ఈ పుట అచ్చుదిద్దబడ్డది
రేకు: 0190-1 రామక్రియ సంపుటం: 07-531
పల్లవి:
ఒంటి నీకెదురుచూచి వుందాన నేనింటిలోన
వెంటవెంటఁ దిరిగాడి వేరించనేరను
చ.1:
సిగ్గున నుందానఁ జుమ్మీ చెలువుండ నీవు నాతో
నిగ్గుల మాటాడి ప్రేమ నించుదాఁకాను
యెగ్గులేక నీకు మీఁదెత్తితి జవ్వనమెల్లా
వెగ్గళపు విన్నపాలు వేరే సేయనేరను
చ.2:
నవ్వుతానుందానఁ జుమ్మీ నాలోనియాసతో నీవు
చివ్వన తలయెత్తి చూచినదాఁకాను
యివ్వల కానుకిచ్చితి విట్టే చక్కఁదనమెల్లా
రవ్వగాఁ గొరి నిన్ను రాఁపుసేయనేరను
చ.3:
ఆసలనుందానఁ జుమ్మీ అట్టె శ్రీ వెంకటేశ
నీసరి నేఁడు గూడి మన్నించుదాఁకాను
వానుల నీకందిచ్చితి వన్నెల నామనసెల్లా
సేసవెట్టితివి మరి చింతించనేరను
