ఈ పుట అచ్చుదిద్దబడ్డది
రేకు: 0194-1 కేదారగౌళ సంపుటం: 07-555
పల్లవి:
నీవు వింతవాఁడవో నే వింతదాననో
చేవదేరి నా నవ్వు సిగ్గుదెచ్చీఁ గాక
చ.1:
నీతలఁపులోనిదాన నీకు నిచ్చకురాలను
కాతరించి నీవనఁగాఁ గాదనేనా
రేతిరిమాటలకును రిచ్చలాయ నామనసు
పైతరవై అందుకొడఁబడనీదు గాక
చ.2:
కైవశమయ్యిన నేను కందువ చేఁతల నేను
వోవరిలోని వంటఁగా నోపననేనా
నీవొళ్ళివేసాలకు నిండుఁగాఁక రేఁగి లోలో
భావముఁ జలము నేఁడు పంతమాడీఁ గాక
చ.3:
ఎనసితివి రతికి నియ్యకోలు చేసుకొంటి
తనిసి నీవల్ల మరి తప్పులెంచేనా
ఘనుఁడ శ్రీ వెంకటేశ కడమదొడమలకు
అనుఁగుఁగూరిములెల్లా ఆసపడీఁ గాక
