ఈ పుట అచ్చుదిద్దబడ్డది
రేకు: 0149-5 వరాళి సంపుటం: 07-289
పల్లవి:
ఒకటికినుమడాయ వువిద నీబలఁగము
వొకఁడింతె మరునికి వొదుగనేమిటికి
చ.1:
గండుమీలవంటివి నీకన్నులు కంతునికైతే
గండుమీరనొక్కటెక్కెమే కలఁగకువే
అండనే వొంటితామర అతనిబాణముగాని
రెండుదామరలు నీరిచ్చలహస్తములు
చ.2:
చిలుకల తేరింతే చిత్తజునకు నీకైతే
చిలుకల పలుకులు సేనాసేన
అలులనారివిల్లు అతనికైతే నీకు
అలుల బొమ్మలవిండ్లవె రెండు గదవే
చ.3:
చిగురుఁగైదువ మరుచేతిదింతే నీకయితే
చిగురుఁబాదాలు రెండు చింతయేఁటికే
తగిలి యాతఁడు యేకతాననే వుండుఁ గాని
నిగిడి శ్రీ వేంకటేశు నీవు గూడితివి
