల నూరుపుల నందరిఁ బారఁగఁ దోలె
ఔరా సంజీవికొండ హనుమంతుఁడు
మేరతో శ్రీవేంకటాద్రిమీఁది దేవుని బంటు
ఆరితేరిన బిరుదు హనుమంతుఁడు
|
|
రేకు: 0253-02 బౌళి సం: 03-303 అధ్యాత్మ, గురు వందన
పల్లవి : |
హరి దగ్గరనే వున్నాఁ డందాఁకఁ బారనీదు
కురచలోనే మగుడు గోవిందు మాయ
|
|
చ. 1: |
చెనకి పంచేంద్రియపు చెరువు లైదింటికి
మనసనెడి దొకటి మహా ప్రవాహము
దినముఁ బారుచునుండు దిగువకు వెళ్లలేదు
తనలోనే తానిగురు దైవమాయ
|
|
చ. 2: |
తూలని పంచభూతాల తోఁట లైదింటికి
కాలమనియెడి దొక్కకాలువ వారుచునుండు
నేలాఁ దడియదు నీరూఁ దివియదు
తోలుఁదిత్తికే కొలఁది దొరకొన్న మాయ
|
|
చ. 3: |
ముట్టి పంచప్రాణముల మొలక లైదింటికి
పుట్టుగులనియేటి యేరు పొదలి పారుచునుండు
చెట్టుచెట్టుకే కొలఁది శ్రీవేంకటేశ్వరుఁడు
నట్టనడుమ నున్నాఁడు నాననీదు మాయ
|
|
రేకు: 0253-03 పాడి సం: 03-304 రామ
పల్లవి : |
రామభద్ర రఘువీర రవివంశతిలక నీ-
నామమే కామధేనువు నమో నమో
|
|
చ. 1: |
కౌసల్యానందవర్ధన ఘన దశరథసుత
భాసుర యజ్ఞరక్షక భరతాగ్రజ
రాసికెక్క(క్కు?)కోదండరచన విద్యాగురువ
వాసితో సురలు నిను వడి మెచ్చేరయ్యా
|
|
చ. 2: |
మారీచసుబాహుమర్దన తాటకాంతక
దారుణవీరశేఖర ధర్మపాలక
కారుణ్యరత్నాకర కాకాసురవరద
సారెకు వేదవిదులు జయ వెట్టేరయ్యా
|
|
చ. 3: |
సీతారమణ రాజ శేఖరశిరోమణి
భూతలపు టయోధ్యాపురనిలయా
యీతల శ్రీవేంకటాద్రి నిరవయిన రాఘవ
ఘాత నీ ప్రతాపమెల్లాఁ గడు నిండెనయ్యా
|
|
రేకు: 0253-04 బౌళి సం: 03-305 అధ్యాత్మ
పల్లవి : |
ఎట్టు వలసినాఁ జేయు మేమీ నననేరమయ్య
వొట్టిన నామనసు నీకొప్పన సుమ్మయ్యా
|
|
చ. 1: |
అదిగో శ్రీహరి నీ వంపిన యింద్రియాలకు
చెదరక నేము పంపు సేతుమయ్యా
వెదకి యాసలకెల్లా వెట్టియుఁ జేతుమయ్య
మదిమది నే నీ మాయకు లోనయ్యా
|
|
చ. 2: |
దేవ నీవిచ్చినయట్టి దేహపుటూరిలోన
చేవమీరఁ గాఁపురము సేసేమయ్య
ఆవల నీ కర్మముల కప్పనము నత్తుమయ్య
ఆవటించి కామాదుల కాన మీరమయ్యా
|
|
చ. 3: |
నిన్నుఁ దలచుటకంటే నీవుచెప్పిన పనులే
యెన్నికఁ జేసినదే యెక్కుడయ్యా
అన్నిటా శ్రీవేంకటేశ ఆత్మలో నున్నాఁడవు
విన్నపములేల యిది విడువమయ్యా
|
|
రేకు: 0253-05 గుజ్జరి సం: 03-306 వైరాగ్య చింత
పల్లవి : |
ఇతని మఱచితిమి యెదుటనే యుండఁగ యిన్నాళ్లును నే మెరఁగక
ప్రతిలేదితనికి జీవకోట్లకుఁ బ్రాణబంధుఁ డితఁడు
|
|
చ. 1: |
ముందు నేను ఘనగర్బనరకమున మునిఁగియున్ననాఁడు
బొందితోడనే సుఖదుఃఖంబులఁ బొరయు తోడునీడితఁడు
అంది స్వర్గనరకాదులు చొచ్చిన అక్కడఁ దా వెనువెంటనే
చందపు నాయాతుమలోఁ బాయని సర్వాత్మకుఁ డితడే
|
|
చ. 2: |
ఆని పట్టి నేఁ బాపపుణ్యములు అనుభవించవలెనన్నప్పుడు
మానుపనొల్లఁడు తాఁ బెరరేఁచును మతి కనుకూలం బితఁడు
నానావిధులనుఁ బొరలి యలపుతో నలి నే నిద్రించేటప్పుడు
తానును ఆపరిణామంబులకు తగులైవుండును యీతఁడు
|
|
చ. 3: |
తలఁచిన దగ్గరుఁ దడవక యుండిన దవ్వయివుండు నితఁడు
కలసి మెలసి ఇహపరము లొసంగఁగఁ గాచుకవుండును యీతఁడు
మెలఁగుచు సాకారముతో నున్నాఁడు మేటిశ్రీవేంకటపతి యీతఁడు
వలసిన వావులరూపులు దాల్చినవాఁ డొకఁడేపో యీతఁడు
|
|
రేకు: 0253-06 గుండక్రియ సం: 03-307 విష్ణు కీర్తనం
పల్లవి : |
కడనుండి రావు కానివి నైనవి
వుడుగని దయ నీ దొకటే కలది
|
|
చ. 1: |
హరి నీ చక్రంబంటిన యపుడే
సొరిది నసురలే సురలైరి
నిరతపు చీఁకటినిండిన మింటను
వెరవున రవిచే వెలుఁగైనట్లు
|
|
చ. 2: |
తతి నీ నామము దలఁచినవారిఁ
అతిపాపమె పుణ్యంబాయ
గతియై పరుసముఁ గదిసిన లోహమె
ప్రతిలేక ధరణిఁ బసిఁడియైనట్లు
|
|
చ. 3: |
కొంకక నిను నిటు గొలిచిన మనుజులె
అంకెల శుకాదులైనారు
యింకను శ్రీవేంకటేశ నీజగము (?)-
సంకల్పమే మోక్షంబై నిలిచె
|
|