సీ. అరులఁ గొట్టఁగ సింహగిరిగుహ డాఁగిన
నవని నిన్ బిఱికివాఁ డందురయ్య!
నీవు రక్షింపక నీలాద్రి కేగిన
నవని ని న్మొండివాఁ డందురయ్య!
పోషింపఁగాలేక శేషాద్రి కేగిన
నతిలోభి వనుచు ని న్నందురయ్య!
తగ నాదరింప కంతర్వేది కేగిన
నతిలోభి వనుచు ని న్నందురయ్య!
గీ. నాథ! యిటు లోకనటనం బొనర్చు నీకు
నహహ! నిందలు వచ్చును నదియు విడచి
యొడ్డుకొనఁబోకు వెసఁబ్రోవు ముర్విజనుల
వైరిహరరంహ! సింహాద్రి నారసింహ!50
సీ. అరిసైన్యధూళి సూర్యాక్రాంతమై మించె
నిఁకనేమి దయజూచె దీవు మమ్ముఁ
బరభేరిభాంకృతు ల్పగిలించె దిశల నిం
కేమి నామొర వినియెదవు నీవు
ధరశత్రుహరిఖుర దళితమయ్యె నింకేమి
వచ్చెదవయ్య ప్రోవంగ మమ్ము
వైరితేజశ్శిఖ దజ్వలియించె నిం కేమి
మొగమునఁ జూచెదు జగతిజనుల
గీ. నీపయికి వచ్చునప్పుడు నీవెఱుంగ
వేమి? మసలకు మింక దిక్కేది మాకు
జాగరూకుండవై రిపుక్షయ మొనర్పు
వైరిహరరంహ! సింహాద్రి నారసింహ!51
పుట:2015.370800.Shatakasanputamu.pdf/245
ఈ పుట అచ్చుదిద్దబడ్డది