ఈ పుట అచ్చుదిద్దబడ్డది
రేకు: 0106-11 సామంతం సంపుటం: 07-031
పల్లవి:
మగువలతోడిదేల మందెమేళాలు
తగినయంతే కాక తమకమేలయ్యా
చ.1:
పెక్కుమాటలాడితేను ప్రియ మెల్లాఁ జవుకౌను
యెక్కుడు సుద్దులు నన్నునేలడిగేవు
మొక్కులే సారెకునైనా మోపులై వేసటవుట్టు
యెక్కసక్యాలకుఁ బాదమేల పట్టేవయ్యా
చ.2:
విడువక నవ్వితేను వెస మొగచాటగును
అడరి మాతో సరసాలంత యేలయ్యా
యెడయక చూచితేను యెదిరికి సిగ్గువుట్టు
కడు నీయెదుటనేల కమ్ముకొనేవయ్యా
చ.3:
బలువై కౌఁగలించితే పరవశములు మించు
నెలకొని మమ్మునెంత నెట్టుకొనేవు
వెలయ శ్రీ వేంకటేశ వేమారు నన్నుఁ గూడితి
వలపులజడి యంత వంచితివో అయ్యా