ఈ పుట అచ్చుదిద్దబడ్డది
రేకు: 0245-2 కాంబోది సంపుటం; 08-266
పల్లవి:
ఏమయ్యా నే మంతేసి యెఱఁగనివారమా
కామించితే నీమాట కాదనఁగఁ దరమా
చ. 1:
సలిగెంత గలిగినా సరస మాడుటెకాక
మెలఁగి నీకంటె మితిమీరవచ్చునా
వలపు మిక్కిలియైతె వసమై చొక్కుటగాక
కలఁచి కలఁచి నిన్నుఁ గక్కసించఁదగునా
చ. 2:
నగవెంత దఱచైన ననుపై యుండుటగాక
మిగులా మందెమేళాల మించనగునా
మొగమెంత చూచినా మొక్కులె మొక్కుటగాక
యెగసక్యాలకు నిన్ను యేఁపఁదీరునా
చ. 3:
నీవెంత మన్నించినా నిన్నిట్టె కూడుటగాక
చేవదేర నిన్నుఁ బచ్చి సేయఁగూడునా
యీవేళ శ్రీవెంకటేశ యేలితి విటు నన్ను
ఆవటించి నిన్ను రతి నలయించఁజెల్లునా
