తాళ్ళపాక పదసాహిత్యం/మూడవ సంపుటం/రేకు 238
రేకు: 0238-01 కన్నడగౌళ సం: 03-216 అధ్యాత్మ
పల్లవి:
ఏమిసేతు నాభాగ్య మిట్లున్నది
నేమమేమీ నెరఁగను నీవే గతి యిఁకను
చ. 1:
అగపడి నిరంతర మలవాటైన జగత్తు
మొగమునఁ గట్టినట్టు మొగి మరవనీదు
తగిలి నిన్నెటువలె ధ్యానము సేతు నేను
అగడు సేసి సహాయముగాదు మనసు
చ. 2:
విడువక యెల్లప్పుడూ విడిదలైన దేహము
మెడఁ గట్టినట్టున్నది మెలఁగీ నురులదు
వొడయఁడ నీవూడిగె మొదిగి నేనెట్టు సేతు
అడరి కప్పిన నీ మాయాఁ దోడుగాదు
చ. 3:
వొద్దనే పెక్కుగాలము పూనిన పురాకృతము
చద్దిమూఁటై యనుభవించఁగఁ జేసీ మానదు
అద్దుక శ్రీవేంకటేశ అంతర్యామివి నీవు
వొద్దికతో రక్షించు నావోజాఁ దోడుగాదు
రేకు: 0238-02 రామక్రియ సం: 03-217 అధ్యాత్మ
పల్లవి:
ఏలికె విందరికి యీ దేహభూమి నీది
మేలు అన్ని మట్టుపెట్టి మించరాదా జీవుఁడ
చ. 1:
వెలిఁబడ్డ యింద్రియాల వెలయ లోనికిఁ బిల్చి
కొలువులు సేయించుకొనరాదా
కలఁచెడి లోలోని కామాదిశత్రువుల
బెళకనీకడ్డపెట్టింపించరాదా జీవుఁడ
చ. 2:
అట్టే పరువుదోలిన ఆసలనే గుఱ్ఱముల
గట్టిగ లోలాయమునఁ గట్టుకోరాదా
వొట్టి యెదుట పౌఁజులై వుండిన భోగములను
ముట్టి యంతర్యామికిచ్చి మొక్కరాదా జీవుఁడ
చ. 3:
పంపువెట్టి దండంపిన బలు నీ వుద్యోగాల-
గుంప గూర్చి ముక్తి చూరగొనరాదా
ఇంపుల శ్రీవేంకటేశుఁడితఁడే సర్వకర్త
సొంపుగ భావించి చక్కఁజూడరాదా జీవుఁడ
రేకు: 0238-03 ధన్నాసి సం: 03-218 అధ్యాత్మ
పల్లవి:
తప్పించుకోరా దిఁక దైవమే గతి
యెప్పుడు నుద్ధరించేవా రెవ్వరును లేరు
చ. 1:
మలసి దేహానందమే మరిగిన యాత్మకు
తొలుత బ్రహ్మానందము దొరకదు
అలవాటై క్షుద్రభోగాలందుఁ జిక్కిన యాత్మకు
బలిమి విరతిఁ బొంద బలపడదు
చ. 2:
సర్వదా బ్రహ్మాండములోఁ జరియించే యాత్మకు
నిర్వహించి వెడలఁగ నేరుపు లేదు
వుర్వి లోపలి చింతలుడుగని యాత్మకు
నిర్వికారభావము నెలకొనదు
చ. 3:
విరసవర్తనలనే వెలసేటి యాత్మకు
పరగఁ బేదలమీఁది భక్తి పుట్టదు
ధరలో శ్రీవేంకటేశుదాసుఁడుగాని యాత్మకు
వెర పేమిటా లేదు వెదకి చూచినను
రేకు: 0238-04 సాళంగనాట సం: 03-219 శరణాగతి
పల్లవి:
నీవారైనవారికి నీపై భక్తేకాక
భావించ నేరక వట్టిభ్రమఁ బడవలెనా
చ. 1:
కరుణానిధి నీవు గలిగివుండఁగాను
తిరుమంత్రమే నాకు దిక్కయివుండఁగా
వరుస నాచార్యుఁడు వహించుక వుండఁగాను
పరగఁ దపము చేసి బడలఁగవలెనా
చ. 2:
కమలాక్ష నీముద్రలే కాచుక నాకుండఁగాను
అమరి దాస్యము కాణాచై వుండఁగా
తమితోడ వైష్ణవులు దాపుదండై వుండఁగాను
తెమలి తీర్థాలెల్లా ద్రిష్టించవలెనా
చ. 3:
శ్రీవేంకటేశ్వర నీసేవే గతియై యుండఁగా
ఆవటించి నుతి వుపాయమై వుండఁగా
తావులనే శరణనే ధర్మము రక్షించఁగాను
వేవేలు దానాలు చేసి వేఁడుకొనవలెనా
రేకు: 0238-05 ముఖారి సం: 03-220 ఉపమానములు
పల్లవి:
పరమాత్మ నిన్ను గొల్చి బ్రదికేము
విరసపు జాలిఁ జిక్కి వెతఁబడనోపము
చ. 1:
మగఁడు విడిచినా మామ విడువనియట్లు
నగి నామనసు రోసినా లోకులు మానరు
తగిలేరు పొగిలేరు దైన్యమే చూపేరు
మొగమోటలను నేను మోసపోవనోపను
చ. 2:
పొసఁగ దేవుఁడిచ్చినా పూజరి వరమీఁడు
విసిగి నే విడిచినా విడువరు లోకులు
కొసరేరు ముసరేరు కోరిక దీర్చుమనేరు
పసలేని పనులకు బడల నేనోపను
చ. 3:
నుడుగులు దప్పినా నోముఫల మిచ్చినట్టు
కడఁగి వేఁడుకొన్నాఁ గానిమ్మనరు లోకులు
తడవేరు తగిలేరు తామే శ్రీవేంకటేశ
బుడిబుడి సంగాతాలఁ బొరల నేనోపను
రేకు: 0238-06 భైరవి సం: 03-221 వైరాగ్య చింత
పల్లవి:
కరుణానిధి నీవే కనుఁగొంచునున్నాఁడవు
యిరవై నాలో నున్నాఁడ వేది గతి యిఁకను
చ. 1:
పేరుచున్నవి నాలోనఁ బెక్కు వికారములు
వూరుచున్నవెన్నైనా వూహలెల్లాను
చేరుచున్నవొక్కొక్కటే సేనాసేనకోరికలు
యీరీతి నున్నాఁడ నాకు నేది గతి యిఁకను
చ. 2:
పట్టుచున్నవి నానాప్రకృతుల వోజలు
పుట్టుచున్నవి యనేకభోగేచ్ఛలు
చుట్టుకొనుచున్నవి సులభపు వేడుకలు
యిట్టివి నానడతలు యేది గతి యిఁకను
చ. 3:
సందడింపుచున్నవి సారెకు నా మమతలు
ముందువెనకై వున్నవి మోహాలెల్లా
చెందె నీపై భక్తి నేఁడు శ్రీవేంకటేశ్వర
యెందునూ నీవే కాక యేది గతి యిఁకను