తాళ్ళపాక పదసాహిత్యం/నాలుగవ సంపుటం/రేకు 361
రేకు: 0౩61-01 రామక్రియ సం: 04-357 రామ
పల్లవి:
భళి భళి రామా పంతపు రామా నీ -
బలిమి కెదురు లేరు భయహర రామా
చ. 1:
విలువిద్య రామా వీరవిక్రమ రామా
తలకొన్న తాటకాంతక రామా
కొలయై ఖరుని తలగుండుగండ రామా
చలమరి సమరపు జయరామ రామా
చ. 2:
రవికుల రామా రావణాంతక రామ
రవిసుతముఖ కపిరాజ రామ
సవరఁగాఁ గొండలచే జలధిగట్టిన రామ
జవసత్త్వసంపన్న జానకీరామా
చ. 3:
కౌసల్యరామా కరుణానిధి రామ
భూసురవరద సంభూతరామా
వేసాలఁ బొరలే శ్రీ వేంకటాద్రి రామ
దాసులమమ్ముఁ గావఁదలకొన్న రామా
రేకు: 0361-02 లలిత సం: 04-358 వేంకటేశ్వరౌషధము
పల్లవి:
అన్నిటికి నిది పరమౌషధము
వెన్నుని నామమే విమలౌషధము
చ. 1:
చిత్తశాంతికిని శ్రీ పతి నామమె
హత్తిననిజ దివ్యౌషధము
మొత్తపు బంధవిమోచనంబునకు
చిత్తజ గురుఁడే సిద్దౌషధము
చ. 2:
పరిపరి విధముల భవ రోగములకు
హరిపాద జలమె యౌషధము
దురితకర్మములఁ దొలఁగించుటకును
మురహర పూజే ముఖ్యౌషధము
చ. 3:
యిల నిహపరముల నిందిరావిభుని -
నలరి భజింపుటె యౌషధము
కలిగిన శ్రీ వేంకటపతి శరణమే
నిలిచిన మాకిది నిత్యౌషధము
రేకు: 0361-03 సామంతం సం: 04-359 వేంకటగానం
పల్లవి:
ఎల్లలోకములవారి కేలిక దానే
కొల్లగా వరములిచ్చే గురుతైన దైవము
చ. 1:
కొండల కోనల లోన కోనేటి సరిదండ
మెండైన బంగారు మేడలలోన
నిండు జవ్వనము తోడి నెలఁత కౌఁగిటలోన
వుండి జగమెల్ల నేలీ నుద్దండ దైవము
చ. 2:
నాలుగు చేతుల తోడ నవ్వుల మోముతోడ
సోలి సంకుఁజక్రముల సొంపుతోడ
నేలమిన్నునొకటై నిలుచున్న రూపుతోడ
పాలుపడి మెరసీని ప్రత్యక్ష దైవము
చ. 3:
సంపదలు కడుమించి చవులతో నారగించి
జొంపపు విరుల పూజ సొంపుమించి
యింపుల శ్రీవేంకటాద్రి నిరవై వున్నాఁడు వీఁడె
పంపుడు దేవతలతోఁ బ్రతిలేని దైవము
రేకు: 0361-04 లలిత సం: 04-360 శరణాగతి
పల్లవి:
బల్లిదులు నీకంటెఁ బరులున్నారా నన్నుఁ
దొల్లిటిబారి నింకఁ దోయకు మోయయ్య
చ. 1:
చిక్కుల భవములఁ జెరఁజిక్కి వోపలేక
నిక్కి నీమరఁగు చొచ్చి నిలిచితిని
అక్కజమై యల్లనాఁడే అప్పులకర్మములెట్ల
ఇక్కడనె చుట్టుముట్టీ నేమిసేతునయ్యా
చ. 2:
లచ్చి సంసారమునకు లగ్గమచ్చి తీరలేక
యిచ్చట నిన్నుఁగొలిచి యెక్కువై తిని
పొచ్చముల నల్లనాఁటిపూఁట దీరదని కొన్ని
బచ్చన బంధాలు వచ్చెఁ బాఁపగదవయ్య
చ. 3:
అంచల నింద్రియముల కరివెట్టి పెట్టలేక
ముంచి నీ పాదాలకు మొరవెట్టితి
పొంచిన శ్రీవేంకటేశ భువన రక్షకుఁడవు
పంచల నున్నాఁడ నన్నుఁ బాలించవయ్యా
రేకు: 0361-05 పాడి సం: 04-361 వైరాగ్య చింత
పల్లవి:
కలకాలము నిట్టేకాఁపురపు బదుకాయ
యిలదైవమా నాకెన్నఁడో నిశ్చయము
చ. 1:
గుట్టుతో వైరాగ్యమే కోరుదు నే నొకవేళ
ఱట్టున సంసారపుటాఱడి గోరుదు
ముట్టుపడి యొకచోట మనసెందు నిలువదు
యిట్టె చెంచెలుఁడ నాకు నెన్నఁడో నిశ్చయము
చ. 2:
కొంతవడి నే సత్త్వగుణమందు నెలకొందు
అంతలో రాజస గుణినై యుందును
చెంత దామసగుణము చేకొందు నొకవేళ
యింత పలువంచలు నా కెన్నఁడో నిశ్చయము
చ. 3:
వివరించి యొకవేళ వివేకివలె నుందు
ఆవల మూఢుఁడనవుదు నంతటిలోనే
తవిలి శ్రీ వేంకటేశ తగ నిన్ను దలఁచంగ
యవలఁ దొల్తేయాయ నెన్నఁడో నిశ్చయము
రేకు: 0361-06 బౌళి సం: 04-362 వైరాగ్య చింత
పల్లవి:
మానదు మతిమఱపునుఁ దెలివియు
యేనింక దైవమ యేమిసేయుదును
చ. 1:
సకల పురాణాలు శాస్త్రాలు విని విని
వొక వేళ సుజ్ఞాన మొదవును
వికటమై యంతలో విషయసుఖము గని
ఆకట కమ్మర బుద్ధి నవే కతలు
చ. 2:
పలు దుఃఖముల బాధఁబడు వారిఁ బొడగని
పలికి సంసారముపై రోసును
నలవంక సిరులలో నటియించువారిఁ జూచి
తలఁచి యాసలవెంటాఁ దగులు నంతటను
చ. 3:
యెడప కలమేల్మంగ యీ రీతి నిన్నునే
బడి బడి యలసి తిట్టె పైపై నింక
చిడుముడి నీ మీఁద శ్రీ వేంకటేశ్వర
తడవి యిట్లదయ దలఁచ కుండినను