ఈ పుట అచ్చుదిద్దబడ్డది
రేకు: 0137-2 ఆహిరి సంపుటం; 07-218
పల్లవి:
ఆపోలికౌనో కాదో అట్టే నీవు చూచుకొమ్మా
పూఁపలై వలపు లెల్లా పూచినట్లున్నది
చ.1:
తగులు కొనెనో మెడఁ దరుణి చూపులెల్లా
అగపడి కల్వదండలై వున్నవి
చిగురుఁబాదాల నిగ్గు జెడగట్టెనో అప్పటి
తగి యల్లదె తులసి దండ వలె నున్నది
చ.2:
చిక్కుకొనెనో నొసలఁ జెలియ నగవులెల్లా
అక్కర ముత్తెపు నామమై నీకున్నది
జక్కవ చన్నుల నీడ సరి నీ యందునంటెనో
నిక్కి నీ చేతుల సంకుఁ జక్కురాలైవున్నవి
చ.3:
మొలచెనో నీవు రాన ముంచి యలమేలుమంగ
మలసి తానే కౌస్తుభమణి యైనది
అలరి శ్రీ వేంకటేశ కలసెనో తా భూసతై
నిలిచి శ్యామ వర్ణము నీమేనైవున్నది