పుట:Chandrika-Parinayamu.pdf/291

తే. పౌరవరవర్ణినీకోటి బారు దీరె
భర్మమయహర్మ్యవీథులఁ బార్థివేంద్రుఁ
డసమసుమపేశలాలాభహర్షభార
వారకర్ణేజపానుభావముల రాఁగ. 106

చ. సకలజగన్మనోహరు సుచంద్రునిఁ జంద్రికఁ జూడ నిట్లు కౌ
తుకమునఁ జేరి పౌరనవతోయదవేణిక లెల్ల నుల్లస
చ్చకచకతాసమానమణిసంకులకంకణరాజి గల్లన
న్వికసితమల్లికావితతి నింపుచు నింపులు పెంపు మీఱఁగన్. 107

సీ. చట్టుకూఁతు నొకర్తు సర్వజ్ఞుఁ డగుమహే
శ్వరునితోఁ దార్చినవామరచన,
ఖరపాదు రసవదంతర యైనపద్మిని
తోన గూర్చినపవలైన చెయ్వు,
లలకుముద్వతి మనోహారి యౌసత్పతి
తో ఘటించిన యాప్రదోషసృష్టి,
చిరపూరుషుని వసుస్ఫురితాంగి యగులక్ష్మి
తో నెనయించు నతుల్యసర్గ,

తే. మన్నియు జగంబు మఱవ నయ్యబ్జజన్ముఁ
డతులధీచాకచక్యంబు నసమరూప
మానుకూల్యంబు ననురూపయౌవనంబు
నమర నిద్దంపతులఁ జేసె ననఘశక్తి. 108

చ. క్షమ నొకకిన్నరాగ్రసరుసఖ్యముఁ బూని మహానటుండు నా
నమరి తపస్విరాజవనితాళి వ్రతంబులు దూల్చినట్టి యా
కమలకరున్ వరించుగిరికన్యక నవ్వఁగఁ జాలుఁ జంద్రికా
కమలదళాక్షి సద్గుణనికాయపయోధి సుచంద్రుఁ జేరుటన్. 109