ఇదె వచ్చుచున్నాను ప్రియురాలా
ఇదె వచ్చుచున్నాను ప్రియురాలా!
ఇక నిలువలేను నా ప్రియురాలా!
చిరకాల మీ యెడద చెరలో నిమిడి నేడు
పొరలి పొంగెడు దుఃఖ ఝరులపై పరువెత్తి | ఇదె వచ్చుచున్నాను |
ఈ విరహసంతాప మీ ప్రవాసక్లేశ
మే పగిది సహియింతు నెటులు జీవింతున్? | ఇదె వచ్చుచున్నాను |
ఆవలి దరి నీ పిలుపు పవలు రేలును మ్రోయ
మివుల తొందర నసుపు నవసి తపియించున్! | ఇదె వచ్చుచున్నాను |
శూన్యలోకము దాటి శుష్కదేహము దాటి
యన్యోన్య నిబిడ నిత్యాశ్లేష కాంక్షతో | ఇదె వచ్చుచున్నాను |