అధర్వణవేదము - కాండము 6 - సూక్తములు 91 నుండి 100 వరకూ
| ←ముందరి అధ్యాయము | అధర్వణవేదము (అధర్వణవేదము - కాండము 6 - సూక్తములు 91 నుండి 100 వరకూ) | తరువాతి అధ్యాయము→ |
అధర్వణవేదము - కాండము 6 - సూక్తము 91[మార్చు]
ఇమం యవమష్టాయోగైః షద్యోగేభిరచర్కృషుః |
తేనా తే తన్వో రపో ऽపాచీనమప వ్యయే ||1||
న్యగ్వాతో వాతి న్యక్తపతి సూర్యః |
నీచీనమఘ్న్యా దుహే న్యగ్భవతు తే రపః ||2||
ఆప ఇద్వా ఉ భేషజీరాపో అమీవచాతనీః |
ఆపో విశ్వస్య భేషజీస్తాస్తే కృణ్వన్తు భేషజమ్ ||3||
అధర్వణవేదము - కాండము 6 - సూక్తము 92[మార్చు]
వాతరమ్హా భవ వాజిన్యుజమాన ఇన్ద్రస్య యాహి ప్రసవే మనోజవాః |
యుఞ్జన్తు త్వా మరుతో విశ్వవేదస ఆ తే త్వస్తా పత్సు జవం దధాతు ||1||
జవస్తే అర్వన్నిహితో గుహా యః శ్యేనే వాతే ఉత యో ऽచరత్పరీత్తః |
తేన త్వం వాజిన్బలవాన్బలేనాజిం జయ సమనే పరయిష్ణుః ||2||
తనూష్టే వాజిన్తన్వం నయన్తీ వామమస్మభ్యం ధావతు శర్మ తుభ్యమ్ |
అహ్రుతో మహో ధరుణాయ దేవో దివీవ జ్యోతిహ్స్వమా మిమీయాత్ ||3||
అధర్వణవేదము - కాండము 6 - సూక్తము 93[మార్చు]
యమో మృత్యురఘమారో నిరృథో బభ్రుః శర్వో ऽస్తా నీలశిఖణ్డః |
దేవజనాః సేనయోత్తస్థివాంసస్తే అస్మాకం పరి వృఞ్జన్తు వీరాన్ ||1||
మనసా హోమైర్హరసా ఘృతేన శర్వాయాస్త్ర ఉత రాజ్ఞే భవాయ |
నమస్యేభ్యో నమ ఏభ్యః కృణోమ్యన్యత్రాస్మదఘవిషా నయన్తు ||2||
త్రాయధ్వం నో అఘవిషాభ్యో వధాద్విశ్వే దేవా మరుతో విశ్వవేదసః |
అగ్నీషోమా వరుణః పూతదక్షా వాతాపర్జన్యయోః సుమతౌ స్యామ ||3||
అధర్వణవేదము - కాండము 6 - సూక్తము 94[మార్చు]
సం వో మనాంసి సం వ్రతా సమాకూతీర్నమామసి |
అమీ యే వివ్రతా స్థన తాన్వః సం నమయామసి ||1||
అహం గృభ్ణామి మనసా మనాంసి మమ చిత్తమను చిత్తేభిరేత |
మమ వశేషు హృదయాని వః కృణోమి మమ యాతమనువర్త్మాన ఏత ||2||
ఓతే మే ద్యావాపృథివీ ఓతా దేవీ సరస్వతీ |
ఓతౌ మ ఇన్ద్రశ్చాగ్నిశ్చ ర్ధ్యాస్మేదం సరస్వతి ||3||
అధర్వణవేదము - కాండము 6 - సూక్తము 95[మార్చు]
అశ్వత్థో దేవసదనస్తృతీయస్యామితో దివి |
తత్రామృతస్య చక్షణమ్దేవాః కుష్ఠమవన్వత ||1||
హిరణ్యయీ నౌరచరద్ధిరణ్యబన్ధనా దివి |
తత్రామృతస్య పుష్పం దేవాః కుష్ఠమవన్వత ||2||
గర్భో అస్యోషధీనాం గర్భో హిమవతాముత |
గర్భో విశ్వస్య భూతస్యేమం మే అగదం కృధి ||3||
అధర్వణవేదము - కాండము 6 - సూక్తము 96[మార్చు]
యా ఓషధయః సోమరాజ్ఞీర్బహ్వీః శతవిచక్షణాః |
బృహస్పతిప్రసూతాస్తా నో ముఞ్చన్త్వంహసః ||1||
ముఞ్చన్తు మా శపథ్యా3దథో వరుణ్యాదుత |
అథో యమస్య పడ్వీషాద్విశ్వస్మాద్దేవకిల్బిషాత్ ||2||
యచ్చక్షుషా మనసా యచ్చ వాచోపారిమ జాగ్రతో యత్స్వపన్తః |
సోమస్తాని స్వధయా నః పునాతు ||3||
అధర్వణవేదము - కాండము 6 - సూక్తము 97[మార్చు]
అభిభూర్యజ్ఞో అభిభూరగ్నిరభిభూః సోమో అభిభూరిన్ద్రః |
అభ్యహం విశ్వాః పృతనా యథాసాన్యేవా విధేమాగ్నిహోత్రా ఇదం హవిః ||1||
స్వధాస్తు మిత్రావరుణా విపశ్చితా ప్రజావత్క్షత్రం మధునేహ పిన్వతమ్ |
బాధేథాం దూరం నిరృతిం పరాచైః కృతం చిదేనః ప్ర ముముక్తమస్మత్ ||2||
ఇమం వీరమను హర్షధ్వముగ్రమిన్ద్రం సఖాయో అను సం రభధ్వమ్ |
గ్రామజితం గోజితం వజ్రబాహుం జయన్తమజ్మ ప్రమృణన్తమోజసా ||3||
అధర్వణవేదము - కాండము 6 - సూక్తము 98[మార్చు]
ఇన్ద్రో జయాతి న పరా జయాతా అధిరాజో రాజసు రాజయాతై |
చర్కృత్య ఈడ్యో వన్ద్యశ్చోపసద్యో నమస్య్శ్భవేహ ||1||
త్వమిన్ద్రాధిరాజః శ్రవస్యుస్త్వం భూరభిభూతిర్జనానామ్ |
త్వం దైవీర్విశ ఇమా వి రాజాయుష్మత్క్షత్రమజరం తే అస్తు ||2||
ప్రాచ్యా దిశస్త్వమిన్ద్రాసి రాజోతోదీచ్యా దిశో వృత్రహన్ఛత్రుహో ऽసి |
యత్ర యన్తి స్రోత్యాస్తజ్జితం తే దక్షిణతో వృషభ ఏషి హవ్యః ||3||
అధర్వణవేదము - కాండము 6 - సూక్తము 99[మార్చు]
అభి త్వేన్ద్ర వరిమతః పురా త్వాంహూరణాద్ధువే |
హ్వయామ్యుగ్రం చేత్తారం పురుణామానమేకజమ్ ||1||
యో అద్య సేన్యో వధో జిఘాంసన్న ఉదీరతే |
ఇన్ద్రస్య తత్ర బాహూ సమన్తం పరి దద్మః ||2||
పరి దద్మ ఇన్ద్రస్య బాహూ సమన్తం త్రాతుస్త్రాయతాం నః |
దేవ సవితః సోమ రాజన్సుమనసం మా కృణు స్వస్తయే ||3||
అధర్వణవేదము - కాండము 6 - సూక్తము 100[మార్చు]
దేవా అదుః సూర్యో ద్యౌరదాత్పృథివ్యదాత్ |
తిస్రః సరస్వతిరదుః సచిత్తా విషదూషణమ్ ||1||
యద్వో దేవా ఉపజీకా ఆసిఞ్చన్ధన్వన్యుదకమ్ |
తేన దేవప్రసూతేనేదం దూషయతా విషమ్ ||2||
అసురాణాం దుహితాసి సా దేవానామసి స్వసా |
దివస్పృథివ్యాః సంభూతా సా చకర్థారసం విషమ్ ||3||
| ←ముందరి అధ్యాయము | అధర్వణవేదము | తరువాతి అధ్యాయము→ |