పుట:Chandrika-Parinayamu.pdf/270

మ. కనకాంగీజన మారతు ల్వొనరుపం గంజద్విషత్కాంత మ
జ్జనశాలాకలశాంబుధి న్వెడలి తేజం బెచ్చ నాపద్మపా
ణి నవీనచ్ఛదమండలీవృతి సమున్నిద్రాళి గేయాభిపూ
ర్తిని జూపట్టెడు పుష్కరాఖ్యగలవేదిం బొల్చె నప్పట్టునన్. 20

సీ. కనకదామముఁ జేర్చి వనితకు జడ యల్లె
నళిపాళికలఁ గేర నబల యొకతె,
వరచంద్రరేఖ సుందరినెమ్మొగంబునఁ
దీర్చెఁ దామర నొవ్వఁ దెఱవ యొకతె,
చలువగందంబు తొయ్యలిమేన నెనపెఁ జం
పకవల్లిఁ గికురింపఁ బడఁతి యొకతె,
ఘనకంకణమ్ము లంగనకరమ్ముల నుంచెఁ
జిగురాకు నెగ్గింపఁ జెలువ యొకతె,

తే. చారుపత్రమ్ము లెడయ కొప్పార భూరి
వజ్రమాలిక నెలకొల్పె వనిత గబ్బి
గుబ్బకవ గుబ్బలులయుబ్బు కొంచెపఱుప
దంటతన మొప్ప విరిదమ్మికంటి యొకతె. 21

మ. లలనామౌళి శివార్పితంబు లగుమేల్కట్టాణిముత్యంపుక
మ్మలు దాల్చె న్భవదాస్యదీప్తిగతి కాత్మ న్గుందు రేఱేని ని
స్తులవీక్షామృతధారచే మనుపు మంచున్ వేగ తచ్చంద్రమం
డలడింభంబులు భక్తి విన్నపముఁ బూన్పన్ జేరుదారిం దగన్. 22

ఉ. చక్క మఘోని యత్తఱి నొసంగిన సారమసారహారముల్
చక్కెరబొమ్మచన్గవఁ బొసంగె వధూమణి శ్యామ గావునం
జొక్కపుగుత్తు లన్మనముఁ జొన్పఁగ గుబ్బలు నిబ్బరంపు మేల్
మక్కువ నందు వ్రాలునళిమాణవకప్రకరంబులో యనన్. 23