తాళ్ళపాక పదసాహిత్యం/మూడవ సంపుటం/రేకు 218
రేకు: 0218-01 గుండక్రియ సం: 03-096 అధ్యాత్మ
పల్లవి:
వివరము మాలినట్టి వెఱ్ఱిదేహి తొల్లి
జవకట్టినంతే కాక చండ పోరనేఁటికే
చ. 1:
మనసంతే మంగళము మరి యెంత పొరలినా
తనువు కొలఁదియే సత్వములెల్లాను
తన కలిమెంచుకోక తగని మురిపెముల
పెనఁగఁబోతే తీపు పిప్పిలోనఁ గలదా
చ. 2:
చెంది విత్తిన కొలఁదే చేరి మొలచేటి పైరు
అంది ఆఁకటి కొలఁదే ఆహారమెల్ల
ముందువెనక చూడక మొక్కలపు పరువేల
అందని మానిపంటికి నాసపడవచ్చునా
చ. 3:
శ్రీవేంకటేశ్వరుఁ గొలిచిన కొలఁదియే మేలు
భావించ నాతఁడిచ్చేది భాగ్యమెల్లాను
వేవేలు మొక్కులేల వెస నానాఁటికి నెల్ల
తోవగాని తోవఁ బోతే తుదకెక్కఁగలదా
రేకు: 0218-02 సామంతం సం: 03-097 శరణాగతి
పల్లవి:
ఈ తగవే నాకు నీకు నెంచి చూచితే
కాతరపు జీవులకుఁ గలదా వివేకము
చ. 1:
భారము నీది గనక పలుమారుఁ బాపములే
చేరి మొక్కలాన నేఁ జేసితిని
పేరడిఁ దల్లిదండ్రులు బిడ్డ లేమి సేసినాను
వోరుచుక ముద్దు సేసుకుందురు లోకమున
చ. 2:
కావ నీవు గలవని కడదాఁకా నేరములే
వేవేలు సేసితిని వెఱవక
భావించుక యింటిదొర పసురము దెంచుకొని
యేవిధిఁ బైరుమేసినా నెగ్గుసేయఁ డతఁడు
చ. 3:
పుట్టించేవాఁడవు నీవు పొదలేవారము నేము
యెట్టుండినా నీకుఁ బోదు యెన్నటికిని
వొట్టుక శ్రీవేంకటేశ వోడఁగట్టిన దూలము
అటునిట్టు బొరలినా నండవాయ దెపుడు
రేకు: 0218-03 లలిత సం: 03-098 అధ్యాత్మ
పల్లవి:
ఏఁటి నేను యేఁటి బుద్ధి యెక్కడి మాయ
వీటిఁ బొయ్యే వెఱ్ఱిఁ గాను వివేకిఁ గాను
చ. 1:
ఆరసి కర్మము సేసి అవి(ది?) నన్నుఁ బొదిగితే
దూరుదుఁ గర్మము గొంది దూరుచు నేను
నేరక లంపటములు నేనే కొన్నిగట్టుకొని
పేరడిఁ బరులనందుఁ బెట్టరంటాను
చ. 2:
యెక్కుడు నా దోషములు యెన్నైనా వుండఁగాను
వొక్కరి పాపము లెంతు వూరకే నేను
తిక్కవట్టి నాకు నాకే దేవతలకెల్లా మొక్కి
వొక్కరివాఁడఁ గాకుందు వుస్సురనుకొంటాను
చ. 3:
విరతిఁ బొందుదుఁ గొంత వేరే సంసారముఁ జేతు
యెరవులవాఁడనే యెప్పుడు నేను
అరిది శ్రీవేంకటేశుఁ డంతలో నన్ను నేలఁగా
దొరనైతి నధముఁడఁ దొల్లే నేను
రేకు: 0218-04 భైరవి సం: 03-099 వైరాగ్య చింత
పల్లవి:
ఆతఁడు భక్తసులభుఁ డచ్యుతుఁడు
రాతిగుండెవాఁడుగాఁడు రంతు మానుఁ డిఁకను
చ. 1:
జీవుఁడా వేసరకు చిత్తమా జడియకు
దైవము గరుణించఁ దడవు గాదు
తోవ చూపె మనకు తొల్లే ఆచార్యుఁడు
కావలసినట్లయ్యీఁ గలఁగకుఁ డిఁకను
చ. 2:
కాలమా వేగిరంచకు కర్మమా నన్నుమీరకు
పాలించ దైవానకు నే భార మిఁకను
ఆలించి తిరుమంత్రమే ఆతని నన్నుఁ గూరిచె
వేళగాని అందాఁకా వేసరకుఁ డిఁకను
చ. 3:
వెఱవకు దేహమా వేసరకు ధ్యానమా
యెఱిఁగి శ్రీవేంకటేశుఁ డెడసిపోఁడు
తఱి నిహపరము లితనిదాసు లిచ్చిరి
గుఱియైతి నిన్నిటికిఁ గొంకకుఁడీ ఇఁకను
రేకు: 0218-05 సాళంగం సం: 03-100 శరణాగతి
పల్లవి:
పలువిచారములేల పరమాత్మ నీవు నాకు
గలవు కలవు వున్నకడమ లేమిటికి
చ. 1:
నీ పాదముల చింత నిబిడమైతేఁ జాలు
యే పాతకములైన నేమి సేసును
యేపార నీ భక్తి ఇంత గలిగినఁ జాలు
పైపై సిరు లచ్చటఁ బాదుకొని నిలుచు
చ. 2:
సొరిది నీ శరణము చొచ్చితినంటేఁ జాలు
కరుణించి యప్పుడట్టే కాతువు నీవు
సరుస నీముద్రలు భుజములనుంటేఁ జాలు
అరుదుగాఁ జేతనుండు అఖిలలోకములు
చ. 3:
నేరక వేసినఁ జాలు నీ మీఁద నొకపువ్వు
కోరిన కోరికలెల్లఁ గొనసాగును
మేరతో శ్రీవేంకటేశ మిమ్ముఁ గొలిచితి నేను
యేరీతి నుండినఁ గాని యిన్నిటా ఘనుఁడను
రేకు: 0218-06 బౌళి సం: 03-101 శరణాగతి
పల్లవి:
ఇందుకంటే మరి యిఁకలేదు హితోపదేశము వో మనసా
అంది సర్వసంపన్నుఁడు దేవుఁడు ఆతని కంటే నేరుతుమా
చ. 1:
కల దొకఁటే ధర్మము కల్పాంతమునకు నిలిచినది
తలఁకక మీ శరణు చొచ్చి మీ దాసుడ ననెడి దొకమాఁట
వలవని జోలే యింతాను వడి నిదిఁ గాక యేమిసేసినను
సులభ మిందునే తొల్లిటి వారలు చూరలుగొనిరదే మోక్షంబు
చ. 2:
మొదలొకటే యిన్నిటికి ముందర వెనకా వచ్చేది
వొదుగుచు గోవిందుని దాసులకు నొక్కమాటే మొక్కినఁ జాలు
తుద కెక్కనివే యితరములు దొరకొని మరేమి సేసినను
బదికి లిరిందునే పరమవైష్టవులు పలు చదువులలో వినరాదా
చ. 3:
తగులొకటే విడువరానిది తతి నెన్నటికినిఁ జెడనిది
వొగి శ్రీవేంకటపతి నామజపము వొకమాటే అబ్బినఁ జాలు
నగుబాటే యింతాను నానాఁటి కేమేమి సేసినను
తగు నీ బుద్ధుల నడచిరి మున్నిటి దైవజ్జులు పూర్వాచార్యులును