ఈ పుట అచ్చుదిద్దబడ్డది
రేకు: 0162-1 సామంతం సంపుటం: 07-363
పల్లవి:
పిలిచీ రాఁగదవే ప్రియుఁడు నిన్ను
బలిమి సేసినంతనే పనులెల్లా దక్కునా
చ.1:
కలసి మెలసి వుంటే కాపురమీడేరుఁ గాక
పెలుచుఁదనాననుంటే ప్రేమ వుట్టునా
నెలఁతకు మగనితో నేస్తమే మంచిదిగాక
అలుకలు నెరపితే నట్టే విసుగరా
చ.2:
మాటలు సారెనాడఁగా మనసులెనయుఁగాక
జూటుఁదనాన నుండితే సొంపు గల్గునా
మేటిజవ్వనపువారు మేలుమీఁదివారుగాక
బూటకము చూపితేను పొందులు వొసఁగునా
చ.3:
సరసములాడఁగానే చవులు గానిపించుఁగాక
యెరపరికములైతే యెబ్బిడి గాదా
సిరుల నిన్నేలె నేఁడు శ్రీవేంకటేశ్వరుఁడు
మరిగి పాయకుండితే మచ్చికలు రేఁగవా
