ఈ పుట అచ్చుదిద్దబడ్డది
రేకు: 0147-2 మాళవిగౌళ సంపుటం: 07-274
పల్లవి:
ఇన్నిటా నీవేకరాజ్యమేలుదు గాక
మన్ననకాంతవైతివి మరి యాలే వెలితి
చ.1:
ఈతల నీరమణుఁడు యే పొద్దు చూచిననిట్లే
చేతికి లోనై యుండగఁ చింతలేలా
కాతరపుఁజెలులెంత కాతాళించి దూరినాను
యేతులనందువుగాక యిఁకనేలే వెరవు
చ.2:
చెప్పినట్టుల్లాఁ జేయ చేరి యాతఁడు గలఁడు
చిప్పిల నీవు చెయిసేసుకోనేలే
పుప్పతిల్లి సవతులు వొరసి యెంత చూచినా
నెప్పుననుందువుగాక నీకేలే వెరవు
చ.3:
శ్రీ వేంకటేశ్వరుండు చేకొని నిన్నుఁ గూడి నీ
భావములోనుండఁగాను పదరనేల
వేవేలకునిందరును వెగటువాయ మొక్కిరి
చేవ మీరి నీచేఁతలే చెల్లెనేలే వెరపు
