ఈ పుట అచ్చుదిద్దబడ్డది
రేకు: 0151-4 శ్రీరాగం సంపుటం; 07-300
పల్లవి:
ఎవ్వరికిఁ బోరాదు యెదిరిఁజేసిన ఫలము
దివ్వెయై చేచేత దిష్టమౌఁగాని
చ.1:
వేమారు విరహులను వెతలఁ బెట్టిన ఫలము
కామునికి నేఁటేఁటఁ గనలవలసె
దీమసపుఁ గోవిలలు తెగువఁ బలికిన ఫలము
ఆమనియెడలదాఁక నణఁగుండవలసె
చ.2:
చందురుఁడు కాముకుల జాలిఁబెట్టిన ఫలము
కుందుచును నెలనెలకుఁ గొవరవలసె
మందానిలుండెదిరి మనసుగలఁచిన ఫలము
కందువగు శేషునికిఁ గాటియ్యవలసె
చ.3
రావమున దంపతుల రవ్వసేసిన ఫలము
తావిసంపెఁగకలులు తలఁకవలసె
శ్రీవెంకటేశ్వరుఁడు చెలియనిటు గూడఁగా
భావమున నిన్నియును బంతమీవలసె