వసుం న చిత్రమహసం గృణీషే వామం శేవమ్ అతిథిమ్ అద్విషేణ్యమ్ |
స రాసతే శురుధో విశ్వధాయసో ऽగ్నిర్ హోతా గృహపతిః సువీర్యమ్ || 10-122-01
జుషాణో అగ్నే ప్రతి హర్య మే వచో విశ్వాని విద్వాన్ వయునాని సుక్రతో |
ఘృతనిర్ణిగ్ బ్రహ్మణే గాతుమ్ ఏరయ తవ దేవా అజనయన్న్ అను వ్రతమ్ || 10-122-02
సప్త ధామాని పరియన్న్ అమర్త్యో దాశద్ దాశుషే సుకృతే మామహస్వ |
సువీరేణ రయిణాగ్నే స్వాభువా యస్ త ఆనట్ సమిధా తం జుషస్వ || 10-122-03
యజ్ఞస్య కేతుమ్ ప్రథమమ్ పురోహితం హవిష్మన్త ఈళతే సప్త వాజినమ్ |
శృణ్వన్తమ్ అగ్నిం ఘృతపృష్ఠమ్ ఉక్షణమ్ పృణన్తం దేవమ్ పృణతే సువీర్యమ్ || 10-122-04
త్వం దూతః ప్రథమో వరేణ్యః స హూయమానో అమృతాయ మత్స్వ |
త్వామ్ మర్జయన్ మరుతో దాశుషో గృహే త్వాం స్తోమేభిర్ భృగవో వి రురుచుః || 10-122-05
ఇషం దుహన్ సుదుఘాం విశ్వధాయసం యజ్ఞప్రియే యజమానాయ సుక్రతో |
అగ్నే ఘృతస్నుస్ త్రిర్ ఋతాని దీద్యద్ వర్తిర్ యజ్ఞమ్ పరియన్ సుక్రతూయసే || 10-122-06
త్వామ్ ఇద్ అస్యా ఉషసో వ్యుష్టిషు దూతం కృణ్వానా అయజన్త మానుషాః |
త్వాం దేవా మహయాయ్యాయ వావృధుర్ ఆజ్యమ్ అగ్నే నిమృజన్తో అధ్వరే || 10-122-07
ని త్వా వసిష్ఠా అహ్వన్త వాజినం గృణన్తో అగ్నే విదథేషు వేధసః |
రాయస్ పోషం యజమానేషు ధారయ యూయమ్ పాత స్వస్తిభిః సదా నః || 10-122-08