ఈ పుట అచ్చుదిద్దబడ్డది
రేకు: 0105-1 సాళంగనాట సంపుటం: 07-025
పల్లవి:
మేకులు నావద్దనే మెరసీనా
యీకతలెఱుఁగుదు నన్నేల పిలిచీనే
చ.1:
సంగడిఁ గూచుండి సరసములాడి యాపె
అంగము కస్తూరి పూఁతలంటించుకొనె
ఎంగిలి దేహము తోనే యీడకు విచ్చేసినాఁడు
యింగిత మెఱిఁగితి నన్నేల పిలిచీనే
చ.2:
నమ్మిక లాపెకు నిచ్చి నయగారమున నాపె
సొమ్ములు దాఁబెట్టుకొనెఁ జూడఁగానే
అమ్మరొ నా మంచముపై నాపెఁదానునున్నవాఁడు
యెమ్మెలెల్లాఁ గంటి నన్నునేల పిలిచీనే
చ.3:
చేరి యాపె వాసన చూచిన చెంగలువ బంతి
మేరతోఁ దాఁబట్టుకుండి మీఁదవేసెను
యీరీతి శ్రీ వేంకటేశుఁ డిప్పుడిట్టై నన్నుఁగూడి
యీరానిచనవులిచ్చె నేల పిలిచీనే
