ఈ పుట అచ్చుదిద్దబడ్డది
రేకు: 0162-5 కన్నడగౌళ సంపుటం: 07-367
పల్లవి:
ఆతనితోనేల పంతాలాడేవే నీవు
యేతరివాఁడు గుట్టుతోనెడయఁగ నేర్చునా
చ.1:
సరమాడినవాఁడుసంగడిఁ గూచుండుఁగాక
పరగ వట్టిసిగ్గులు వడునటవే
వరుసతో మాటాడినవాఁడు చెయిచాఁచుఁగాక
శిరసువంచి చింతతో చిక్కువడునా
చ.2:
మొగముచూచినవాఁడు మోహించి పైకొనుఁగాక
బిగిసి వట్టిబీరాలు పెంచునటవే
తగుల వలచువాఁడు తమకమె చూపుఁగాక
అగడైన అడియాస లణఁచఁగఁ గలఁడా
చ.3:
చేపట్టి కూడినవాఁడు చేరిమోవియిచ్చుఁగాక
చాపలాన రతులకు జడియునటే
యేపున శ్రీ వెంకటేశుఁడిట్టె నిన్నుఁగూడె నేఁడు
కాఁపురములీడేరె గరిసించనోపునా
