రేకు: 0310-01 మాళవిగౌళ సం: 04-055 తేరు
| పల్లవి : |
నానావర్ణముల నడగొండవలెను
దానవారి తేరదె తగ తిరువీధుల
|
|
| చ. 1: |
కదలే కదలె నదె గరుడధ్వజునితేరు
అదె మిన్నుమోచిన నీలాద్రివలెను
యెదిరె నెదిరె నదె యిందిరాధిపుని తేరు
కదిసి చుక్కలు మోచే కనకాద్రివలెను
|
|
| చ. 2: |
తిరిగె తిరిగె నదె దేవుదేవునితేరు
అరుదైన ఘనమందరాద్రివలెను
పరువులిడీ నదె పట్టపు శ్రీపతితేరు
విరిఁవి గైలాసపు వెండికొండవలెను
|
|
| చ. 3: |
దగ్గరె దగ్గరె నదె దైవశిఖామణితేరు
అగ్గలపు శ్రీవేంకటాద్రివలెను
అర్థమై శ్రీవేంకటేశుఁ డలమేలుమంగఁ గూడె
తగ్గులేని మొత్తపు దొంతరకొండవలెను
|
|
రేకు: 0310-02 శ్రీరాగం సం: 04-056 వైష్ణవ భక్తి
| పల్లవి : |
కాకున్న మాపాటు కడమున్నదా
నీకృపవంకనే నిలిచితిఁగాక
|
|
| చ. 1: |
యీ నాలికేకాదా యిందరి నిందించినది
శ్రీనిధి నిన్నుఁ బొగడి చెలఁగెఁ గాక
నానాపాపములు విన్న నా వీనులే కావా
దానవారి నీ కథల ధన్యమాయఁగాక
|
|
| చ. 2: |
యీ మేనేకాదా హేయపుటింతులఁ గూడె
నీముద్రలు ధరియించి నిక్కెఁగాక
యీ మనసేకాదా యిన్నిటిపైఁ బారినది
కామించి నిన్నుఁ దలఁచి కట్టువడెఁ గాక
|
|
| చ. 3: |
యీ పుట్టుగేకాదా హీనాధికములఁ బొందె
వోపి నీ దాస్యము చేరి వొప్పెఁగాక
యేపున శ్రీవేంకటేశ యిన్నినేరములు నాకుఁ
బాపఁగా నే నిన్ను నమ్మి బ్రదికితిఁగాక
|
|
రేకు: 0310-03 దేసాళం సం: 04-057 శరణాగతి
| పల్లవి : |
నేనే పో ఘనుఁడను నీకంటెను
దానవారి నీవు నాకు దైవమవు గాన
|
|
| చ. 1: |
నేరుపున నాకైతే నీ దిక్కు గలదుగాని
చేరి నీ కావల దిక్కు చెప్పి చూపఁగలదా
అరయ నీవైతే నాకు నాధారము గలవు గా
నూరకే నీకాధారము వున్నదా యెక్కడను
|
|
| చ. 2: |
నిన్నుఁ గొల్చిన సలిగె నేఁడు నాఁకు గద్దుగాని
సన్నుతి నీకు నొకరి సలిగున్నదా.
పెన్నిధి నిన్నుఁ దలఁచే పేరు నాకుఁ గద్దుగాని
వున్నదా నీకుఁ దలఁచ నొకరి పేరైనను
|
|
| చ. 3: |
యీవులెల్లా నాకైతే నియ్యఁగలవు గాక
ఆవల నీకీవులియ్య నన్యులున్నారా
శ్రీవేంకటేశ నాకు జీవాంతరాత్మవు నీవు
భావించ నంతరాత్మ యప్పటి నీకు నున్నదా
|
|
రేకు: 0310-04 గుండక్రియ సం: 04-058 వైరాగ్య చింత
| పల్లవి : |
కాయము నాదే ఆట కర్తను నే నట నా-
చాయకవి రావు నన్నే జరసీఁగాని
|
|
| చ. 1: |
తలఁచినట్టుండదు తలఁపు నాదైనాను
కులికి నన్నే పనిగొనీఁగాని
నిలిపిన యట్టుండవు నేఁడు నా మాటలే నాకు
పొలసి నన్నే కడు బొంకించీఁగాని
|
|
| చ. 2: |
కలిమి లేమెరఁగదు కాయము నాదైనాను
కొలఁదికి నేమైనాఁ గోరీఁగాని
యిల నాయంకెకు రావు యింద్రియములు నావైనా
కలసి నామర్మములే కాఁడిపారీఁగాని
|
|
| చ. 3: |
పంపు నాకుఁ జేయదు భవమిది నాదైనా
తెంపున కర్మవీధులఁ దిప్పీఁ గాని
యింపుల శ్రీవేంకటేశ యిది యరాజిక మాయ
పంపున నీకిదె మొఱ ప్రతిపాలించఁగదే
|
|
రేకు: 0310-05 గుండక్రియ సం: 04-059 శరణాగతి
| పల్లవి : |
అతఁడు లక్ష్మీకాంతుఁ డన్నియు నొసఁగుఁగాక
యితరుల వేఁడుకొంటే నేమి గలదు
|
|
| చ. 1: |
మోదముతో నొకమాని మొదలఁ బోసిన నీరు
పాదుకొని కొనకెక్కి ఫలించుఁగాక
ఆదిమూలమగుహరి నాతుమ సేవించక
యే దైవములఁగన్నా నేమి సెలవు
|
|
| చ. 2: |
తల్లి భుజించినవెల్లా తగు గర్భము శిశువు -
కెల్లగాఁగఁ బరిణామ మిచ్చుఁగాక
పుల్లము లోపలి హరి కొసగని పూజలెల్లా
వెల్లిఁ జింతపంటివలె వృథా వృథా
|
|
| చ. 3: |
వోలి నెంత జారిపడ్డా నూరకే యెవ్వరికైనా
నేలే యాధారమై నిలుచుఁగాక
తాలిమి శ్రీవేంకటేశుఁదలఁచక తలఁచినా
పాలించ నాతఁడేకాక పరులకు వశమా
|
|
రేకు: 0310-06 బౌళి సం: 04-060 అధ్యాత్మ
| పల్లవి : |
గోనెలె కొత్తలు కోడెలెప్పటివి
నానిన లోహము నయమయ్యీనా
|
|
| చ. 1: |
మున్నిటి జగమే మున్నిటి లోకమే
యెన్నఁగ బుట్టు గులివె వేరు
నన్ను నెవ్వ రున్నతి బోధించిన
నిన్న నేటనే నేనెఱిఁగేనా
|
|
| చ. 2: |
చిత్తము నాఁటిదే చింతలు నాఁటివే
యిత్తల భోగములివె వేరు
సత్తగు శాస్త్రము చాయ చూపినా
కొత్తగ నేనిఁక గుణినయ్యేనా
|
|
| చ. 3: |
జీవాంతరాత్ముఁడు శ్రీవేంకటేశుఁడే
యీవల భావనలివె వేరు
ధావతి కర్మము తప్ప దీసినా
దైవము గావక తలఁగీనా
|
|
