తాళ్ళపాక పదసాహిత్యం/నాలుగవ సంపుటం/రేకు 354
రేకు: 0354-01 రామక్రియ సం: 04-315 వైరాగ్య చింత
పల్లవి:
ఎందరు సతులో యెందరు సుతులో
యిందునందు నెట్లెరిఁగే నేను
చ. 1:
మలయుచు నాయభివనములని నే
కెలననిపుడు వెదకేనంటే
పలుయోనులలో పలమారుఁబొడమిన
చలమరి నాతొలుజన్మంబులను
చ. 2:
గరిమెలఁ బాణిగ్రహణము నేసిన
సిరులచెలులఁ గలసేనంటే
తరుణుల గురుతులు తలఁపున మరచితి
పరగిన బహుకల్పంబులయందు
చ. 3:
శ్రీ వేంకటగిరి చెలువుని యాజ్ఞల
భావించియె కరిఁ బైకొంటి
తావులఁజూడగ తగిలికోర్కుల
భావరతుల బెంబడి మనసందు
రేకు: 0354-02 గుండక్రియ సం: 04-316 మాయ
పల్లవి:
కటకట హరిమాయాకల్పనెట్టిదో
తటుకునఁ బారవేసేతలఁపెందు లేదు
చ. 1:
అనంతకోటియుగాదులనుండియు
తనివోక విషయాలఁ దగిలుండినా
దినమొక్కొక్కరుచియై తీపులై పండీఁగాని
వెనుకొన్న యాత్మకు వెగ టెందు లేదు
చ. 2:
కడలేక నాలుకకుఁ గన్నయాహారములెల్ల
వోడలిలోఁ బూఁటవూఁట వొట్టుకొనినా
సడిఁ బైపై వింతవింతచవులే వెదకుఁగాని
విడువని యాత్మకు వెగ టెందు లేదు
చ. 3:
కలకాలముననుండి కాపురపు లంపటాలె
కలిమితో మెడఁగుచ్చి కట్టుకొనినా
యెలమితో శ్రీవేంకటేశ్వరునాజ్ఞల -
నలవాటైన యాత్మకలపే లేదు
రేకు: 0354-03 లలిత సం: 04-317 మనసా
పల్లవి:
నటనల భ్రమయకు నామనసా
ఘటియించుహరియే కలవాఁడు
చ. 1:
ముంచిన జగమిది మోహినీగజము
పొంచినయాస పుట్టించే దిది
వంచనల నిజమువలెనే వుండును
మంచులు మాయలే మారునాఁడు
చ. 2:
సరిసంసారము సంతలకూటమి
సొరిదిఁ బచారము చూపే దిది
గరిమ నెప్పుడుఁ గలకలమనుచుండును
మరులగువిధమే మాపటికి
చ. 3:
కందువదేహము గాని ముదియదిది
అందినబహురూప మాడేదిది
యెందును శ్రీవేంకటేశ్వరుఁడుండును
డిందుపడఁగనిదె తెరమరఁగు
రేకు: 0354-04 గుండక్రియ సం: 04-318 అధ్యాత్మ
పల్లవి:
“నిశ్చింతం పరమం సుఖ"మనుమాటేనిజమునిజముతెలియరుగాని
ఆశ్చర్యంబిది పరమయోగులకు ననుభవులకు దృష్టాంతము సుండీ
చ. 1:
కరచరణాదులుగలచైతన్యము గక్కునఁ బానుపుపైనుండి
సరుగన సడిలిన నిద్రామందము సమకూడీ నరులకటువలెనే
పరమాత్మునిపై సకలోద్యోగ వుపాయంబులు దా దిగవిడిచి
ధరఁ దానుండిన బ్రహ్మానందము తనుఁదానే పైకొనుఁజుండీ
చ. 2:
వున్నతిఁ దానొక దేశములోపలనుండి క్రితముచూచిన నవియెల్లా
అన్ని దేశములు నటుదలపోసిన యంతకుగోచరమైనట్లు
యెన్నగఁబూర్వజ్ఞానంబున సర్వేశ్వరుఁడగు హరిఁదలఁచినను
సన్నిధియగు సుజ్ఞానానందము సత్యము సత్యంబది సుండీ
చ. 3:
ననిచిన ప్రపంచకత్పములలో నానావిధముల జంతువులు
తనుఁదాఁజూడగరానిరూపు లద్దములోపలఁ గన్నట్లు
ఘనుడగు శ్రీవేంకటపతిరూపము గక్కన నెదుటనె సేవించి
అనయము తనుఁదా సంతసించుటే యాత్మానందంబిది సుండీ
రేకు: 0354-05 సాళంగనాట సం: 04-319 శరణాగతి
పల్లవి:
ఒసఁగితివిన్నియు నొకమాఁటే
వెస నిఁకఁ జేసే విన్నపమేది
చ. 1:
నారాయణ నీనామము దలఁచిన -
నీరానివరములిచ్చితివి
చేరి నిన్ను నిటు సేవించిననిఁకఁ
గోరి పడయ నిఁకఁ గోరికలేవి
చ. 2:
హరి నీకొకమరి యటు శరణంటే
గరిమల నన్నిటు గాచితివి
నిరతముగా నిఁక నిను నుతియింపుచు
అరగొరతనివి నిను నడిగేదేదో
చ. 3:
శ్రీవేంకటేశ్వర చేయెత్తిమొక్కిన
భావమే నీవై పరగితివి
యీవరుసల నీవింతటిదాతవు
ఆవలనినుఁ గొనియాడెడిదేమి
రేకు: 0354-06 భౌళి సం: 04-320 తేరు
పల్లవి:
దేవదేవోత్తముని తిరుతేరు
దేవతలు గొలువఁగా తిరుతేరు
చ. 1:
తిరువీధులేగీని తిరుతేరు
తిరుపుగొన్నట్లాను తిరుతేరు
తెరలించె దనుజులఁ దిరుతేరు
తిరిగె దిక్కులనెల్ల తిరుతేరు
చ. 2:
ధిక్కిరించీ మోతలఁ దిరుతేరు
దిక్కరికుంభా లదరఁ దిరుతేరు
తిక్కుముత్తేలకుచ్చుల తిరుతేరు
తెక్కులఁబ్రతాపించీఁ దిరుతేరు
చ. 3:
తీరిచెఁ గలకలెల్లఁ దిరుతేరు
ధీర గరుడవాహపుఁ దిరుతేరు
చేరి యలమేలుమంగతో శ్రీవేంకటేశ్వరుని -
తీరున నెలకొన్నట్టి తిరుతేరు