ఈ పుట అచ్చుదిద్దబడ్డది
రేకు: 0108-1 కేదారగౌళ సంపుటం: 07-043
పల్లవి:
మాఱుజుమోమిదేఁటికి మందకుఁదనమేఁటికి
జాఱువడ నేనవ్వితే సంతసించవలదా
చ.1:
వడి నీకెమ్మోవిమీఁది వన్నెదీసినది చూచి
తొడరి వీడెమిచ్చితే దోసమాయిది
కడుచెమటల నీపై గందవొడి చల్లి తేను
జడియక నీవిందుకు సంతసించవలదా
చ.2:
కులికి నీ కన్నులపై కుంకుమవన్నెలు చూచి
బలిమిఁ బన్నీరిచ్చితే పాపమా యిది
కలసిన వేఁడి వేఁడి కాఁకలమేనటు చూచి
చలిగా నే విసరితే సంతసించవలదా
చ.3:
పిప్పియైన నీమేని పెక్కులాగులటు చూచి
ముప్పిరిఁ గళలంటితే మోసమా యిది
అప్పటి శ్రీ వేంకటేశ అలమితివిటు నన్ను
చప్పుడుగాకియ్యకొంటే సంతసించవలదా
