ఈ పుట అచ్చుదిద్దబడ్డది
రేకు: 0105-5 రామక్రియ సంపుటం; 07-047
పల్లవి:
ఇంత సేసెఁగా నేఁడు యింతి నీగుణములెల్లా
చెంతలనాకె పసలఁ జిక్కితిగా నీవు
చ.1:
కోపగించుకొన్నవేళ కోరి నీవు మోహించిన
ఆపెపైనాన వెట్టితే నట్టె మానేవు
పైపై నాపెమీఁది పదములు వాడితేను
మాపుదాఁకా పరాకెల్ల మానుదుగా నీవు
చ.2:
అనవసరపువేళ నాపెవారు వచ్చిరంటే
వెనుకొని యెదురుగా వెళ్ళి వచ్చేవు
పనివడి యాపె అప్పణగల మగువల
వినయపు విన్నపాలు విందువుగా నీవు
చ.3:
అలసి నిద్రించేవేళ నాపె నీవొద్దఁ గూచుంటే
పలురతులకు లోనై భ్రమతువుగా
వొలీసి శ్రీ వేంకటాద్రినుండి వచ్చి మాడువూర
మలసి నన్నుఁగూడి మన్నించితిగా
