ఈ పుట అచ్చుదిద్దబడ్డది
రేకు: 0221-4 వరాళి సంపుటం: 08-124
పల్లవి:
ఇందవయ్య వీడెమిఁక నెరవులేవి
సందులేని కూరిమికి జగడములేవి
చ. 1:
చిత్తములేకములైతే సిగ్గులెందు వెదకేది
కొత్తవలపులై తేను కొంకఁ జోటేది
పొత్తుల భోగములైతే పొద్దులు దెలియనేది
అత్తిన సంసారఫలమయి వుండుఁగాక
చ. 2:
వాడికెలు గలిగితే వంచన సోదించనేది
వేడుకలు మించితేను వెలువలేవి
ఆడుకోలు మాటలకు నవుగాములు మరియేవి
యీడనే జన్మఫలము లీడేరుఁ గాక
చ. 3:
కూటములు గలిగితే గురుతులు వెట్టనేది
వాటపు నవ్వులకున వరుసేది
మేటి శ్రీవేంకటేశుఁడ మించి నన్నుఁ గూడితివి
పాటించి జవ్వన భాగ్యఫలమంటుఁ గాక
